រដ្ឋមន្ត្រីការបរទេសសហរដ្ឋអាមេរិកលោក Antony Blinken មានគម្រោងជួបនៅថ្ងៃព្រហស្បតិ៍នេះជាមួយលោក Wang Yi អ្នកការទូតកំពូលរបស់ចិននៅខាងក្រៅការចរ ចារបស់សមាគមប្រជាជាតិអាស៊ីអាគ្នេយ៍ឬអាស៊ាននៅក្នុងប្រទេសឥណ្ឌូនេស៊ី។
លោក Blinken និងលោក Wang បានជួបគ្នាកាលពីខែមុននៅក្នុងរដ្ឋធានីប៉េកាំងដែលជាផ្នែកមួយនៃកិច្ចខំប្រឹងប្រែងដោយរដ្ឋបាលរបស់លោក Biden ដើម្បីធ្វើឱ្យមានការធូរស្រាលដល់ទំនាក់ទំនងរវាងមហាអំណាចទាំង២។
រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកលោកស្រី Janet Yellin បានទៅបំពេញទស្សនកិច្ចទីក្រុងប៉េកាំងបន្ទាប់ពីលោក Blinekn កាលពីសប្តាហ៍មុនហើយនៅសប្តាហ៍ក្រោយនេះចាប់ពីថ្ងៃទី១៦ដល់ថ្ងៃទី១៩ ខែកក្កដានេះ លោក John Kerry បេសកជនពិសេសរបស់សហរដ្ឋអាមេរិកស្តីពីបញ្ហាអាកាសធាតុនឹងធ្វើដំណើរទៅកាន់ប្រទេសចិន។
លោក Blinken និងលោក Wang កំពុងចូលរួមកិច្ចពិភាក្សាអាស៊ាននៅក្នុងរដ្ឋធានីហ្សាការតានៃប្រទេសឥណ្ឌូណេស៊ីនៅពេលដែលរដ្ឋមន្ត្រីការបរទេសរុស្ស៊ី លោកSergey Lavrovស្ថិតនៅទីនោះដែរ។
ជំនួបនៅថ្ងៃព្រហស្បតិ៍និងថ្ងៃសុក្រស្អែកនេះត្រូវគេរំពឹងនឹងរួមបញ្ចូលការផ្តោតលើការងារដើម្បីបញ្ចប់វិបត្តិនៅក្នុងប្រទេសមីយ៉ាន់ម៉ានិងការតានតឹងនៅក្នុងសមុទ្រចិនខាងត្បូង។
ពួកមេដឹកនាំយោធាមីយ៉ាន់ម៉ាមិនបានអនុវត្តផែនការសន្តិភាពចំនួន៥ចំណុចដែលពួកគេបានព្រមព្រៀងភ្លាមៗបន្ទាប់ពីបណ្តេញរដ្ឋាភិបាលរបស់លោកស្រី Aung San Suu Kyiកាលពីឆ្នាំ២០២១។
ផែនការដែលធ្វើឡើងដោយអាស៊ានរួមទាំងការអំពាវនាវឱ្យមានការបញ្ឈប់អំពើហិង្សា ផ្គត់ផ្គង់ជំនួយមនុស្សធម៌និងការចរចាសន្តិភាព។
អំពើហិង្សានៅក្នុងប្រទេសមីយ៉ាន់ម៉ាបានធ្វើឱ្យមនុស្សជាង១លាននាក់គ្មានទីកន្លែងរស់នៅ។ នេះបើតាមអង្គការសហប្រជាជាតិ៕
អ្នកឆ្លើយឆ្លងព័ត៌មានការទូតជាន់ខ្ពស់របស់ VOA អ្នកស្រី Cindy Saine បានផ្តល់សេចក្តីរាយការណ៍នេះ។ ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានAssociated Press, Agence France-Presse និងReuters.
