ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បញ្ហា​ព្រំដែន​ជា​ប្រធានបទចម្បង​នៃ​សន្និសីទ​សារព័ត៌មាន​ដំបូង​របស់​លោក​ Biden


ប្រធានាធិបតីសហរដ្ឋអាមេរិកលោក Joe Biden ថ្លែងនៅក្នុងសន្និសីទសារព័ត៌មានមួយ នៅសេតវិមាន កាលពីថ្ងៃទី ២៥ ខែមីនា ឆ្នាំ ២០២១។

ប្រធានាធិបតី​សហ​រដ្ឋ​អាមេរិក​លោក Joe Biden បាន​ទទួល​សំណួរ​ពីអ្នក​សារព័ត៌មាន​អស់​រយៈ ពេល​មួយ​ម៉ោង​ កាលពី​ថ្ងៃ​ព្រហស្បតិ៍​ម្សិលមិញ​ ក្នុង​សន្និសីទ​សារ​ព័ត៌មាន​ផ្លូវការ​លើក​ដំបូង​របស់​លោក ​ដែល​មួយ​ផ្នែក​គឺ​ដើម្បី​បដិសេធ​អ្នក​រិះគន់​អភិរក្ស​និយម​ដែល​បាន​ព្យាករណ៍​ថា​ លោក​ដែល​ជា​ប្រធានាធិបតី​ចំណាស់​ជាងគេ​បំផុត​ នឹង​មិន​អាច​បំពេញ​ភារកិច្ច​បាន​នោះ។

បន្ទាប់ពី​ការ​ថ្លែង​កត់​សម្គាល់​ខ្លីៗ​អំពី​ការ​ឆ្លើយតប​របស់​រដ្ឋបាល​របស់​លោក ​ចំពោះការរាតត្បាតរបស់​វីរុស​កូរ៉ូណា​ដែលបង្កជាជំងឺកូវីដ១៩ លោក ​Biden ​បាន​ឆ្លើយតប​ទៅនឹង​សំណួររបស់​អ្នក​យក​ព័ត៌មាន​ចំនួន​ ១០​ នាក់ ដោយ​ហៅ​ឈ្មោះ​របស់ពួក​គេ​ក្នុង​បញ្ជី​របស់​លោក។

នៅ​ថ្ងៃទី​ ៦៥ នៃការ​កាន់​តំណែង​របស់​លោក​ លោក​ Biden បាន​ប្រឈមនឹងសំណួរ​ភាគ​ច្រើន ទាក់ទង​នឹង​បញ្ហាអន្តោ​ប្រវេសន៍​ ជាពិសេស​អំពី​ចំណាត់​ការ​របស់​រដ្ឋាភិបាល​ទៅលើ​ជន​ចំណាក​ស្រុក​ដែលជាកុមារ​នៅ​តាម​ព្រំដែន។

ចំពោះ​បញ្ហា​ក្នុងស្រុក​ជាទូទៅ​ លោក​ឆ្លើយ​ដោយ​មិន​ព្រាង​ទុក ប៉ុន្តែបញ្ហា​គោល​នយោបាយ​ការបរទេស​ដ៏​រសើប ​រួមទាំង​បញ្ហា​ទាក់ទង​នឹង​ប្រទេស​អាហ្វហ្គានីស្ថាន ​និង​ចិន ​លោក​ហាក់​ដូច​ជាឆ្លើយ​តាម​ក្រដាស​របស់​លោក។​

លោក Biden បានផ្តល់​ព័ត៌មាន​ខ្លះ​ក្នុងការ​ឆ្លើយតប​នឹង​សំណួរ​អំពី​ការ​បោះឆ្នោត​ប្រធានាធិបតី​អាណត្តិថ្មី ​ក្នុង​ពេល​ជាង​បីឆ្នាំ​ខាង​មុខ​ ដោយ​និយាយ​ថា លោកពិត​ជាមាន​បំណង​ឈរ​ឈ្មោះបោះ​ឆ្នោត​ម្តង​ទៀត​ នៅ​ឆ្នាំ​ ២០២៤។ លោក​បាន​និយាយ​ថា​ លោក​គ្មាន​យោបល់​អ្វីនោះ​ទេ​ ប្រសិន​បើ​គណបក្ស​សាធារណរដ្ឋ​ដែល​ប្រឈម​មុខ​នឹង​ភាព​ច្របូក​ច្របល់​ផ្ទៃ​ក្នុង​ នៅ​តែ​មាន​សភាព​បែប​នេះ​រហូត​ដល់​នៅ​ពេល​នោះ។​

ឆ្លើយ​តប​ទៅនឹង​សំណួរ​អំពី​ការ​ជំរុញ​របស់​គណបក្ស​សាធារណ​រដ្ឋ​ឲ្យ​មាន​វិធានការ​រឹតបន្តឹងដំណើរ​ការបោះឆ្នោត លោក ​Biden បាន​និយាយ​ថា៖ «អ្វីដែល​ខ្ញុំព្រួយ​បារម្ភ​ គឺ​ថា ​គំនិត​ផ្តួច​ផ្តើម​ទាំងមូល​នេះដែល​មិន​មាន​លក្ខណៈ​តំណាងឲ្យពលរដ្ឋអាមេរិកាំង «ជា​ជំងឺ​យ៉ាង​ធ្ងន់ធ្ងរ»៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG