រដ្ឋមន្ត្រីការបរទេសសហរដ្ឋអាមេរិកលោក Antony Blinken មានគម្រោងជួបពិភាក្សានៅថ្ងៃព្រហស្បតិ៍នេះជាមួយរដ្ឋមន្ត្រីការបរទេសរុស្ស៊ីលោក Sergey Lavrov ស្របពេលមានក្ដីបារម្ភអំពីការបង្កើនកម្លាំងកងទ័ពនៅតាមបណ្ដោយព្រំដែនរវាងប្រទេសរុស្ស៊ីនិងអ៊ុយក្រែន និងការអំពាវនាវឲ្យមានដំណោះស្រាយការទូតចំពោះភាពតានតឹងនេះ។
ជំនួបនេះ នឹងធ្វើឡើងនៅក្រៅកិច្ចប្រជុំថ្នាក់រដ្ឋមន្ត្រីរបស់អង្គការសន្តិសុខនិងកិច្ចសហប្រតិបត្តិការអឺរ៉ុប (OSCE) ដែលធ្វើឡើងនៅក្នុងទីក្រុងស្តុកខុល ប្រទេសស៊ុយអែត។
មុនពេលជំនួបជាមួយលោក Lavrov ចូលមកដល់ លោក Blinken បានជួបពិភាក្សាជាមួយរដ្ឋមន្ត្រីការបរទេសអ៊ុយក្រែនលោក Dmytro Kuleba នៅថ្ងៃព្រហស្បតិ៍នេះ ដោយបានបង្ហាញក្ដីបារម្ភអំពីអ្វីដែលលោកហៅថាជា «ជំហរដ៏គឃ្លើន» របស់រុស្ស៊ីចំពោះអ៊ុយក្រែន។
លោក Kuleba បាននិយាយថា អ៊ុយក្រែននឹង «បន្តបង្ហាញការអត់ធ្មត់» ហើយស្របពេលនោះដែរនឹងអំពាវនាវដល់សម្ព័ន្ធមិត្តឲ្យត្រៀមចាត់វិធានការដែលធ្វើឲ្យប្រធានាធិបតីរុស្ស៊ីលោក Vladimir Putin «គិតឡើងវិញមុនពេលឈានដល់ការប្រើកម្លាំងយោធា»។
បន្ទាប់ពីបានចូលរួមក្នុងកិច្ចប្រជុំរបស់អង្គការអូតង់ (NATO) កាលពីថ្ងៃពុធម្សិលមិញមក លោក Blinken បានបញ្ជាក់ថា វិធានការដូចនេះអាចរួមបញ្ចូលផងដែរនូវ «វិធានការសេដ្ឋកិច្ចដែលជះផលប៉ះពាល់ខ្លាំងមួយចំនួន ដែលយើងមិនបានប្រើក្នុងពេលកន្លងមក»។
លោក Blinken បានបន្ថែមថា ប្រទេសរុស្ស៊ីនឹងប្រឈមនឹង «ផលវិបាកធ្ងន់ធ្ងររយៈពេលយូរ» សម្រាប់ភាពគឃ្លើនរបស់ខ្លួនដែលធ្វើលើប្រទេសអ៊ុយក្រែន ហើយថា «ការទូតគឺជាវិធីតែមួយគត់ ដែលអាចដោះស្រាយវិបត្តិនេះបាន»។
មន្ត្រីជាន់ខ្ពស់ក្រសួងការបរទេសអាមេរិកមួយរូបបានប្រាប់ក្រុមអ្នកសារព័ត៌មានថា លោក Blinken នឹងលើកបញ្ជាក់នូវចំណុចទាំងនេះដោយផ្ទាល់ជាមួយរដ្ឋមន្ត្រីការបរទេសរុស្ស៊ីលោក Sergey Lavrov នៅថ្ងៃព្រហស្បតិ៍នេះ៕
ព័ត៌មានខ្លះនៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន Associated Press និងទីភ្នាក់ងារព័ត៌មាន Reuters។
