រដ្ឋមន្ត្រីការបរទេសសហរដ្ឋអាមេរិកលោក Antony Blinken កំពុងធ្វើដំណើរទៅកាន់ប្រទេសកាតាដែលលោកក៏នឹងធ្វើដំណើរទៅកាន់ប្រទេសអាល្លឺម៉ង់ដែរ ដើម្បីពិភាក្សាជាមួយសម្ព័ន្ធមិត្តដ៏សំខាន់របស់សហរដ្ឋអាមេរិកស្តីពីស្ថានភាពនៅប្រទេសអាហ្វហ្គានីស្ថាន។
លោក Blinken បានបញ្ជូនសារតាម Twitter កាលពីថ្ងៃអាទិត្យថា «ខ្ញុំទៅទីក្រុងដូហា ប្រទេសកាតា និងទីក្រុង Ramstein ប្រទេសអាល្លឺម៉ង់ ជាទីកន្លែងដែលខ្ញុំនឹងមានឱកាសថ្លែងអំណរគុណដោយផ្ទាល់ដល់មិត្តភក្តិកាតា និងអាល្លឺម៉ង់របស់យើងចំពោះការគាំទ្រដ៏អស្ចារ្សដែលពួកគេ ដែលបានអនុញ្ញាតឲ្យពលរដ្ឋអាមេរិកាំង អាហ្វហ្គានីស្ថាន និងអ្នកផ្សេងទៀតឆ្លងកាត់ប្រកបដោយសុវត្ថិភាពចេញពីប្រទេសអាហ្វហ្គានីស្ថាន»។
កាតាជាកន្លែងដ៏សំខាន់មួយសម្រាប់ការដឹកជញ្ជូនតាមអាកាសដ៏ធំមួយរបស់សហរដ្ឋអាមេរិកចេញពីរដ្ឋធានីកាប៊ុល និងជាកន្លែងចុះចតលើកដំបូងរបស់ជនភៀសខ្លួនអាហ្វហ្គានីស្ថានរាប់ម៉ឺននាក់ បន្ទាប់ពីការកាន់កាប់របស់ក្រុមតាលីបង់កាលពីខែមុន។
រដ្ឋមន្ត្រីការពារប្រទេសសហរដ្ឋអាមេរិកលោក Lloyd Austin ក៏កំពុងទៅបំពេញទស្សនកិច្ចសម្ព័ន្ធមិត្តរបស់សហរដ្ឋអាមេរិកនៅតំបន់មជ្ឈិមបូព៌ាដែរដើម្បីថ្លែងអំណរគុណចំពោះប្រទេសទាំងនោះដែលបានជួយការជម្លៀសចេញពីប្រទេសអាហ្វហ្គានីស្ថាន ជួយកងទ័ពសហរដ្ឋអាមេរិក។ កន្លែងដែលលោកទៅរួមមាននៅប្រទេសកាតា បារ៉ែន កូវ៉ែត និងប្រទេសអារ៉ាប់ប៊ីសាអូឌីតផងដែរ។
លោក Blinken បានប្រាប់ក្រុមអ្នកយកព័ត៌មានកាលពីថ្ងៃសុក្រសប្តាហ៍មុនថា នៅក្នុងប្រទេសអាល្លឺម៉ង់ លោកនឹងធ្វើដំណើរទៅកាន់មូលដ្នានកងទ័ពអាកាសសហរដ្ឋអាមេរិកនៅទីក្រុង Ramstein ដើម្បីអរគុណកងទ័ពសហរដ្ឋអាមេរិក ហើយនឹងជួបជាមួយជនភៀសខ្លួនអាហ្វហ្គានីស្ថាន។
លោក Blinken ក៏បាននិយាយដែរថា លោក និងរដ្ឋមន្ត្រីការបរទេសអាល្លឺម៉ង់លោក Heiko Maas នឹងដឹកនាំជំនួបតាមអនឡាញថ្នាក់រដ្ឋមន្ត្រីដែលមានប្រទេស២០ ចូលរួមស្តីពីប្រទេសអាហ្វហ្គានីស្ថាននៅថ្ងៃពុធ។ លោកបាននិយាយទៀតថា ប្រទេសទាំង២០ នោះ មានចំណែកនៅក្នុងការជួយតាំងទីលំនៅរបស់ពលរដ្ឋអាហ្វហ្គានីស្ថាន ហើយឲ្យក្រុមតាលីបង់ធ្វើតាមការតាំងចិត្តរបស់ពួកគេ។
ក្រុមតាលីបង់បានសន្យាថា នឹងអនុញ្ញាតឱ្យពលរដ្ឋអាហ្វហ្គានីស្ថាន និងពលរដ្ឋផ្សេងទៀតចាកចេញដោយសុវត្ថិភាព ក៏ប៉ុន្តែពលរដ្ឋអាហ្វហ្គានីស្ថានជាច្រើនសង្ស័យការសន្យារបស់ពួកគេ៕
លោក Chris Hannas រួមចំណែកក្នុងសេចក្តីរាយការណ៍នេះ។
