លោក Joe Biden ដែលគេសន្មតថាជាប្រធានាធិបតីជាប់ឆ្នោតថ្មីរបស់សហរដ្ឋអាមេរិក បានប្ដេជ្ញាកាលពីថ្ងៃអង្គារថា នឹងកសាង «សេដ្ឋកិច្ចសហរដ្ឋអាមេរិកថ្មីមួយ ដែលដំណើរការសម្រាប់ពលរដ្ឋអាមេរិកាំងគ្រប់រូប» នៅពេលលោកចូលកាន់តំណែងនៅថ្ងៃទី២០ ខែមករាខាងមុខ។ លោកថ្លែងដូច្នេះ នៅពេលដែលសហរដ្ឋអាមេរិកកំពុងប្រឈមនឹងវិបត្តិសេដ្ឋកិច្ចដោយសារការរាតត្បាតនៃជំងឺកូវីដ១៩។
លោក Biden បានថ្លែងនៅក្នុងទីក្រុង Wilmington រដ្ឋ Delaware នៅពេលដែលលោកណែនាំជាសាធារណៈនូវទីប្រឹក្សាសេដ្ឋកិច្ចសំខាន់ៗរបស់លោកថា៖ «ខ្ញុំដឹងថានេះជាពេលវេលាដ៏លំបាក ប៉ុន្តែខ្ញុំចង់ឲ្យអ្នកដឹងថា ជំនួយនឹងមកដល់ក្នុងពេលឆាប់ៗ»។
លោក Biden បានជំរុញសភាឲ្យ «អនុម័តកញ្ចប់ថវិកាសង្គ្រោះសេដ្ឋកិច្ច» នៅក្នុងខែធ្នូនេះ មុនពេលសមាជិកសភាជាប់ឆ្នោតថ្មីចូលកាន់តំណែងនៅខែមករាខាងមុខ។
ប៉ុន្តែលោកបានទទួលស្គាល់ថា កញ្ចប់ថវិកាសង្គ្រោះសេដ្ឋកិច្ចថ្មីនេះ «ទំនងគ្រាន់តែជាការចាប់ផ្ដើមតែប៉ុណ្ណោះ» ហើយលោកបានសន្យាថា នឹងដាក់សំណើចំណាយថ្មី នៅពេលលោកចាប់ផ្ដើមកាន់តំណែងជាប្រធានាធិបតី។
ដោយសារមានករណីឆ្លងជំងឺកូវីដ១៩ ថ្មី រាប់សិបម៉ឺនករណីជារៀងរាល់ថ្ងៃនៅក្នុងសហរដ្ឋអាមេរិក លោក Biden បាននិយាយថា ផលសេដ្ឋកិច្ចដែលពលរដ្ឋទទួលបានមិនស្មើភាពគ្នាទេ ដែលវាជាផ្នែកមួយនៃអ្វីដែលសេដ្ឋវិទូហៅថា ជាការងើបឡើងវិញនៃសេដ្ឋកិច្ចដែលមានរាងដូចអក្សរ K។
លោក Biden បាននិយាយថា «សម្រាប់អ្នកនៅចំណុចកំពូល ការងារបានត្រឡប់មកវិញ ហើយទ្រព្យសម្បត្តិរបស់ពួកគេកើនឡើង។ ប៉ុន្តែសម្រាប់អ្នកនៅចំណុចកណ្ដាល និងចំណុចខាងក្រោមវិញ គឺវាផ្ទុយពីនេះ។ ពួកគេប្រវេប្រវារកវិធីបង់ថ្លៃចំណាយ និងរកម្ហូបអាហារសម្រាប់បរិភោគ»។
លោក Biden បានបន្ថែមថា ក្រុមទីប្រឹក្សាសេដ្ឋកិច្ចរបស់លោក «នឹងបង្កើតឲ្យមានការងើបឡើងវិញ[នៃសេដ្ឋកិច្ច] សម្រាប់ពលរដ្ឋទាំងអស់គ្នា និងធ្វើឲ្យសេដ្ឋកិច្ចសហរដ្ឋអាមេរិកដំណើរការទៅមុខម្ដងទៀត»៕
