ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​ប្រកាស​ដាក់លក់​មូលបត្រ​រដ្ឋ​លើក​ដំបូង​ចាប់​ពី​ខែកញ្ញា ដើម្បី​កៀរគរ​ប្រភព​កម្ចី​ក្នុង​ស្រុក


រូប​ឯកសារ៖ បុរស​កម្ពុជា​ម្នាក់​ដើរ​នៅ​ជិត​រូបថត​រូបិយវត្ថុ​ផ្សេងៗ ក្នុង​អំឡុង​ពិធី​​បើក​សម្ពោធទី​ស្នាក់ការ​ផ្សារ​មូលបត្រ​កម្ពុជា​ (Cambodia Securities Exchange) ក្នុង​ទី​ក្រុង​ភ្នំពេញ​កាល​ពី​ថ្ងៃ​​ច័ន្ទ​ទី​១១ ​ខែ​កក្កដា​ ឆ្នាំ​២០១១។

រដ្ឋាភិបាល​កម្ពុជា​ប្រកាស​ដាក់​លក់​មូលបត្ររដ្ឋ​ជា​លើក​ដំបូង​នៅ​ខែ​កញ្ញា​ខាង​មុខ​នេះ ក្នុង​ទំហំ​ទឹកប្រាក់​ចំនួន ៣០០​ លាន​ដុល្លារ​អាមេរិក​ ដើម្បី​ប្រមូល​ប្រភព​ឥណទាន​ក្នុង​ស្រុក បន្ថែម​លើ​ប្រភព​ឥណ​ទាន​ ឬ​ប្រាក់​កម្ចីពី​ក្រៅ​ប្រទេស។ នេះ​បើ​តាម​ក្រសួង​សេដ្ឋកិច្ច និង​ហិរញ្ញវត្ថុ និង​មន្ត្រី​ជំនាញ​ទី​ផ្សារ​ភាគហ៊ុន។

ការ​ដាក់​លក់​មូលបត្រ​រដ្ឋ ឬ​ហៅ​ម្យ៉ាង​ទៀត​ថា​ សញ្ញាបណ្ណ​ដែល​សំដៅ​ដល់​កិច្ចសន្យា​បំណុល​ គឺជា​ផ្នែក​មួយនៃ​ការ​ប្រឹងប្រែង​របស់​រដ្ឋាភិបាល​កម្ពុជា​ដើម្បី​រំដោះ​ខ្លួន​ពី​ការ​ផ្តេកផ្តួល​លើ​ប្រាក់​កម្ចី​ក្រៅ​ស្រុក​ ហើយ​បើក​ផ្លូវ​ឱ្យ​រដ្ឋ​អាច​កៀរគរ​ប្រាក់​កម្ចី​ពី​វិនិយោគិន​ក្នុងស្រុក។ នេះ​បើ​តាម​ការ​ប្រកាស​កន្លងមករបស់​មន្ត្រី​រដ្ឋាភិបាល​ទទួល​បន្ទុក​សេដ្ឋកិច្ច​ និង​ហិរញ្ញវត្ថុ។

បើ​តាម​សេចក្តី​ប្រកាស​របស់​ក្រសួង​សេដ្ឋកិច្ច​ និង​ហិរញ្ញ​វត្ថុ​ ចុះ​ថ្ងៃ​ទី​ ១៦​ ខែ​សីហា ហើយ​ត្រូវ​បាន​ផ្សព្វ​ផ្សាយ​ជា​សាធារណៈ​ កាល​ពី​ថ្ងៃ​ទី​ ២៤ ខែ​សីហា​ សម្រាប់​ការ​លក់​មូលបត្រ​រដ្ឋ​ដំបូង​ វិនិយោគិន​អាច​ទិញ​បាន​ក្នុង​មួយ​បណ្ណ​ ឬ​មួយ​ភាគ​ហ៊ុន​ស្មើ​នឹង​សាច់ប្រាក់​ចំនួន​ ១ លាន​រៀល​ ឬ​ប្រមាណ​ ២៥០ ដុល្លារ​អាមេរិក។

អ្នក​នាំ​ពាក្យ​ក្រសួង​សេដ្ឋកិច្ច​ និង​ហិរញ្ញវត្ថុ​លោក​ មាស​ សុខសេនសាន​ ប្រាប់​វីអូអេ​នៅ​ថ្ងៃ​សុក្រ​នេះ​ថា ការ​ដាក់​លក់​មូលបត្រ​រដ្ឋ​ចាប់ពី​ខែ​កញ្ញា​ខាង​មុខ​នេះ​ គឺ​ជា​ដំណាក់កាល​សាកល្បង​ដើម្បី​ទាញ​យក​ប្រភព​ហិរញ្ញប្បទាន​បន្ថែមដើម្បី​ជំរុញ​ដំណើរការ​អភិវឌ្ឍ​ផ្សេងៗ​នៅ​ក្នុង​ប្រទេស។​

លោក​ថ្លែង​ថា៖ «វា​ជា​ចំណែក​មួយ​នៃ​ហិរញ្ញប្បទាន​ ដែល​យើង​ត្រូវ​ការ​ជា​ទុន​មួយ​ដែល​យើង​ត្រូវ​ការ​ដើម្បី​យក​មក​អភិវឌ្ឍ​នៅ​ក្នុង​ស្រុក។ ហើយ​យក​មក​ជួយ​ដោះស្រាយ​នូវ​បញ្ហា​ផ្សេងៗ​ជា​ទុន​...មិនមែនថា​ជា​លក្ខ​ខណ្ឌ​ចាំ​បាច់​ត្រូវ​តែ​មាន​ចេញ​ពី​អា​ហ្នឹង​មក​ទេ​ យើង​មាន​លទ្ធភាព​យើង​ធ្វើ​ បើ​មាន​គេ​ទិញ​ គឺ​យើង​មាន​លទ្ធភាព​ដើម្បី​យក​ថវិកា​ហ្នឹង​យក​ទៅ​អភិវឌ្ឍ​ និង​ដោះស្រាយ​បញ្ហា​ផ្សេងៗ​សុខុមាលភាព​សង្គម​ និយាយ​ចំ​ទៅ​ដូច​ជា​ថវិកា​ដែល​យើង​មក​ធ្វើ​គ្រប់​មុខ​ទាំង​អស់​ទេ​ ហើយ​អានេះ​គ្រាន់​តែ​ជា​ការ​សាក​ល្បង​ទេ»។ ​

ការ​ដាក់​លក់​មូលបត្រ​រដ្ឋ​ ឬ​កិច្ចសន្យា​បំណុល​រដ្ឋាភិបាល​ កើតឡើង​ជិត​មួយ​ឆ្នាំ ក្រោយ​ការ​ប្រកាស​របស់​លោក​នាយក​រដ្ឋមន្ត្រី ហ៊ុន សែន កាល​ពី​ខែ​តុលា ឆ្នាំ ២០២១ ជា​ពេល​ដែល​រដ្ឋាភិបាល​កម្ពុជា​ប្រកាស​ឱ្យ​ដឹង​ផង​ដែរ​នូវ​ថវិកាជាតិ​សម្រាប់​ឆ្នាំ​ ២០២២ ​ដែល​ត្រូវ​បាន​គ្រោង​ទុក​ក្នុង​ចំនួន​ប្រមាណ​ ៨.០១៣ ​លាន​ដុល្លារ​អាមេរិក។

នៅ​ក្នុង​វេទិកា​សាធារណៈ​ស្តី​ពី​ «ការ​គ្រប់គ្រង​ម៉ាក្រូ​សេដ្ឋកិច្ច​និង​ច្បាប់​ថវិកា​ឆ្នាំ​ ២០២១» ​ដែល​ត្រូវ​បាន​ធ្វើ​ឡើង​កាល​ពី​ចុង​ខែ​មករា​ ឆ្នាំ ២០២១​ នៅ​រាជធានី​ភ្នំពេញ​ រដ្ឋលេខាធិការ​ក្រសួង​សេដ្ឋកិច្ច​ និង​ហិរញ្ញវត្ថុ​លោក ​វង្សី វិស្សុត បាន​ថ្លែង​ថា​ ប្រាក់​កម្ចី​ពី​ក្រៅ​ប្រទេស​នឹង​លែង​ជា​ជម្រើស​អាទិភាព​សម្រាប់​ការ​ខ្ចី​បុល​របស់​រដ្ឋ​នៅ​ពេល​អនាគត។

មូលបត្រ​រដ្ឋ​សំដៅ​ដល់​សញ្ញាបណ្ណ​ និង​ឧបករណ៍​ហិរញ្ញវត្ថុ​ផ្សេងៗ​ទៀត ​ដែល​បញ្ជាក់​ពី​ការ​ទទួល​ស្គាល់​បំណុល​ដែល​បាន​បោះ​ផ្សាយ​ក្នុង​នាម​រដ្ឋាភិបាល​ ក្នុង​នោះរួម​មាន​បណ្ណ​រតនាគារ​ សញ្ញា​បណ្ណ​រតនាគារ​ និង​មូលបត្រ​រដ្ឋ​ផ្សេង​ទៀត។ នេះ​បើ​តាម​ច្បាប់​ស្តីពី​មូលបត្រ​រដ្ឋ។

បើ​តាម​ច្បាប់​ស្តីពី​មូលបត្រ​រដ្ឋ​ ដែល​ត្រូវ​បាន​ព្រះមហាក្សត្រ​ប្រកាស​ឱ្យ​ប្រើប្រាស់​កាល​ពី​ខែ​ធ្នូ​កន្លង​ទៅ​នេះ​ មូលបត្រ​រដ្ឋ​អាច​ត្រូវ​បាន​បោះ​ផ្សាយ​ជា​រូបិយ​វត្ថុ​ជាតិ​ ឬ​ជា​រូបិយបណ្ណ​បរទេស។
ច្បាប់​ដដែល​ចែង​ថា មូល​បត្រ​រដ្ឋ​អាច​ត្រូវ​បាន​បោះ​ផ្សាយ​ក្នុង​ប្រទេស​ ឬ​នៅ​ក្រៅ​ប្រទេស​ ហើយ​មូលបត្រ​ដែល​ត្រូវ​បាន​បោះ​ផ្សាយ​លក់ ​គឺ​ជា​ការ​ទទួល​ខុស​ត្រូវ​ទាំង​ស្រុង​របស់​រាជ​រដ្ឋាភិបាល។

ប្រធាន​នាយកដ្ឋាន​ប្រតិបត្តិការ​ទីផ្សារ​មូលបត្រ​នៃ​ផ្សារ​មូលបត្រកម្ពុជា​ អ្នក​ស្រី​ គឹម សុផានីតា ​ប្រាប់​វីអូអេ​តាម​ប្រព័ន្ធ​ទំនាក់​ទំនង​តេឡេក្រាម​នៅ​ថ្ងៃ​សុក្រ​នេះ​ថា​ ការ​បោះផ្សាយ​មូលបត្រ​រដ្ឋ​ដំបូង​នេះនឹង​ប្រតិ​បត្តិការ​តាម​រយៈ​ធនាគារ​ជាតិ​នៃ​កម្ពុជា ហើយក្រុម​ជា​គោល​ដៅ​ដែលអាចទិញមូលបត្ររដ្ឋ​ដំបូងនេះ គឺ​មកពី​វិស័យ​ធនាគារ​ដែល​មាន​សាច់​ប្រាក់​សល់​ច្រើន​ មុននឹង​បន្ត​ដាក់​លក់​នៅផ្សារ​មូល​បត្រ​កម្ពុជា​ដែល​នឹង​បើកផ្លូវឱ្យ​អ្នក​មក​ពី​គ្រឹះស្ថាន​ហិរញ្ញវត្ថុ​ផ្សេង​ទៀត​ ដូចជា​ក្រុមហ៊ុន​ធានារ៉ាប់​រង​ជាដើម​ មក​ទិញ​មូលបត្រ​ក្នុង​ជំហាន​បន្ត​បន្ទាប់​ទៀត។​

អ្នក​ស្រី​បន្ថែម​ថា​ ការសម្រេច​របស់​រដ្ឋាភិបាល​ក្នុង​ការ​លក់​មូលបត្រ​រដ្ឋ​នេះ​ កើតមាន​ឡើង​ ដោយ​សារ​តែ​កម្ពុជា​ មាន​បទ​ប្បញ្ញតិ្ត និងប្រព័ន្ធ​ជួញដូរ​មូលបត្រ​ដែល​ប្រព្រឹត្ត​ទៅប្រកប​ដោយ​ភាព​ត្រឹមត្រូវ​ និង​តម្លា​ភាព​ ហើយស្រប​តាម​តម្រូវ​ការ​របស់​រដ្ឋាភិបាល​ក្នុងការ​ស្តារ​កំណើន​សេដ្ឋកិច្ច ក្រោយ​វិបត្តិ​ជំងឺ​ឆ្លង​កូវីដ​១៩។

អ្នក​ស្រី​ថ្លែង​ថា៖​ «មូលហេតុ​ដែល​ថា​ វា​សម​ស្រប​មែន​ទែន​សម្រាប់​ពេល​បច្ចុប្បន្ន​នេះ​មួយទៀត​គឺ​ដោយសារ​តែ​វា​ស្រប​ទៅនឹង​គោលដៅ​របស់​រាជរដ្ឋា​ភិបាល​ដែល​យើង​ចង់​ស្តារ​ និង​ពង្រឹង​កំណើន​សេដ្ឋ​ កិច្ច​ ក្រោយ​ពេល​វិបត្តិ​កូវីដ​១៩​នេះ»។

បើតាម​អ្នក​ស្រី​ គឹម សុផានីតា​ ការ​បោះផ្សាយ​មូលបត្រ​រដ្ឋ​នេះ​ គឺជាការ​ធ្វើ​ពិពិធកម្ម​ប្រភព​ទុន​ សម្រាប់​ការ​អនុវត្ត​គម្រោង​អភិវឌ្ឍធំៗ​ក្នុងប្រទេស​ ដូច​ជា​ការ​កសាង​ស្ពាន​ផ្លូវថ្នល់​ ប្រឡាយ​ទឹក​ ព្រមទាំង​ពង្រឹង​វិស័យ​អប់រំ​ និងវិស័យផ្សេង​ទៀត​ ដូច​ជាវិស័យ​សុខាភិបាល។​

​អ្នកជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជាលោក​បណ្ឌិត​ គី សេរីវឌ្ឍន៍ លើក​ឡើង​ថា ប្រទេស​ផ្សេង​ទៀត​ក៏មាន​ការ​ដាក់​លក់​មូលបត្រ​រដ្ឋ​ស្រដៀង​គ្នានឹង​កម្ពុជា​ ដើម្បី​ធ្វើ​ហិរញ្ញប្បទាន​ទៅ​លើ​ឱនភាព​ថវិកា​រដ្ឋ។ ​

លោក​ប្រាប់​វីអូអេ​ថា៖ «ការ​ប្រើប្រាស់​មូលបត្រ​រដ្ឋ​គឺល្អ​ ជា​ជាង​ការ​ខ្ចីបុល​ពី​បរទេស។​ ចំពោះ​ពលរដ្ឋ​ខ្មែរ​មួយ​ចំនួន​ យើង​នៅ​ប្រើ​ប្រាស់​សាច់​ប្រាក់​យើង​នៅ​ឡើយ​ បាន​ន័យ​ថា​ ទូទាត់​តាម​ធនាគារ​ ហើយ​សាច់​ប្រាក់​ភាគ​ច្រើន​គឺ​ទុក​នៅ​ផ្ទះ​ដែល​ជា​ប្រាក់​សន្សំ​មិន​បាន​ត្រូវ​យក​មក​ប្រើ​ ដូច្នេះ​ហើយ​ជា​ការទុក​ធនធាន​ចោល​ដោយ​គ្មាន​ប្រសិទ្ធ​ភាព»។

លោក​បន្ថែម​ថា៖ «អ៊ីចឹង​ ការ​ប្រើប្រាស់​មូលបត្រ​ហ្នឹង​ គឺ​ស្មើនឹង​ការ​យក​លុយ​ដាក់​ធនាគារ​ប្រហាក់ប្រហែល​គ្នា​ដែល​រដ្ឋ​នឹង​ផ្តល់​មក​វិញ​នូវ​ការ​ប្រាក់​ជូនអ្នក​ដែល​ទិញ​មូល​បត្រ​រដ្ឋ​នេះ»។

លោក​ គី​ សេរីវឌ្ឍន៍​ បន្ថែម​ថា​ ការ​ផ្តល់​ការ​ប្រាក់​ដល់​ប្រជាជន​ក្នុង​ស្រុក​ ជា​សកម្មភាព​ហិរញ្ញវត្ថុ​មួយ​មាន​លក្ខណៈ​ប្រសើរ​ជាង​ការ​ផ្តល់​ការ​ប្រាក់​ទៅ​ឱ្យ​ម្ចាស់​ប្រាក់​កម្ចី​នៅក្រៅ​ប្រទេស​ ហើយក៏​ជាយុទ្ធ​សាស្ត្រ​ហិរញ្ញវត្ថុ​មួយ​ ក្នុង​ការ​ទាញ​យកចំណូល​ក្នុងស្រុក​ ដើម្បីជំរុញ​ឱ្យ​មាន​កំណើន​សេដ្ឋកិច្ច​ តាម​រយៈ​គោលនយោបាយ​សារ​ពើពន្ធ​ និង​ការ​កសាង​ហេដ្ឋា​រចនា​សម្ព័ន្ធ​ផ្សេងៗ។ ​

បើ​គិត​ពី​ឆ្នាំ​ ១៩៩៣ ​មក​ដល់​ដំណាច់​ឆ្នាំ​ ២០២០ ​ទំហំ​កម្ចី​ដែល​កម្ពុជា​បាន​ខ្ចី​ពី​ដៃគូ​អភិវឌ្ឍន៍​បាន​កើន​ដល់​ជាង ​៩,៦៥១​ លាន​ដុល្លារ​សហរដ្ឋ​អាមេរិក។

គិត​ត្រឹម​ដំណាច់​ឆ្នាំ​ ២០២០ ​បំណុល​សាធារណៈ​ក្រៅ​ប្រទេស​របស់​កម្ពុជា ដែល​នៅ​ជំពាក់​ដៃគូ​បរទេស មាន​ទំហំ​ ៨,៨៥៩ លាន​ដុល្លារអាមេរិក​ដែល​ក្នុង​នោះ មាន​ចំណែក​ ៤៥%​ ជំពាក់​ប្រទេស​ចិន៕

XS
SM
MD
LG