ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ឯកសារ​បង្ហាញ​ថា ប្រធានាធិបតី​អាមេរិក​និង​ភរិយា​បាន​បង់​ពន្ធ​២៥,៩%​នៃ​ប្រាក់​ចំណូល​សរុប​ជាង​៦សែន​ដុល្លារ​ក្នុង​ឆ្នាំ២០២០


រូបឯកសារ៖ ប្រធានាធិបតី​សហរដ្ឋ​អាមេរិក​លោក Joe Biden និង​ភរិយា​របស់​លោក គឺ​លោកស្រី Jill Biden ខណៈពេល​ដែល​អ្នកទាំងពីរ​ចាកចេញ​ពី​សេតវិមាន​ទៅ​កន្លែង​សម្រាក​លំហែ​កាយ Camp David កាលពី​ថ្ងៃទី២ ខែមេសា ឆ្នាំ២០២១។

ប្រធានាធិបតី​អាមេរិក​លោក Joe Biden បានផ្សព្វផ្សាយឯកសារ​ពន្ធ​ប្រាក់​ចំណូល​ប្រចាំ​ឆ្នាំ​របស់​លោក​ ដែល​ជា​ការ​ស្តារ​ឡើង​វិញ​នូវ​ទំនៀមទម្លាប់​ជា​យូរ​មក​ហើយ​របស់ប្រធានាធិបតី​អាមេរិក។ ឯកសារ​នេះ​ បាន​បង្ហាញ​ថា​ ប្រាក់​ចំណូល​របស់ប្រធានាធិបតី​និង​ភរិយា​របស់​លោក​ចំនួន​២៥,៩% ត្រូវ​បាន​យក​ទៅបង់​ជាពន្ធ​ជូន​ដល់​រដ្ឋាភិបាល​សហព័ន្ធ​ក្នុង​ឆ្នាំ​២០២០។ ​

អត្រាបង់​ពន្ធ​ប្រាក់​ចំណូល​ជា​មធ្យមឱ្យរដ្ឋាភិបាល​សហព័ន្ធ​មាន​ចំនួន​ត្រឹម​ជាង​១៤%។ លោក​ប្រធានាធិបតី​ Biden និង​ភរិយា​របស់​លោក​គឺ​ អ្នក​ស្រី Jill ដែល​ជា​គ្រូ​បង្រៀន​ មាន​ប្រាក់​ចំណូល​រួម​ចំនួន​៦០៧.៣៣៦​ ដុល្លារ ​ក្នុង​ឆ្នាំ​២០២០​ ខណៈ​លោក​កំពុង​ប្រកួត​ប្រជែងយក​តំណែង​ជា​ប្រធានាធិបតី​អាមេរិក​នោះ។ ប្រាក់​ចំណូល​នេះ ​បាន​ធ្លាក់​ចុះ​ពី​ចំនួន​ ៩៨៥.២២៣​ ដុល្លារ​ ក្នុង​ឆ្នាំ​២០១៩​ ខណៈ​ពេល​នោះ​ពួក​គេ​ រក​ប្រាក់​ចំណូល​ភាគ​ច្រើន​បាន​ពី​ការ​លក់​សៀវភៅ​ ការ​ឡើង​ថ្លែង​សុន្ទករថា​ និង​ការងារ​នៅ​ក្នុង​សាកល​វិទ្យាល័យ Pennsylvania និង​មហាវិទ្យាល័យ​សហគមន៍ Virginia ភាគ​ខាង​ជើង។

ប្រភព​នៃ​ប្រាក់​ចំណូល​ទាំង​នោះ​ បាន​រសាត់​បាត់​ ខណៈ​ពេល​ដែល​ពួក​គេ​ កំពុង​ជាប់​ដៃ​រវល់​ក្នុង​យុទ្ធនាការបោះ​ឆ្នោត​ប្រធានាធិបតី ក្នុង​ឆ្នាំ​២០២០​នោះ។

ទោះ​ជា​យ៉ាងនេះ​ក្តី​ ប្រធានាធិបតី​អាណត្តិ​មុន​ គឺ​លោក Donald Trump បាន​បដិសេធ​មិនចេញ​ផ្សាយ​ពន្ធ​ប្រាក់​ចំណូល​របស់​លោក​នោះ​ទេ​ ដែល​ជាសមកម្មភាពមួយ​ ដែល​រដ្ឋបាល​បច្ចុប្បន្ន​របស់​លោក​ Biden មិន​អនុវត្ត​តាម។​ ​

អ្នក​នាំ​ពាក្យ​សេតវិមាន​អ្នក​ស្រី Jen Psaki ​បានប្រាប់​ក្រុម​អ្នក​សារព័ត៌មាន​កាល​ពី​ថ្ងៃ​ចន្ទ មុន​ពេល​ការចេញ​ផ្សាយ​ពន្ធប្រាក់​ចំណូល​របស់​ប្រធានាធិបតី​ថា៖​ «ខ្ញុំសង្ឃឹម​ថា​ យើង​នឹង​បន្ត​ចេញ​ផ្សាយ​នូវពន្ធប្រាក់​ចំណូល​របស់​ប្រធានាធិបតី​ ដូចត្រូវ​បាន​រំពឹង​ទុកដោយ​គ្រប់​ប្រធានាធិបតីអាមេរិក​ទាំង​អស់»។

ដោយ​ឡែក អនុប្រនាធិបតី​អាមេរិក​ អ្នក​ស្រី Kamala Harris និងស្វាមី​របស់​អ្នក​ស្រីលោក​ Douglas Emhoff ក៏​បាន​ចេញ​ផ្សាយ​ផង​ដែរ​នូវ​ពន្ធប្រាក់​ចំណូល​របស់​ពួក​គេ​សម្រាប់​ឆ្នាំ​២០២០។ ពួក​គេ​បាន​បង់​ពន្ធប្រាក់​ចំណូលក្នុង​អត្រា​ចំនួន​៣៦.៧% ស​ម្រាប់​ប្រាក់​ចំណូល​រួម​ចំនួន​១.៦៩៥.២២៥​ដុល្លារ និងការ​រួម​វិភាគ​ទាន​ចំនួន២៧.០០៦​ដុល្លារដល់​កម្មវិធី​សប្បុរសធម៌។​ ​អ្នក​ស្រី Harris ធ្លាប់ធ្វើ​ជា​សមាជិក​ព្រឹទ្ធសភា​អាមេរិក តំណាង​ឲ្យ​រដ្ឋ California ខណៈ​ស្វាមី​របស់អ្នក​ស្រី​ ធ្លាប់​ធ្វើ​ជា​មេធាវី​ផ្នែក​វិស័យ​សិល្បៈកម្សាន្ត​ ដែល​មាន​មូលដ្ឋាន​ក្នុង​ទី​ក្រុង Los Angeles។ បច្ចុប្បន្ន​ លោក​កំពុង​បង្រៀន​ច្បាប់​នៅ​សាកល​វិទ្យាល័យ Georgetown ក្នុង​រដ្ឋធានី​វ៉ាស៊ីនតោន៕

XS
SM
MD
LG