អតិថិជនរបស់ក្រុមហ៊ុនបុរីពិភពថ្មីជាង៣០នាក់បានចេញតវ៉ានៅថ្ងៃសុក្រនេះ ដើម្បីទាមទារឱ្យម្ចាស់ក្រុមហ៊ុនទទួលទិញផ្ទះរបស់ពួកគេវិញជាមួយនឹងទឹកប្រាក់៥០ភាគរយនៃប្រាក់បង់ប្រចាំខែឱ្យទៅក្រុមហ៊ុន។ ពួកគេក៏បានស្នើឱ្យស្ថាប័នពាក់ព័ន្ធរៀបចំជំនួបរវាងពលរដ្ឋ និងអ្នកឧកញ៉ា ហុង ពីវ ដើម្បីជជែករកដំណោះស្រាយ។
ក្រុមហ៊ុនបុរីពិភពថ្មី ដែលជារបស់អ្នកឧកញ៉ា ហុង ពីវ គឺជាក្រុមហ៊ុនដែលបណ្តាក់ទុនលើការសាងសង់គេហដ្ឋានរស់នៅ និងសម្រាប់ការធ្វើអាជីវកម្មដ៏ធំមួយនៅប្រទេសកម្ពុជា។ ក្រុមហ៊ុននេះមានគម្រោងសាងសង់ជាច្រើនក្នុង និងជាយទីក្រុងភ្នំពេញ។
នៅឯគម្រោងមួយស្ថិតនៅក្នុងខណ្ឌកំបូល រាជធានីភ្នំពេញ ប្រជាពលរដ្ឋដែលចូលរួមការតវ៉ា បានប្រាប់វីអូអេថា ពួកគាត់មិនអាចធ្វើទៅតាមគោលការណ៍ថ្មីមួយ ដែលកំណត់ដោយក្រុមហ៊ុនបុរីពិភពថ្មី ក្រោយជួបពិភាក្សាគ្នានៅក្រសួងរៀបចំដែនដី នគរូបនីយកម្ម និងសំណង់ឡើយ។
លោក ហេង តារា អាយុ៤៣ឆ្នាំ តំណាងឱ្យពលរដ្ឋដែលមកតវ៉ានៅមុខការិយាល័យលក់គម្រោងបុរីពិភពថ្មីកំបូល ប្រាប់វីអូអេថា អតិថិជនចង់ដឹងអំពីដំណោះស្រាយបន្ថែមទៀត និងទាមទារឱ្យបុរីពិភពថ្មីទិញផ្ទះពីអតិថិជនដែលប្រឈមបញ្ហាសេដ្ឋកិច្ចនិងចង់លក់ផ្ទះឱ្យបុរីវិញ ក្នុងទំហំទឹកប្រាក់៥០%នៃប្រាក់បង់ប្រចាំខែ និងប្រាក់ទម្លាក់ដើម ទៅតាមគោលការណ៍បុរីដែលធ្លាប់មាន។
លោកបញ្ជាក់ថា៖ «ប្រជាពលរដ្ឋទាមទារគោលការណ៍៥០% នៃប្រាក់បង់ប្រចាំខែ បើសិនប្រាក់បង់ប្រចាំខែ១.០០០ [ដុល្លារអាមេរិក] គឺទារ៥០០ [ដុល្លារអាមេរិក] បូកនឹងប្រាក់សងថែម ឬទម្លាក់ដើម»។
លោកបន្ថែមថា អតិថិជនដែលទិញបុរី មិនតិចជាង២០០នាក់នោះទេ ដែលកំពុងប្រឈមបញ្ហាមួយនេះ ហើយពួកគេចង់ជួបជាមួយឧកញ៉ា ហុង ពីវ ដែលជាម្ចាស់បុរី ដើម្បីជជែករកដំណោះស្រាយលើវិវាទដែលកើតមានជាងមួយឆ្នាំមកនេះ និងដើម្បីកុំឱ្យប៉ះពាល់សេដ្ឋកិច្ចរបស់អតិថិជន ក៏ដូចជាបុរីបន្តទៀត។
លោកថ្លែងថា៖ «ប្រជាពលរដ្ឋ រួមទាំងរូបខ្ញុំ គឺចង់បានខ្លាំងណាស់ ការណាត់ ឬការធ្វើលិខិតអញ្ជើញទៅដល់អ្នកឧកញ៉ា ហុង ពីវ ឬក៏ក្រុមហ៊ុនបុរីពិភពថ្មី ធ្វើការសម្រេចដោះស្រាយរួម ក្នុងតុចរចា ឬអង្គប្រជុំហ្នឹង។ ចង់បានខ្លាំង១០០%»។
ក្រោយការសម្របសម្រួលកាលពីថ្ងៃពុធនៅក្រសួងដែនដី ដោយមានវត្តមានរបស់រដ្ឋមន្ត្រីក្រសួងដែនដី លោក សាយ សំអាល់ ក្រុមហ៊ុនបុរីពិភពថ្មីបានចេញគោលការណ៍សម្របសម្រួលចំនួន៣ដល់អតិថិជនដែលបានបង់រម្លស់មានការយឺតយ៉ាវ ដូចជាអតិថិជនអាចបង់តែការប្រាក់រយៈពេល៣ឆ្នាំ ឬក៏អតិថិជនអាចប្តូររយៈពេលបង់រម្លស់រហូតដល់៣០ឆ្នាំ។
អតិថិជនម្នាក់ទៀត ដែលជាអតីតពលករធ្វើការនៅប្រទេសជប៉ុន លោក ជៀម សីហា អាយុ៣១ឆ្នាំ អះអាងថា លោកបានទិញផ្ទះបង់រម្លស់ជាមួយបុរីពិភពថ្មីកំបូល តាំងពីខែតុលា ឆ្នាំ២០២២ ដោយបង់ប្រាក់ប្រចាំខែចំនួន៦៤២ដុល្លារអាមេរិកនៃផ្ទះដែលលោកទិញ ពេលបុកគ្រឹះតម្លៃជាង៦ម៉ឺនដុល្លារអាមរិក។ នៅពេលលោកប្រឈមនឹងវិបត្តិហិរញ្ញវត្ថុ លោកសម្រេចថានឹងលក់ផ្ទះនោះវិញក្នុងទំហំទឹកប្រាក់៥០%ដែលលោកបង់រួច តែខាងភាគីក្រុមហ៊ុនថា មិនមានគោលការណ៍ទិញចូល ដែលធ្វើឱ្យលោកមិនទទួលបានលុយមកវិញសូម្បីតែ១០០រៀល។
លោកថ្លែងថា៖ «ខ្ញុំសោកស្តាយខ្លាំងបង ពីព្រោះកម្លាំងញើសឈាមដែលខ្ញុំខំរករាប់ឆ្នាំ ហើយដល់ពេលយើងបង់[រម្លស់]គេអស់ហើយ យើងសង្ឃឹមថាទិញបុរីហើយ ពេលដែលអស់សមត្ថភាពគេនឹងទិញចូលវិញ ដល់ពេលចុងក្រោយគាត់គន្លាស់ពាក់សន្យាខ្លួនឯងអ៊ីចឹង ហើយយើងត្រូវការលក់វិញបែរជាអត់មាន ហើយឱ្យចេញទាំងមិន[មាន]សំណង សូម្បី១០០លុយខ្មែរ ក៏អត់មានដែរ»។
អ្នកស្រី ជាង បញ្ញា អាយុ៣៥ឆ្នាំ អ្នកតវ៉ាម្នាក់ទៀតបានបដិសេធមិនយកគោលការណ៍ថ្មីរបស់ក្រុមហ៊ុនបុរីពិភពថ្មី ដែលបានជជែកជាមួយក្រសួងដែនដីដែលតម្រូវឱ្យម្ចាស់ផ្ទះទាំងអស់បង់តែការប្រាក់។ អ្នកស្រីថា អ្វីដែលអ្នកស្រីចង់បាននោះគឺសុំឱ្យបុរីទទួលទិញផ្ទះវិញក្នុងតម្លៃ៥០% នៃប្រាក់ដែលបានបង់។
អ្នកស្រីប្រាប់វីអូអេថា៖ «ពួកខ្ញុំអស់លទ្ធភាពគាត់[បុរី]គិតតែពីឱ្យពួកខ្ញុំបង់ ហើយឱ្យបន្តបង់ការប្រាក់ ហើយការប្រាក់គិតទៅ ក្នុងមួយខែដូចផ្ទះខ្ញុំ ៥៦៦ដុល្លារ គ្រាន់តែការប្រាក់៤០០ជាង ហើយឱ្យខ្ញុំបង់ការប្រាក់រយៈពេល៣ឆ្នាំ អញ្ចឹងបានន័យថា ម៉េចឱ្យខ្ញុំជំពាក់បុរីតរហូតហ្នឹង។ ហើយលុយដែលខ្ញុំខានបង់រយៈពេល១០ខែ បុរីឱ្យខ្ញុំជំពាក់រយៈពេល៣ឆ្នាំ។ អ៊ីចឹង៣ឆ្នាំទៀតខ្ញុំត្រូវសងគេគុណថែមទៀត អញ្ចឹងខ្ញុំអត់មានលទ្ធភាពទេ»។
អ្នកសារព័ត៌មានវីអូអេ បានចូលទៅក្នុងការិយាល័យលក់បុរីពិភពថ្មីកំបូល ដើម្បីសុំការបញ្ជាក់ តែបុគ្គលិកដែលមានវត្តមាននៅទីនោះ បដិសេធមិនផ្តល់ការអត្ថាធិប្បាយ។
ចាប់តាំងពីឆ្នាំ២០២៣ គម្រោងសាងសង់មួយចំនួនរបស់បុរីពិភពថ្មីបានប្រឈមនឹងការតវ៉ា ព្រោះអតិថិជនខ្លះ មិនមានប្រាក់បង់ ទាន់កាលកំណត់សម្រាប់ផ្ទះដែលពួកគេបានទិញ ដោយសារស្ថានភាពសេដ្ឋកិច្ចជាសាកលមិនទាន់អំណោយផល ហើយអតិថិជនទាំងនោះត្រូវបង្ខំចិត្តលក់ផ្ទះចេញវិញ។
ក្រុមហ៊ុនបានបដិសេធមិនទិញចូលវិញ ដោយលើកហេតុផលថា មិនមានចែងក្នុងកិច្ចសន្យា។ ប៉ុន្តែក្រោយមានការតវ៉ារបស់អតិថិជន ក្រុមហ៊ុនក៏ព្រមទទួលទិញ ទៅតាមលក្ខខណ្ឌកំណត់របស់ក្រុមហ៊ុន ពាក់ព័ន្ធនឹងការប្រាក់ និងប្រាក់សងដើមដែលបានបង់រួច។
វីអូអេមិនទាន់អាចសុំការអត្ថាធិប្បាយពីអ្នកឧកញ៉ា ហុង ពីវ ម្ចាស់ក្រុមហ៊ុនបុរីពិភពថ្មី និងអ្នកនាំពាក្យក្រសួងដែនដី នគរូបនីយកម្ម និងសំណង់លោក សេង ឡូត បានទេនៅថ្ងៃសុក្រនេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ យល់ថា ដើម្បីដោះស្រាយបញ្ហាមួយនេះ លុះត្រាតែភាគីក្រុមហ៊ុន ភាគីអតិថិជន រួមទាំងមេធាវីទាំងសងខាង ដាក់បញ្ហាលើតុ ដើម្បីជជែករកដំណោះស្រាយរួមគ្នា នៅចំពោះមុខអាជ្ញាធរមានសមត្ថកិច្ច ហើយអាជ្ញាធរត្រូវប្រកាន់ខ្ជាប់គោលជំហរអព្យាក្រឹតភាពផងដែរ។
លោកបន្ថែមថា ប្រសិនបើភាគីទាំងអស់ មិនដាក់បញ្ហាលើតុដើម្បីជជែករកដំណោះស្រាយនោះទេ នោះបញ្ហានេះ នឹងនៅតែអូសបន្លាយ ហើយរីករាលដាលបន្ថែមទៀត ដែលធ្វើឱ្យប៉ះពាល់សេដ្ឋកិច្ចទាំងក្រុមហ៊ុន និងពលរដ្ឋទាំងនោះ។ ម្យ៉ាងទៀត លោកថា បើបញ្ហានេះមិនអាចដោះស្រាយបាន នោះវាក៏អាចក្លាយជាមេរៀនមួយ ធ្វើឱ្យពលរដ្ឋខ្លាចរអាក្នុងការទិញបុរី ឬទិញអចលនទ្រព្យផ្សេងៗនាពេលអនាគតផងដែរ៕
វេទិកាបញ្ចេញមតិ