ពលរដ្ឋអាមេរិកពេញវ័យជាងពាក់កណ្តាល ដែលស្មើនឹង ៥៤% ជឿថា ការសម្រេចដកកងទ័ពអាមេរិកចេញពីប្រទេសអាហ្វហ្គានីស្ថាន បន្ទាប់ពីសង្គ្រាមរយៈពេល ២០ ឆ្នាំ គឺជាការសម្រេចដ៏ «ត្រឹមត្រូវ»។ នេះបើយោងតាមទិន្នន័យរបស់មជ្ឈមណ្ឌល Pew សម្រាប់ការស្រាវជ្រាវ (Pew Research Center)។
ចំណែកឯពលរដ្ឋអាមេរិកពេញវ័យប្រមាណ ៤២% ដែលត្រូវបានស្ទង់មតិវិញ បាននិយាយថា ការសម្រេចដកកងទ័ពនេះគឺ «មិនត្រឹមត្រូវ»។
ការស្ទង់មតិនេះបានធ្វើឡើងពីថ្ងៃទី ២៣ ដល់ថ្ងៃទី ២៩ ខែសីហា មុនពេលសហរដ្ឋអាមេរិកបញ្ចប់ការដកកងទ័ពចេញពីអាហ្វហ្គានីស្ថាន។
អ្នកចូលរួមនៅក្នុងការស្ទង់មតិនេះចំនួន ៦៩% បាននិយាយថា សហរដ្ឋអាមេរិកភាគច្រើនមិនបានសម្រេចគោលដៅរបស់ខ្លួននៅអាហ្វហ្គានីស្ថាននោះទេ។
អ្នកចូលរួមនៅក្នុងការស្ទង់មតិនេះប្រហែលមួយភាគបួន ដែលស្មើនឹង ២៦% បានបញ្ជាក់ថា រដ្ឋបាលរបស់លោកប្រធានាធិបតី Joe Biden ធ្វើការបាន «ល្អប្រសើរ» ឬ «ល្អ» ក្នុង «ការដោះស្រាយស្ថានការណ៍នៅអាហ្វហ្គានីស្ថាន»។ ចំណែកឯអ្នកចូលរួមចំនួន ២៩% វិញ បាននិយាយថា រដ្ឋបាលនេះបានបំពេញការងារនេះបាន «ល្អគួរសម» ហើយ ៤២% ទៀតថា ធ្វើមិនបានល្អ៕
ព័ត៌មាននៅក្នុងសេចក្ដីរាយការណ៍នេះ ដកស្រង់ពីព័ត៌មានរបស់ទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
