ថ្ងៃសុក្រនេះ គឺជាថ្ងៃបញ្ចប់នៃព្រះរាជពិធីបុណ្យអុំទូក ដែលមានរយៈពេលបីថ្ងៃ ក៏ប៉ុន្តែ កីឡាករអុំទូកមិនចង់ឲ្យពិធីនេះបានបញ្ចប់ទេ ដោយសារតែពួកគេបានអះអាងថា នៅក្នុងរយៈពេលបីថ្ងៃនេះបានទទួលការហូបចុកគ្រប់គ្រាន់ ហើយប្រាក់ឧបត្ថម្ភពីសប្បុរសជន និងអ្នកកាន់ទូកក៏បានច្រើនក្រាស់ក្រែលដែរ។
នៅពេលពិធីបុណ្យអុំទូកបានបិទបញ្ចប់ភ្លាមប្រាក់ឧបត្ថម្ភដែលគេធ្លាប់ទទួលបានពេលចូលរួមប្រកួតក៏លែងទទួលបាន ដូចពីមុនទៀតដែរ។
ក្រុមកីឡាករដែលធ្លាប់ចូលរួមអុំទូកមួយចំនួនធំបានវិលត្រឡប់ទៅប្រកបការងារប្រចាំថ្ងៃវិញ ហើយភាគច្រើនជាអ្នកធ្វើស្រែចម្ការ មិនមានការងារគាប់ប្រសើរទេ និងជាមន្ត្រីមានមុខមាត់ ដូចអ្នកកាន់ទូក និងអ្នកឧបត្ថម្ភទូកទេ។
លោកវ៉ាន់ វ៉េតបានចុះពីលើទូកដែលមានកីឡាករអុំទូកចំនួន២២នាក់។ លោកបានសម្តែងការរីករាយនៅពេលដែលទូករបស់លោកបានអុំឈ្នះគូប្រកួត។ លោកបាននិយាយថា នៅពេលជាកីឡាករអុំទូក គេទទួលបានប្រាក់ឧបត្ថម្ភមិនខ្វះទេសម្រាប់ក្រុមកីឡាករ ទាំងការហូបចុក និងសោហ៊ុយសម្រាប់ដើរលេងក្នុងពិធីបុណ្យអុំទូក។
លោកមានប្រសាសន៍ថា នៅពេលដែលការប្រកួតបានបញ្ចប់ លោកបានវិលត្រឡប់ទៅស្រុកកំណើតវិញដើម្បីប្រកបការងារជាអ្នកធ្វើស្រែចម្ការវិញ ហើយប្រាក់ឧបត្ថម្ភក៏មិនដែលបានទទួលទៀតដែរគឺលោកទទួលបានតែក្នុងពេលមកចូលរួមប្រកួតតែប៉ុណ្ណោះ។
លោកនិយាយថា៖ «អត់»
វីអូអេ៖ «អញ្ចឹងគេឧបត្ថម្ភតែបុណ្យអុំទូកហ្នឹងទេ?»
កីឡាករអុំទូក៖ «បាទៗ»។
វីអូអេ៖ «ចុះជីវភាពយើងវាពិបាកយ៉ាងម៉េចដែរ បើមិនឧបត្ថម្ភ?»
កីឡាករអុំទូក៖ «ជីវភាពពួកខ្ញុំពិបាកតែម្តង»។
លោកហ៊ុល គឹមហួត កីឡាករអុំទូកមកពីខេត្តក្រចេះ បានបញ្ជាក់ថា ក្រុមកីឡាករអុំទូកនៅក្នុងភូមិរបស់លោកភាគច្រើន ក្រោយពីបញ្ចប់បុណ្យអុំទូក បានវិលត្រឡប់ធ្វើស្រែចម្ការដើម្បីចិញ្ចឹមជីវិត ពីព្រោះប្រាក់ឧបត្ថម្ភលែងទទួលបានទៀតហើយពីអ្នកគ្រប់គ្រងទូក។
លោកនិយាយថា៖ «ពីព្រោះនិយាយទៅ មុខរបរ មិនមានមុខរបរអ្វីក្រៅពីហ្នឹងទេខ្ញុំ ពីព្រោះយើងអត់មានចំណេះវិជ្ជាអ្វីខ្ពង់ខ្ពស់នឹងគេ ហើយបើយើងមិនធ្វើទេ ជីវភាពយើងមិនអាចទៅរួចនឹងគេទេ។ បាទនៅភូមិខ្ញុំ អញ្ចឹងគ្រប់គ្នា»។
នៅតាមកញ្ចក់ទូរទស្សន៍ក្នុងស្រុកមានការផ្សាយបន្តផ្ទាល់ស្ទើរតែមិនដាច់អំពីប្រាក់ឧបត្ថម្ភដល់កីឡាករអុំទូក ដោយមន្ត្រីជាន់ខ្ពស់ និងអ្នកឧកញ៉ាដែលមានប្រាក់សន្ធឹកសន្ធាប់។ ក៏ប៉ុន្តែកម្មវិធីទូរទស្សន៍នេះមិនដែលប្រកាសការផ្តល់ប្រាក់ឧបត្ថម្ភទៀតទេដល់កីឡាករ នៅពេលពិធីបុណ្យបានបញ្ចប់។
កីឡាការិនីមួយរូបមកពីខេត្តកំពង់ឆ្នាំបានប្រាប់វីអូអេថា៖ «ធ្វើស្រែចម្ការ»។
វីអូអេ៖ «ក្រោយពីអុំទូក ទៅធ្វើស្រែចម្ការ បានទទួលប្រាក់ឧបត្ថម្ភទៀតទេ?»។
កីឡាការិនី៖ «អត់ទេ»។
វីអូអេ៖«មូលហេតុអ្វីបានអត់»។
កីឡាការិនី៖ «ដឹងអី អត់ដឹងដែរ»។
បើតាមគណៈកម្មាធិការជាតិរៀបចំពិធីបុណ្យជាតិ និងអន្តរជាតិបានឲ្យដឹងថា ចំនួនទូកដែលបានចូលរួមប្រកួតឆ្នាំនេះមានចំនួន២៤៥ទូក ក្នុងនោះមានទូកអន្តរជាតិចំនួន៤៩ទូក។ ចំនួននេះបានថយចុះជាងពាក់កណ្តាល បើប្រៀបធៀបទៅនឹងពេលមុនមានព្រឹត្តិការណ៍រត់ជាន់គ្នានៅលើស្ពានពេជ្រនៃមជ្ឈមណ្ឌលកម្សាន្តកោះពេជ្រកាលពីឆ្នាំ២០១០។
ក្រោយពីបានប្រកួតអស់រយៈពេលបីថ្ងៃកន្លងទៅនេះ បើតាមការឲ្យដឹងពីលោកប៊ូ ជុំសេរី អនុរដ្ឋលេខាធិការក្រសួងអប់រំ ទទួលបន្ទុកគណៈកម្មការបច្ចេកទេសនិងជាប្រធានគណៈមេប្រយោគនៃពិធីបុណ្យអុំទូក មានប្រសាសន៍ថា មានទូកពិសេសដែលបានអុំលឿនជាងគេមានបីទូក និងទូកដែលមានសោភ័ណ្ឌល្អជាងគេមានបួនទូកក្នុងចំណោមទូកដែលបានចូលរួមប្រកួត។
លោកបានបញ្ជាក់ថា កីឡាករដែលបានចូលរួមប្រកួតអុំទូកឆ្នាំនេះមានចំនួន១៧៤២១នាក់។
លោកនិយាយថា៖ «ផែនលេខពីរមានចំនួន៤៨ទូក ផែនលេខបីមានចំនួន៣២ទូក ហើយផែនលេខ៤មានចំនួន១៦ទូក។ ទូកចែវនារីផែនលេខមួយមានចំនួន១ទូក ផែនលេខពីរមានចំនួន១ទូក»។
លោកឡុង ឌីម៉ង់ អ្នកនាំពាក្យសាលាក្រុងភ្នំពេញ បានវាយតម្លៃថា ក្នុងរយៈពេលបីថ្ងៃនៃព្រះរាជពិធីបុណ្យអុំទូកកន្លងទៅនេះ ស្ថានភាពសន្តិសុខបានប្រព្រឹត្តទៅយ៉ាងល្អ ហើយនៅថ្ងៃចុងបញ្ចប់នេះលោករំពឹងថា នឹងមានមនុស្សជាង១លាននាក់បានមកទស្សនាបុណ្យអុំទូក៕
