ភ្ជាប់​ទៅ​គេហទំព័រ​ទាក់ទង

ជន​ដែលសង្ស័យ​ថា​ជា​អ្នក​សម្លាប់​សមាជិក​សភា​អង់គ្លេស​បង្ហាញ​ខ្លួន​នៅតុលាការ​លើក​ដំបូង


រូបភាព​របស់់​លោក​ស្រី​ Jo Cox ដែល​មា​ពេញ​ទៅ​ដោយ​ផ្កា​ ស្ថិត​នៅ​ខាង​ក្រៅ​អាគារ​រដ្ឋសភា​អង់គ្លេស​ក្នុង​ទីក្រុង​ឡុងដ៍ កាល​ពី​ថ្ងៃទី​១៧ ខែ​មិថុនា ឆ្នាំ២០១៦។

បុរស​ឈ្មោះ​ Thomas Mair ​ដែល​បាន​ត្រូវ​ចោទ​ប្រកាន់​ថា​បាន​សម្លាប់​លោកស្រី​ Jo Cox ​សមាជិកា​សភា​អង់គ្លេសកាល​ពី​កន្លង​ទៅ​ក្នុង​សប្តាហ៍​នេះ​ បាន​ចេញ​បង្ហាញ​ខ្លួន​ជា​លើក​ដំបូង​នៅ​ក្នុង​តុលាការ​កាល​ពី​ព្រឹក​ថ្ងៃ​សៅរ៍​ ក្រោយ​ពី​បាន​ត្រូវ​ចោទ​ប្រកាន់​ពី​បទ​មនុស្ស​ឃាត​និង​ប្រព្រឹត្ត​បទ​ឧក្រិដ្ឋកម្ម​មួយ​ចំនូន​ទៀត។​

នៅ​ពេល​ត្រូវ​សួរ​ឱ្យ​ប្រាប់​ឈ្មោះ​គាត់​ក្នុង​ពេល​ដំណើរការ​ជំរះ​ក្តីចាប់​ផ្តើម​ដែល​ធ្វើ​ឡើង​នៅ​ឯតុលាការ​ Westminster Magistrates ក្នុង​ក្រុង​ Londres ​ឈ្មោះ​ Mair បាន​និយាយ​ថា​«ឈ្មោះ​ខ្ញុំគឺ​ងាប់​ទៅ​ពួក​ក្បត់​ជាតិ!​ សេរីភាព​សម្រាប់​ប្រទេស​អង់គ្លេស» ​ដែល​ជា​ការ​និយាយ​បញ្ឆៀង​ដល់​ការ​បោះឆ្នោត​ប្រជាមតិ​នៅ​ពេល​ខាង​មុខ​នេះ​របស់ប្រទេស​អង់គ្លេស ដើម្បី​ចូល​ជា​សមាជិកភាព​នៅ​ក្នុង​សហភាព​អឺរ៉ុប។​ ការ​បញ្ចេញ​កំហឹង​យ៉ាង​ខ្លាំង​នេះ​ ជា​សម្តី​តែមួយ​គត់​របស់​គាត់​នៅ​ក្នុង​តុលាការ​កាល​ពីថ្ងៃ​សៅរ៍។​

លោកស្រី​ Cox ​ជា​អ្នក​គាំទ្រ​ម្នាក់​ដល់​ការ​រក្សា​ទុក​ប្រទេស​អង់គ្លេស​ឲ្យ​នៅ​ក្នុង​សហភាព​អឺរ៉ុប។

ពួក​ប៉ូលិស​ស៊ើបអង្កេត​នៅ​ក្នុង​ស្រុក​ Yorkshire​ របស់​លោក​ស្រី​ Cox ​ស្ថិត​នៅ​ក្នុង​ផ្នែកខាង​ជើង​នៃ​ប្រទេស​អង់គ្លេស​បាន​ប្រកែក​មិន​ព្រម​បញ្ជាក់​និង​មិន​បដិសេធ​ថា​ តើ​ជន​សង្ស័យ​រូប​នេះ​ ពិត​ជា​បាន​ធ្វើ​ឃាត​សមាជិកា​នៃ​សភា​អង់គ្លេស​អាយុ​៤១ឆ្នាំ​រូបនេះ​ដោយដោយសារ​មាន​ជំនឿ​ជាតិនិយម​ស្តាំ​ជ្រុល​ឬ​យ៉ាង​ណា​ទេ។

ពួក​អ្នក​ឃើញ​ហេតុការណ៍ផ្ទាល់​ភ្នែក​នៃ​ការ​វាយ​ប្រហារ​ដោយ​ឈ្មោះ​ Mair មាន​អាយុ​៥២ឆ្នាំ​ដែល​ជា​បុរស​មា្នក់​ក្នុង​មូលដ្ឋាន​ បាន​និយាយ​ថា​ បុរស​នេះ​បាន​ស្រែក​ជា​ភាសា​អង់គ្លេស​ថា​«Britain First»​ដែល​ប្រែ​ថា​«ប្រទេស​អង់គ្លេស​មុនគេ»​នៅ​ពេល​ដែល​គាត់​បាញ់​សមាជិកា​សភា​រូប​នេះ​បី​គ្រាប់​ ចាក់​លោក​ស្រី ហើយ​បន្ទាប់​មក​បាន​បោច​សក់​អូស​ទាញ​ស្ត្រី​មាន​កូន​ពីរ​នាក់​រូប​នេះ​ដែល​មាន​ឈាម​ហូរ​សស្រាក់។​

គណបក្ស Britain First ​ឬ​«ប្រទេស​អង់គ្លេស​មុនគេ»​ដែល​ជា​គណបក្ស​នយោបាយ​និយម​នយោបាយ​ស្តាំ​ជ្រុលតូច​មួយ​ដែល​បាន​ធ្វើ​យុទ្ធ​នាការ​ច្រើន​ឆ្នាំ​មក​ហើយ​បាន​ទាមទារ​ឱ្យ​ប្រទេស​អង់គ្លេស​ចាក​ចេញ​ពី​សហភាព​អឺរ៉ុប។ ប៉ុន្តែ​ពួក​គេ​និយាយ​ថា​ពួក​គេ​«គ្មាន​ការ​ទាក់​ទិន​អ្វី»​ជាមួយ​ការ​វាយ​ប្រហារ​លើ​សមាជិកា​សភា​លម្អៀង​ទៅ​ខាង​សហភាព​អឺរ៉ុប​រូបនេះ​ទេ​ ហើយ​ពួក​មេដឹកនាំ​នៃ​គណបក្ស​នេះ​បាន​ថ្កោល​ទោស​ការ​វាយ​ប្រហារ​នេះ​ហើយ៕

XS
SM
MD
LG