ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​សាទរ​សេចក្តី​ថ្លែង​ការណ៍​ស្វាគមន៍របស់​សហ​រដ្ឋ​អាមេរិក


រដ្ឋ​មន្រ្តី​ក្រសួង​ការ​បរទេស​សហរដ្ឋ​អាមេរិក Michael R. Pompeo ថ្លែង​សុន្ទរកថា​ស្តី​ពី៖ «ការ​ចូលរួម​ផ្នែក​សេដ្ឋកិច្ច​សហរដ្ឋ​អាមេរិក​នៅ​អាស៊ី​ដើម្បី​ភាពរីកចម្រើន‍» នៅ​ទីក្រុង​បាងកក ប្រទេសថៃ ថ្ងៃទី​១ ខែ​សីហា ឆ្នាំ​២០១៩។ (Photo: Ron Przysucha/US Department of State)

មួយ​ថ្ងៃ​បន្ទាប់​ពី​រដ្ឋមន្ត្រី​ការ​បរទេស​អាមេរិក​​ប្រកាស​ស្វាគមន៍​​ការ​បដិសេធ​របស់​កម្ពុជា​អំពី​ព័ត៌មាន​ស្តី​អំពី​មូលដ្ឋាន​យោធា​កងទ័ព​ចិន​ដាក់​នៅ​ក្នុង​តំបន់​ឈូង​សមុទ្រ​កម្ពុជា​​នោះ​ ​ នៅ​ថ្ងៃ​សុក្រ​នេះ​ ក្រុម​​មន្រ្តី​រដ្ឋាភិបាល​កម្ពុជា​បង្ហាញ​ការ​សាទរ​ការ​បង្ហាញ​ជំហរ​របស់​រដ្ឋា​ភិបាល​អាមេរិក​នេះ។

ក្រុម​មន្រ្តី​រដ្ឋាភិបាល​កម្ពុជា​នៅ​ថ្ងៃ​សុក្រ​នេះបាន​សាទរការ​ថ្លែង​ស្វាគមន៍​របស់​រដ្ឋ​មន្រ្តី​ការ​បរទេស​អាមេរិក​ចំពោះ​សេចក្តី​អះអាង​របស់កម្ពុជាដែល​ថា ​មិន​មាន​ការ​អនុញ្ញាត​ឲ្យ​ប្រទេស​ចិន​ដាក់​មូលដ្ឋាន​ទ័ព​នៅ​ឆក​សមុទ្រ​កម្ពុជា។​

​ក្នុង​កិច្ច​ប្រជុំ​រដ្ឋមន្ត្រី​ការ​បរទេស​អាស៊ាន​ក្នុង​ទីក្រុង​បាង​កក​ ប្រទេស​ថៃ ​កាលពី​ថ្ងៃ​ព្រហស្បតិ៍ ​រដ្ឋមន្ត្រី​ការ​បរទេស​អាមេរិក​ លោក​ Michael Pompeo​ ស្វាគមន៍​ចំពោះ​ការ​បដិសេធ​របស់​កម្ពុជា​អំពី​ព័ត៌មាន​ស្តី​អំពី​មូលដ្ឋាន​យោធា​កងទ័ព​ចិន​ដាក់​នៅ​ក្នុង​តំបន់​ឈូង​សមុទ្រ​កម្ពុជា​និងបាន​កោត​សរសើរ​ចំពោះ​ការ​ប្តេជ្ញា​ការពារ​បូរណ​ភាព​ដែនដីរបស់​កម្ពុជា។​

លោក​ប្រមុខ​ការទូត​អាមេរិកបាន​ថ្លែង​ដូច្នេះ​ថា៖​

​«ប្រទេស​កម្ពុជា​បាន​បដិសេធ​របាយ​ការណ៍​ដែល​ថា ​កម្ពុជា​អនុញ្ញាត​ឲ្យ​មាន​មូល​ដ្ឋាន​យោធាចិន​នៅ​លើ​ទឹកដី​របស់​ខ្លួន។ ​សហ​រដ្ឋ​អាមេរិក​ស្វាគមន៍​ការ​ការពារ​អធិបតេយ្យ​ភាព ​បូរណភាព​ដែនដីដ៏ខ្លាំងក្លា​របស់​កម្ពុជា ​ហើយ​លើក​ទឹក​ចិត្ត​ដល់​ប្រទេស​ផ្សេង​ទៀត​ក្នុង​តំបន់​ឲ្យ​ធ្វើ​តាម​លំនាំ​របស់​កម្ពុជា»។​

លោក​ផៃ ស៊ីផាន ​អ្នក​នាំ​ពាក្យ​ទីស្តីការ​គណៈ​រដ្ឋមន្រ្តី ​បាន​ថ្លែងអបអរ ​និង​អរគុណ​ដល់​រដ្ឋមន្ត្រី​ក្រសួង​ការ​បរទេស​សហ​រដ្ឋ​អាមេរិក​ ដោយ​ចាត់​ទុក​ថា ​នេះ​គឺជា​ការផ្តល់​យុត្តិធម៌​ដល់​រាជ​រដ្ឋាភិបាល​កម្ពុជា។

«យើង​សូម​អរគុណ​ចំពោះ​ឯកឧត្តម ​ដែល​លោក​បាន​ផ្តល់​យុត្តិធម៌ ​ហើយ​និង​តម្លៃ​ការណ៍​ពិត​ប្រឆាំង​ជាមួយ​ហ្នឹង​ Fake News ​[ព័ត៌មាន​ក្លែងក្លាយ]។ នេះ​ជា​ប្រវត្តិ​សាស្រ្ត​ថ្មី​មួយ ​ដែល​សហ​រដ្ឋ​អាមេរិក​បាន​ទទួល​ស្គាល់​នូវ​អ្វី​ទៅ​ដែល​កម្ពុជា​បាន​ខំ​ប្រឹងប្រែង​ក្នុង​កិច្ច​ថែរក្សា​អព្យាក្រឹត្យ​ភាព ​និង​អធិប​តេយ្យ​ភាព​នេះ​ឯង»។​

ដោយ​ឡែក​លោក​សុខ ឥសាន ​សមាជិក​ព្រឹទ្ធ​សភា និង​ជា​អ្នក​នាំពាក្យ​គណបក្ស​ប្រជា​ជន​កម្ពុជា​កំពុង​កាន់​អំណាច ​បាន​ថ្លែង​ថា ​ការ​ថ្លែង​ស្វាគមន៍​របស់​រដ្ឋមន្រ្តី​ការ​បរ​ទេស​អាមេរិក​នេះ​បង្ហាញ​អំពី​ចំណុច​វិជ្ជមាន​នៃ​ទំនាក់​ទំនង​រវាង​ប្រទេស​ទាំង​ពីរ។

«ខ្ញុំ​យល់​ថា​ ​ជា​ចំណុច​វិជ្ជមាន​នៅក្នុងទំនាក់​ទំនង​ទ្វេភាគី​រវាង​កម្ពុជា​និង​សហ​រដ្ឋ​អាមេរិក​ ​ហើយ​ខ្ញុំ​ទើប​តែ​ឃើញ​មន្រ្តី​ជាន់ខ្ពស់​របស់​សហ​រដ្ឋ​អាមេរិក​លោក​និយាយដោយ​សច្ចៈធម៌»។​

កាសែត ​The Wall Street Journal ​បាន​ដកស្រង់​សម្តី​មន្ត្រី​អាមេរិក​ម្នាក់​ និង​មន្ត្រី​ដែល​ធ្វើ​កិច្ចការ​នេះ​ តែ​មិន​បាន​ប្រាប់​ឈ្មោះ ​មក​ផ្សព្វ​ផ្សាយថា ​ប្រទេស​ចិន​ និង​កម្ពុជា​បាន​ចុះ​ហត្ថលេខា​លើ​កិច្ច​ព្រម​ព្រៀង​ជា​សម្ងាត់​មួយ​ដើម្បី​អនុញ្ញាត​ឲ្យ​កង​ទ័ព​របស់​ចិនប្រើប្រាស់​មូលដ្ឋាន​ទ័ព​ជើង​ទឹក​កម្ពុជា​នៅ​ដែន​សមុទ្រ​រាម ​ខេត្ត​ព្រះ​សីហនុ ​រយៈពេល​៣០ឆ្នាំ។ ហើយ​កិច្ច​ព្រម​ព្រៀង​នេះ​អាច​នឹង​បន្ត​រាល់​ដប់​ឆ្នាំ​ម្តង​ក្រោយ​ពី​ចប់​រយៈ​ពេល​៣០​ឆ្នាំ​ដំបូង។​

ក្រោយ​ពី​ការ​ផ្សព្វផ្សាយ​ដំណឹង​នោះ​ លោក​នាយក​រដ្ឋ​មន្ត្រី​ហ៊ុន សែន ​និង​លោក​ទៀ បាញ់ ​រដ្ឋ​មន្ត្រី​ក្រសួង​ការពារ​ជាតិបាន​ច្រាន​ចោល​ភ្លាមៗ​ផង​ដែរ។ ​លោក​ហ៊ុន សែន​បាន​ហៅ​សេចក្តី​រាយ​ការណ៍​របស់​កាសែត​អាមេរិក​នោះ​ថា ​ជា «ព័ត៌មាន​ដ៏​អាក្រក់​បំផុត»​ ប្រឆាំង​នឹង​ប្រទេស​កម្ពុជា។​

ក្រោយ​ពីក្រុម​មន្ត្រី​កម្ពុជា​បាន​បន្ទរ​តាម​ការ​អត្ថាធិប្បាយ​របស់​លោក​នាយក​រដ្ឋ​មន្ត្រីហ៊ុន​ សែន ​រដ្ឋា​ភិបាលកម្ពុជា​បាន​សម្រេច​បើក​បង្ហាញ​មូលដ្ឋាន​កងទ័ព​ជើង​ទឹក​ក្នុង​ឆក​សមុទ្រ​រាម​នៃ​ខេត្ត​ព្រះ​សីហនុ​ ​កាលពី​ថ្ងៃ​សុក្រ​ ​សប្តាហ៍​មុន​ដើម្បី​បញ្ចប់​ការ​ចោទ​ប្រកាន់​ដែល​ថា​ ​ខ្លួន​បាន​ធ្វើ​កិច្ច​សន្យា​បើក​ដៃ​ឱ្យ​ចិន​បោះ​ទីតាំង​យោធា​ក្នុង​តំបន់​សមុទ្រ​នេះ។​

លោក​បណ្ឌិត​ អៀ សុផល ​សាស្ត្រាចារ្យ​នៃ​សាកល​វិទ្យា​ល័យ​ Occidental ​ក្នុង​ក្រុង ​Los Angeles​ រដ្ឋ​កាលីហ្វ័រញ៉ា ​សហ​រដ្ឋ​អាមេរិក ​លើក​ឡើង​ថា ​ការ​ស្វាគមន៍​របស់​លោក​រដ្ឋមន្ត្រី​ការបរ​ទេស​អាមេរិក Michael Pompeo​ នឹង​ធ្វើ​ឲ្យ​កម្ពុជា​ប្រឈម​នឹង​បញ្ហា​កាន់​តែ​ធំ ​ប្រសិន​បើ​មូលដ្ឋាន​ទ័ព​នោះពិត​ជា​មាន​មែន។

«ខ្ញុំគិត​ថា​ លោក​រដ្ឋមន្ត្រី​ការ​បរទេស​ជឿ​ថា​ ការ​បដិសេធ​របស់​រដ្ឋាភិបាល​កម្ពុជាគឺ​ជា​រឿង​ច្បាស់​លាស់​ ​តែ​បាន​ចាប់​ឲ្យ​អាជ្ញាធរ​កម្ពុជា​ប្តូរ​ផ្តាច់​ចំពោះ​ការ​បដិសេធ​របស់​គេ​ដោយ​ត្រង់ៗ។ ​ប្រសិន​បើ​មាន​ភ័ស្តុតាង​នៃ​សកម្មភាព​នោះ​លេច​ឡើង​បន្ត​ជា​ការណ៍ពិត ​ពេល​នោះ​កម្ពុជា​នឹង​មិន​គ្រាន់តែ​រំលោភ​ច្បាប់​រដ្ឋ​ធម្មនុញ្ញ​របស់​ខ្លួន​ទេ ​តែបាត់​បង់​កេរ្តិ៍​ឈ្មោះ​ទាំងអស់»។​

ក្រោយ​មាន​ការ​ច្រាន​ចោល​សេចក្តី​រាយ​ការណ៍​ដ៏​ចម្រូង​ចម្រាស​ជា​បន្ត​បន្ទាប់ទាក់​ទង​ទៅ​នឹង​ការ​ចុះ​កិច្ច​ព្រម​ព្រៀង​សម្ងាត់អនុញ្ញាត​ឲ្យ​កង​យោធា​ជើង​ទឹក​ចិន​មាន​សិទ្ធិ​ផ្តាច់​មុខ​ក្នុង​ការ​ប្រើ​ប្រាស់​ដែន​សមុទ្រ​រាម​ជាមូល​ដ្ឋាន​ឈរ​ជើង​នោះ​ ​កាសែត​ ​The Wall Street Journal​ ​បាន​ប្រាប់​ ​VOA​ ថា​ ពួក​គេ​នៅកាន់​ជំហរ​រឹងមាំ​លើ​ការ​រាយ​ការណ៍​ព័ត៌មាន​ដែល​បាន​ចុះ​ផ្សាយ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG