នៅថ្ងៃច័ន្ទនេះ ក្រុមអ្នកធ្វើ«យុទ្ធនាការថ្ងៃច័ន្ទពណ៌ខ្មៅ» នៅតំបន់បឹងកក់បានស្នើឲ្យមេដឹកនាំគណបក្សនយោបាយបញ្ឈប់ការចាប់អ្នកតំណាងរបស់ពួកគេ និងសកម្មជនការពារសិទ្ធិមនុស្ស ក៏ដូចជាមន្ត្រីគ.ជ.ប.ធ្វើជាចំណាប់ខ្មាំងខាងនយោបាយ និងទទូចឲ្យមានការដោះលែងតំណាងរបស់ពួកគេ។
យុទ្ធនាការថ្ងៃច័ន្ទពណ៌ខ្មៅ ដែលមានបំណងទាមទារឲ្យដោះលែងអ្នកស្រីទេព វន្នីដែលជាអ្នកតំណាងរបស់ពួកគេ មន្ត្រីការពារសិទ្ធិមនុស្ស និងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប.) ព្រមទាំងស្វែងរកយុត្តិធម៌ដល់ការបាញ់សម្លាប់លោកកែម ឡី អ្នកវិភាគដ៏សំខាន់របស់កម្ពុជានោះ បានឈានចូលដល់សប្តាហ៍ទី៣៧ហើយ នៅថ្ងៃច័ន្ទនេះ។
អ្នកស្រីបូវ សោភា សកម្មជនការពារសិទ្ធិដីធ្លីនៅតំបន់បឹងកក់ ដែលចូលរួមការធ្វើយុទ្ធនាការថ្ងៃច័ន្ទពណ៌ខ្មៅ បានប្រាប់ VOA និងក្រុមអ្នកយកព័ត៌មាន ក្នុងពេលយុទ្ធនាការនេះថា អ្នកស្រីទេព វន្នី តំណាងរបស់ប្រជាពលរដ្ឋក្នុងសហគមន៍បឹងកក់ និងក្រុមអ្នកការពារសិទ្ធិមនុស្សក៏ដូចមន្ត្រី គ.ជ.ប. បានក្លាយជាចំណាប់ខ្មាំងរបស់អ្នកនយោបាយ។
«នេះជាការណ៍ពិត។ ពួកគាត់ទាំងអស់គ្នាហ្នឹងគឺជាចំណាប់ខ្មាំង ព្រោះអីការចាប់ គាត់ហើយនិងការទាមទារដោះលែងហ្នឹងគឺនៅក្នុងគេហៅថា នៅក្នុងតុចរចាទៅវិញ មិនមែននៅក្នុងការដោះលែងពីប្រព័ន្ធតុលាការ ឬមួយក៏ពីផ្នែកច្បាប់ណាមួយ ឲ្យគាត់មានសេរីភាពទេ តែបែរជាសេរីភាពរបស់គាត់គឺស្ថិតនៅក្នុងការនៅលើតុចរចារបស់ថ្នាក់ដឹកនាំ។ ហ្នឹងគឺជាការណ៍ពិតសម្រាប់ពួកគាត់ទាំងប្រាំមួយនាក់»។
ការលើកឡើងរបស់អ្នកស្រីបូវ សោភាកើតមានឡើងនៅគ្រាដែលការចរចានយោបាយនៃគណបក្សធំៗទាំងពីរនៅសភាត្រូវអ្នកឃ្លាំមើលស្ថានការណ៍នយោបាយកម្ពុជាមើលឃើញថា បានបន្តជាប់គាំង ទោះបីជាមានការឆ្លើយឆ្លងតាមលិខិតរវាងថ្នាក់ដឹកនាំក្រុមអ្នកតំណាងរាស្ត្រអំពីជំនួបរវាងគណបក្សទាំងពីរនេះក្តី។
ស្របពេលជាមួយគ្នានេះ សារព័ត៌មានក្នុងស្រុកមួយដែលស្និទ្ធនឹងរដ្ឋាភិបាល បានដកស្រង់សម្តីលោកនាយករដ្ឋមន្ត្រីហ៊ុន សែន ដែលថា លោកមានបំណង កែប្រែប្រការ៤៨ថ្មីនៃបទបញ្ជាផ្ទៃក្នុងនៃរដ្ឋសភា ដើម្បីលុបចោលតួនាទីប្រធានក្រុមមតិភាគតិចមានឋានៈស្មើនាយករដ្ឋមន្ត្រី ដែលជាគូសន្ទនាជាមួយនឹងប្រមុខរាជរដ្ឋាភិបាលទាក់ទងទៅនឹងបញ្ហាប្រទេសជាតិ។
លោកនាយករដ្ឋមន្ត្រីហ៊ុន សែនបានចោទប្រកាន់ថា គណបក្សប្រឆាំងដែលជាក្រុមសំឡេងមតិភាគតិចក្នុងរដ្ឋសភា ប៉ុនប៉ងយកប្រការនេះមកដោះលែងអ្នកទោសដែលជាការបំពានដល់អំណាចតុលាការ។
យ៉ាងណាក៏ដោយ អ្នកនាំពាក្យគណបក្សប្រជាជនកម្ពុជាគឺលោកសុខ ឥសាន សុំមិនធ្វើការអធិប្បាយថា តើការថ្លែងរបស់លោកនាយករដ្ឋមន្ត្រីហ៊ុន សែនអាចនឹងប៉ះពាល់ដល់ការសន្ទនាផ្នែកនយោបាយរវាងគណបក្សធំៗទាំងពីរឬយ៉ាងណានោះទេ។ ចំណែកលោកឡេង ប៉េងឡុង អ្នកនាំពាក្យរដ្ឋសភាជាតិ បានប្រាប់ VOA ថា សភា មិនទាន់ទទួលបានលិខិតជាលាយលក្ខណ៍អក្សរពីរដ្ឋាភិបាលក្នុងការធ្វើវិសោធនកម្មប្រការ៤៨ថ្មីនេះទេ។
«ខ្ញុំអត់ទាន់ឃើញមាននរណាគេធ្វើអីនៅឡើយទេបាទ»។
លោកមាស នី អ្នកសិក្សាស្រាវជ្រាវការអភិវឌ្ឍសង្គម បានប្រាប់ VOA ថា ប្រសិនបើមានការកែប្រែប្រការ៤៨ថ្មីនេះបា្រកដមែននោះ អ្នកជាប់ឃុំដែលរួមមានមន្ត្រី និងសកម្មជនគណបក្សប្រឆាំងក៏ដូចជាអ្នកការពារសិទ្ធិមនុស្ស និងមន្ត្រីគ.ជ.ប. នឹងត្រូវឃុំខ្លួនបន្តក្នុងពន្ធនាគាររយៈពេលយូរថែមទៀត។ លោកយល់ថា អ្នកជាប់ឃុំទាំងនោះនៅតែជាឧបករណ៍នយោបាយដើម្បីគាបសង្កត់គណបក្សប្រឆាំង។
«វាអាចនឹងជាឧបករណ៍មួយ ដែលគេយកទៅប្រើ ដើម្បីធ្វើឲ្យប្រជាប្រិយភាព លោកកឹម សុខាហ្នឹងធ្លាក់ចុះទៀត ហើយឈានទៅរកការទន់ខ្សោយរបស់គណបក្សសង្គ្រោះជាតិ ដោយគេអាចចោទប្រកាន់ថា មេដឹកនាំសង្គ្រោះជាតិមិនអាចដោះស្រាយទៅលើបញ្ហា សកម្មជនរបស់ខ្លួន មន្ត្រីរបស់ខ្លួនដែលជាប់ឃុំខ្លួនហ្នឹងបាន។ អាហ្នឹងវាមានការស្មុគស្មាញទៀតសម្រាប់នយោបាយក្នុងស្រុកខ្មែរយើងណាស់»។
អ្នកស្រីទេព វន្នី ដែលជាជ័យលាភីរង្វាន់ស្ត្រីជាអ្នកដឹកនាំរបស់អង្គការ Vital Voices បានចូលរួម និងដឹកនាំការធ្វើយុទ្ធនាការថ្ងៃច័ន្ទពណ៌ខ្មៅយ៉ាងសកម្មដើម្បីទាមទារឲ្យមានការដោះលែងអ្នកទាំងនោះ។
ប៉ុន្តែអ្នកស្រីបែរជាត្រូវបានចាប់ឃុំខ្លួននិងកាត់ទោសក្នុងករណីជាច្រើនពាក់ព័ន្ធនឹងការប្រព្រឹត្តអំពើហិង្សា។
ដោយឡែក ការចាប់ឃុំខ្លួនមន្ត្រីសិទ្ធិមនុស្សរបស់សមាគមការពារសិទ្ធិមនុស្សអាដហុក និងមន្ត្រីគ.ជ.ប.ធ្វើឡើង ក្រោមការចោទប្រកាន់ពីបទសូកប៉ាន់ និងសមគំនិតសូកប៉ាន់សាក្សី ទាក់ទងនឹងការផ្ដល់ការប្រឹក្សាច្បាប់ដល់នារីកាត់សក់វ័យក្មេងម្នាក់ឈ្មោះនាងខុម ចាន់តារ៉ាទី ហៅស្រីមុំ ដែលត្រូវគេចោទដោយសង្ស័យថា មានទំនាក់ទំនងស្នេហាលួចលាក់ជាមួយលោកកឹម សុខា ប្រធានស្ដីទីគណបក្សសង្គ្រោះជាតិ។
មន្ត្រី និងសកម្មជនគណបក្សសង្គ្រោះជាតិជាង១០រូបក៏បានបន្តស្ថិតក្នុងពន្ធនាគារតាមបទចោទប្រកាន់ផ្សេងៗគ្នាពាក់ព័ន្ធនឹងបញ្ហាព្រំដែនកម្ពុជា វៀតណាម និងការប្រព្រឹត្តអំពើហិង្សា។ VOA មិនទាន់អាចទាក់ទងលោកយឹម សុវណ្ណ អ្នកនាំពាក្យគណបក្សសង្គ្រោះជាតិបានទេ នៅថ្ងៃច័ន្ទនេះ។
ក៏ប៉ុន្ត កាលពីថ្ងៃអាទិត្យ លោកកឹម សុខា ប្រធានស្តីទីគណបក្សសង្គ្រោះជាតិ បានប្រាប់ក្រុមអ្នកគាំទ្រគណបក្សប្រឆាំង តាមរយៈ ការសន្ទនាតាមវីដេអូតាមអ៊ីនធើណិតនៅក្នុងការជួបប្រជុំមួយ ដែលធ្វើឡើងនៅឯទីក្រុងប៉ារីស ប្រទេសបារំាងថា លោកបានទាក់ទងជាមួយលោកស ខេង រដ្ឋមន្ត្រីក្រសួងមហាផ្ទៃដើម្បីកំណត់ការជួបសន្ទនារវាងថ្នាក់ដឹកនាំតំណាងរាស្ត្រគណបក្សទាំងពីរ។
លោកនិយាយថា លោកស ខេងស្នើឲ្យមានការពិភាក្សាលើរបៀបវារៈពីរ ដែលរួមមានតួនាទី និងភារកិច្ចរបស់ថ្នាក់ដឹកនាំតំណាងរាស្ត្រនៃគណបក្សសំឡេងភាគតិច និងសំឡេងភាគច្រើន ហើយនិងសិទ្ធិនិងសមត្ថកិច្ចរបស់ថ្នាក់ដឹកនាំនៃតំណាងរាស្ត្រគណបក្សនយោបាយទាំងពីរ។ លោកបន្តថា គណបក្សសង្គ្រោះជាតិបានស្នើរបៀបវារៈពីរផងដែរ ដែលរួមមានការធ្វើវិសោធនកម្មច្បាប់បោះឆ្នោតជាតិ និងស្ថានភាពនយោបាយកម្ពុជាមុនការបោះឆ្នោត។
អ្នកវិភាគថ្លែងថា ការព្រមានរបស់លោកហ៊ុន សែនក្នុងកែប្រែប្រការ៤៨ថ្មីនៃបទបញ្ជាផ្ទៃក្នុងនៃរដ្ឋសភា មានបំណងកាត់ផ្តាច់ការសន្ទនានយោបាយរវាងថ្នាក់ដឹកនាំក្រុមតំណាងរាស្ត្រគណបក្សនយោបាយធំៗទាំងពីរ ហើយថា ប្រមុខរដ្ឋាភិបាលកម្ពុជាកំពុងងាកទៅរកការដឹកនាំដោយផ្អែកលើការសម្រេចចិត្តតែឯកឯង និងមិនត្រូវការដៃគូសន្ទនានោះឡើយ៕
