រដ្ឋមន្ត្រីការបរទេសមកពីប្រទេសជាង២០ បានជួបជុំគ្នានៅប្រទេសឥណ្ឌូណេស៊ីនៅថ្ងៃសុក្រនេះ ដោយការពិភាក្សាតុមូលក្នុងកិច្ចប្រជុំសន្តិសុខប្រចាំឆ្នាំរបស់តំបន់អាស៊ីអាគ្នេយ៍នេះ នឹងផ្តោតលើបញ្ហាប្រកួតប្រជែងរវាងសហរដ្ឋអាមេរិកនិងចិន សង្គ្រាមនៅអ៊ុយក្រែននិងការបាញ់មីស៊ីលរបស់កូរ៉េខាងជើង។ នេះបើយោងតាមទីភ្នាក់ងារសារព័ត៌មាន Reuters។
ប្រមុខការទូតមកពីចិន សហរដ្ឋអាមេរិក និងរុស្ស៊ី ស្ថិតក្នុងចំណោមអ្នកចូលរួមក្នុងវេទិកាតំបន់ អាស៊ាននៅថ្ងៃសុក្រនេះ។ របៀបវារៈទូទៅ តាមធម្មតា នឹងប្តូរទៅរកព្រឹត្តិការណ៍ភូមិសាស្ត្រនយោបាយដែលកើតឡើងក្នុងសប្តាហ៍នេះ ដោយផ្តល់ឱកាសនិង វេទិកាឲ្យភាគីតបតគ្នាតឹងសរសៃកនិងទ្រហឹងអឺងកងរវាងមហាអំណាចហើយម្តងម្កាលក៏មាន អ្នកដើរចេញពីកិច្ចប្រជុំដែរ។
ពេលថ្លែងទៅកាន់ក្រុមរដ្ឋមន្ត្រីការបរទេសមកពីសមាគមប្រជាជាតិអាស៊ីអាគ្នេយ៍ឬអាស៊ាន ប្រធានអង្គប្រជុំគឺប្រធានាធិបតីឥណ្ឌូណេស៊ី លោក Joko Widodo បាននិយាយថាការជួបជុំគ្នានេះ មានគោលបំណងស្វែងរកដំណោះស្រាយ ជាជាងធ្វើឲ្យបញ្ហាតំបន់និងសាកលលោកកាន់តែយ៉ាប់។
រដ្ឋមន្ត្រីការបរទេសអាមេរិក លោក Antony Blinken បានជួបពិភាក្សាជាមួយប្រមុខការទូតចិនលោក Wang Yi «ដោយស្មោះត្រង់និងស្ថាបនា» កាលពីថ្ងៃព្រហស្បតិ៍ក្នុងទីក្រុងហ្សាការតា។ នេះបើយោងតាមក្រសួងការបរទេសអាមេរិក ដែលនិយាយថាការជួបគ្នាចុងក្រោយនេះ មានគោលបំណងគ្រប់គ្រងភាពខុសគ្នារវាងមហាអំណាចទាំងពីរ។
អាស៊ានដែលមានសមាជិក១០ប្រទេស បានធ្វើជាម្ចាស់ផ្ទះកិច្ចប្រជុំកំពូលអាស៊ីបូព៌ានៅព្រឹកថ្ងៃសុក្រមុនពេលប្រជុំដោយឡែកជាមួយលោក Blinken។
នៅពេលរសៀល មានការចូលរួមពីរដ្ឋមន្ត្រីការបរទេសមកពីរុស្ស៊ី អូស្ត្រាលី ជប៉ុន អង់គ្លេស កូរ៉េខាងត្បូង និងប្រទេសផ្សេងទៀត ក្នុងវេទិការតំបន់អាស៊ានដែលប្រជុំបិទទ្វារ។ គេរំពឹងថាកិច្ចប្រជុំនេះ នឹងឆ្លើយតបចំពោះបញ្ហាបាញ់មីស៊ីលផ្លោងឆ្លងទ្វីប Hwasong-18 ចុងក្រោយបំផុតក្នុងសប្តាហ៍នេះរបស់កូរ៉េខាងជើង ដែលបាននិយាយការពារខ្លួនកាលពីថ្ងៃព្រហស្បតិ៍នៅក្រុមប្រឹក្សាសន្តិសុខអង្គការសហប្រជាជាតិ។
រដ្ឋមន្ត្រីការបរទេសរុស្ស៊ី លោក Sergei Lavrov ក៏ស្ថិតនៅក្រុងហ្សាការតាដែរ ដែលនៅទីនោះ លោកបានផ្តល់បទសម្ភាសន៍មួយ ដោយនិយាយថាសង្គ្រាមនៅអ៊ុយក្រែននឹងមិនចប់ទេ លុះត្រាតែបស្ចិមប្រទេស «បោះបង់ចោលផែនការរក្សាការគ្រប់ដណ្តប់របស់ខ្លួន» រួមទាំង«មហិច្ឆតាងប់ងល់»ក្នុងការប្រើយុទ្ធសាស្ត្រផ្តួលរុស្ស៊ី ។
រដ្ឋមន្ត្រីការបរទេសចិនលោក Wang ក៏បានជួបលោក Lavrov ហើយនិយាយថា ភាគីទាំងពីរនឹង«ពង្រឹងទំនាក់ទំនងនិងការសម្របសម្រួលយុទ្ធសាស្ត្រ»៕
