ក្រុមអង្គការឃ្លាំមើលសិទ្ធិមនុស្សបាននិយាយថា របាយការណ៍របស់រដ្ឋាភិបាលមីយ៉ាន់ម៉ាបានបដិសេធរបាយការណ៍របស់សារពត៌មាន Associated Press ស្តីពីការសម្លាប់មនុស្សយ៉ាងឃោរឃៅនៅក្នុងភូមិភាគខាងជើងរដ្ឋ Rakhine ដែលបានធ្វើឡើងដោយកងកម្លាំងសន្តិសុខមីយ៉ាន់ម៉ានោះ បានបញ្ជាក់ពីភាពចាំបាច់ឲ្យមានគណកម្មាធិការស៊ើបអង្កេតឯករាជ្យមួយ ដើម្បីអាចចូលទៅស៊ើបអង្កេតទៅក្នុងតំបន់ផ្សេងៗទៀត។
កាលពីថ្ងៃទី២ខែកុម្ភៈកន្លងទៅនេះ សារពត៌មាន APបានផ្សព្វផ្សាយរបាយការណ៍មួយ ចោទប្រកាន់ពីការសម្លាប់រង្គាលដែលបានធ្វើឡើងដោយកម្លាំងសន្តិសុខមីយ៉ាន់ម៉ា នៅក្នុងភូមិ Gu Dar Pyin នៅជិតក្រុង Buthidaung ក្នុងរដ្ឋRakhine។ របាយការណ៍នេះធ្វើឡើងផ្អែកលើពត៌មានដែលទទួលបានពីប្រភពផ្សេងៗដូចជា ពីសាក្សីដែលឃើញផ្ទាល់ភ្នែក រូបភាពតាមផ្កាយរណប និងរូបភាពវីដេអូដែលថតពីទូរសព្ទដៃជាដើម បានចោទប្រកាន់ទៅលើកងកម្លាំងសន្តិសុខថាបានដុតបំផ្លាញសាកសពមនុស្សជាមួយនឹងទឹកអាស៊ីត។
យោងតាមរបាយការណ៍បានឲ្យដឹងថា សាកសពជនរងគ្រោះ៧៥នាក់ត្រូវបានរកឃើញនៅក្នុងផ្នូរ ក៏ប៉ុន្តែអ្នកភូមិបានប៉ាន់ស្មានថា មនុស្សប្រហែល៤រយនាក់ត្រូវបានសម្លាប់នៅក្នុងប្រតិបត្តិការយោធា ដែលបានចាប់ផ្តើមនៅថ្ងៃទី២៧ ខែសីហា គឺនៅប៉ុន្មានថ្ងៃបន្ទាប់ពីការវាយប្រហារដោយក្រុមកងទ័ពស្រោចស្រង់ជាតិ Arakan របស់ជនជាតិរ៉ូហ៊ីងយ៉ា ដែលបានងើបឡើងប្រឆាំងនឹងការបង្ក្រាបរបស់ពួកយោធា ដែលបានបង្កឲ្យជនជាតិរ៉ូហ៊ីងយ៉ាកាន់សាសនាឥស្លាមជិត៧សែននាក់ភៀសខ្លួនឆ្លងចូលព្រំដែនប្រទេសបង់ក្លាដេសដែលជាប្រទេសជិតខាង។
មួយថ្ងៃបន្ទាប់ពីរបាយការណ៍របស់សារពត៌មានAP ប្រព័ន្ធផ្សព្វផ្សាយរបស់រដ្ឋក្នុងប្រទេសមីយ៉ាន់ម៉ា បានផ្សព្វផ្សាយរបាយការណ៍មួយបដិសេធនឹងរបាយការណ៍របស់សារពត៌មាន និងថាក្រុមមន្រ្តីបានទៅធ្វើទស្សនកិច្ចនៅក្នុងភូមិ Gu Dar Pyin ដើម្បីស៊ើបអង្កេតលើករណីនេះ។ កាលពីថ្ងៃទី៣ខែកុម្ភៈមានរបាយការណ៍មួយបានផ្សាយនៅក្នុងកម្មវិធី Global New Light of Myanmar ដោយបាននិយាយថាអ្នកភូមិរស់នៅទីនោះ «បាននិយាយម្តងហើយម្តងទៀតថាពួកគេមិនបានឭពីការសម្លាប់រង្គាលនេះទេ»៕
