ក្រុមរដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន បានថ្កោលទោសជាថ្មីម្តងទៀតចំពោះអំពើហិង្សាដែលកំពុងបន្តកើតឡើងនៅក្នុងប្រទេសមីយ៉ាន់ម៉ា ដែលបង្កឡើងដោយការបង្ក្រាបដ៏បង្ហូរឈាមរបស់របបយោធាលើគូប្រជែងដែលគាំទ្រលទ្ធិប្រជាធិបតេយ្យ។
នៅក្នុងកិច្ចប្រជុំកំពូលមួយក្នុងទីក្រុងហ្សាការតានៃប្រទេសឥណ្ឌូណេស៊ី រដ្ឋមន្ត្រីការបរទេសសហរដ្ឋអាមេរិក លោក Antony Blinken បានស្វែងរកការគាំទ្រក្នុងចំណោមសម្ព័ន្ធមិត្ត ដើម្បីប្រឆាំងនឹងការគាំទ្ររបស់ចិនចំពោះរបបយោធា និងការឈ្លានពានរបស់រដ្ឋាភិបាលក្រុងប៉េកាំង នៅក្នុងតំបន់សមុទ្រចិនខាងត្បូង។
លោក Antony Blinken បានសង្កត់ធ្ងន់ថា សហរដ្ឋអាមេរិកមានចក្ខុវិស័យដូចនឹងសមាជិកអាស៊ានចំពោះតំបន់ឥណ្ឌូប៉ាស៊ីហ្វិកសេរី បើកចំហ រុងរឿង សុវត្ថិភាព ដែលមានការតភ្ជាប់គ្នា និងភាពធន់នឹងវិបត្តិ។
ប៉ុន្តែ ប្រទេសមីយ៉ាន់ម៉ាត្រូវបានហាមឃាត់មិនឱ្យចូលរួមក្នុងកិច្ចប្រជុំអាស៊ាននេះ ដោយសារតែរបបយោធាមិនបានគោរពតាមកិច្ចព្រមព្រៀងដែលមានអាយុកាល ២ ឆ្នាំ ដើម្បីបញ្ឈប់អំពើហិង្សាដែលបង្កឡើងដោយរដ្ឋប្រហារយោធាកាលពីឆ្នាំ ២០២១។ លោក Blinken បានថ្លែងយ៉ាងដូច្នេះចំពោះបញ្ហាដែលបង្កឡើងដោយប្រទេសមីយ៉ាន់ម៉ា និងកូរ៉េខាងជើង។
លោក Antony Blinken ថ្លែងថា៖ «ដោយសាររបបយោធាមីយ៉ាន់ម៉ាបន្តប្រព្រឹត្តអំពើឃោរឃៅ និងធ្វើឱ្យខូចដល់ស្ថិរភាពក្នុងតំបន់ មានការគាំទ្រយ៉ាងច្រើនក្នុងកិច្ចប្រជុំថ្ងៃនេះក្នុងការបន្តដាក់សម្ពាធលើរបបនេះឱ្យបញ្ចប់អំពើហិង្សា និងឱ្យគោរពតាមការប្តេជ្ញាចិត្តក្រោមកិច្ចព្រមព្រៀងជាឯកច្ឆន្ទទាំង ៥ ចំណុចរបស់អាស៊ាន។ អាវុធប្រល័យលោកនិងកម្មវិធីមីស៊ីលផ្លោងខុសច្បាប់របស់កូរ៉េខាងជើង ក៏គំរាមកំហែងដល់តំបន់ និងរបបប្រឆាំងការរីកសាយភាយជាសកលផងដែរ»។
ក្រុមអ្នកជំនាញថា វិបត្តិមីយ៉ាន់ម៉ាធ្វើតេស្តលើការរួបរួមគ្នារបស់អាស៊ាន ដោយសមាជិកជាប្រទេសនៅជាប់សមុទ្រទំនងជាមានជំហរតឹងរ៉ឹងលើរបបយោធា ជាងប្រទេសដីគោក ដូចជាប្រទេសថៃជាដើម។
អ្នកជំនាញម្នាក់ប្រាប់ VOA ថា ចិនបានជំរុញយ៉ាងខ្លាំងឱ្យប្រទេសដីគោកជិតខាងរបស់ខ្លួនមានទំនាក់ទំនងជាមួយ និងទទួលយករបបយោធាមីយ៉ាន់ម៉ា។
លោក Jason Tower នាយកវិទ្យាស្ថានសន្តិភាពសហរដ្ឋអាមេរិកប្រចាំនៅមីយ៉ាន់ម៉ា ថ្លែងប្រាប់វីអូអេតាមបណ្តាញ Zoom ថា៖ «ខ្ញុំគិតថា តួនាទីដ៏ធំមួយគឺកម្រិតនៃឥទ្ធិពលដែលចិនមានជាមួយប្រទេសជិតខាងខ្លួនជាច្រើន និងការព្យាយាមធ្វើឱ្យយោធា [មីយ៉ាន់ម៉ា] កាន់តែមានភាពរឹងមាំឡើងវិញ និងជំរុញឱ្យប្រទេសជិតខាងដើរតាមគន្លងរបស់ខ្លួន ក្នុងការផ្តល់ភាពស្របច្បាប់ផ្នែកនយោបាយដល់យោធា ធ្វើទំនាក់ទំនងជាមួយយោធា និងធ្វើជំនួញជាមួយយោធាជាដើម»។
លោករដ្ឋមន្ត្រីការបរទេស Blinken បានថ្លែអថា លោកបានសន្ទនាប្រកបដោយភាពស្មោះត្រង់និងស្ថាបនាជាមួយអ្នកការទូតកំពូលរបស់ចិន លោក Wang Yi លើបញ្ហាជាច្រើន រួមទាំងសង្គ្រាមឈ្លានពានរបស់រុស្ស៊ីប្រឆាំងនឹងអ៊ុយក្រែន និងទំនាក់ទំនងនៅដៃសមុទ្រតៃវ៉ាន់។
ប៉ុន្តែលោកបានថ្លែងយ៉ាងដូច្នេះអំពីរដ្ឋមន្ត្រីការបរទេសរុស្ស៊ី លោក Sergey Lavrov។
លោកថ្លែងថា៖ «ខ្ញុំគិតថា វាសមស្របក្នុងការលើកឡើងថា ផ្អែកលើអ្វីដែលយើងបានឮពីលោករដ្ឋមន្ត្រីការបរទេស Lavrov នៅថ្ងៃនេះ ការអន្តរាគមន៍ និងការចូលរួមរបស់លោកមិនមានលក្ខណៈស្ថាបនា ឬផ្តល់ផ្លែផ្កាលើបញ្ហាណាមួយនោះទេ។ មិនដូចសហរដ្ឋអាមេរិក និងប្រទេសដទៃទៀត លោកបានផ្តោតការយកចិត្តទុកដាក់លើការបង្ហាញ និងរបៀបវារៈអវិជ្ជមានទាំងស្រុង ដែលលោកបានចាត់ទុកថា រាល់បញ្ហាទាំងអស់នៅក្នុងពិភពលោកបង្កឡើងដោយសហរដ្ឋអាមេរិក»។
លោក Blinken បានថ្លែងថា គ្មានសញ្ញាណាមួយបង្ហាញថា រុស្ស៊ីមានឆន្ទៈក្នុងការធ្វើទំនាក់ទំនងការទូតប្រកបដោយអត្ថន័យ ដើម្បីបញ្ចប់សង្គ្រាមដ៏មិនសមហេតុផលរបស់ខ្លួននៅអ៊ុយក្រែននោះទេ៕
