ប្រធានាធិបតីសហរដ្ឋអាមេរិកលោក Joe Biden បានអញ្ជើញចុះទៅរដ្ឋ Kentucky កាលពីថ្ងៃពុធដើម្បីពិនិត្យមើលផ្ទាល់ការបំផ្លិចបំផ្លាញដែលបណ្តាលមកពីខ្យល់ព្យុះគួច tornado ជាច្រើន ដែលបានសម្លាប់មនុស្សយ៉ាងតិច៧៤នាក់ ហើយបានធ្វើឲ្យមនុស្សរាប់ពាន់នាក់ទៀតបាត់បង់ផ្ទះសម្បែង។
លោក Biden ត្រូវបានគេជម្រាបត្រួសៗអំពីការខំប្រឹងប្រែងស្តារឡើងវិញចេញពីខ្យល់ព្យុះគួចដែលបានវាយបក់បោកនៅក្នុងរដ្ឋ Kentucky ហើយនឹងបណ្តារដ្ឋជិតខាងកាលពីយប់ថ្ងៃសុក្រ និងព្រឹកថ្ងៃសៅរ៍សប្តាហ៍មុន។ លោកប្រធានាធិបតី បានជិះយន្តហោះឆ្លងកាត់ពីលើទីក្រុង២ គឺក្រុង Mayfield និងក្រុង Dawson Springs ដែលត្រូវបានបំផ្លាយស្ទើររៀបស្មើដល់ដីដោយខ្យល់ព្យុះគួច tornadoes ហើយបន្ទាប់មក លោកប្រធានាធិបតី បានដើរតាមផ្លូវដែលពោរពេញដោយគំនរកម្ទេចកម្ទី ដើម្បីបង្ហាញការអាណិតអាសូរដល់អ្នកដែលនៅរស់រានមានជីវិត។
លោកប្រធានាធិបតី បានសន្យាផ្តល់ថវិកាសហព័ន្ធឲ្យបានឆាប់រហ័សដើម្បីជួយស្ថាបនាសហគមន៍នានាឡើងវិញ។
អភិបាលរដ្ឋ Kentucky លោក Andy Beshear បានមានប្រសាសន៍កាលពីថ្ងៃអង្គារថា មនុស្សជាង១០០នាក់ បានបាត់ខ្លួននៅក្នុងរដ្ឋនេះ ភាគច្រើននៅ Dawson Springs ដែលជាទីក្រុងមួយមានមនុស្សតិចជាង៣.០០០នាក់។
លោក Biden បានអនុម័តសេចក្តីប្រកាសគ្រោះមហន្តរាយសហព័ន្ធសម្រាប់រដ្ឋ Kentucky និងរដ្ឋជិតខាង គឺរដ្ឋ Tennessee និង Illinois បន្ទាប់ពីខ្យល់ព្យុះដែលបានធ្វើឲ្យមានខ្យល់គួច tornadoes ជាង៣០ នៅរដ្ឋចំនួន៥។ មនុស្សទាំងអស់យ៉ាងតិចណាស់ក៏៨៨នាក់ដែរ បានស្លាប់៕
ព័ត៌មានខ្លូះនៅក្នុងសេចក្តីរាយការណ៍នេះ ត្រូវបានដកស្រង់ចេញពីទីភ្នាក់ងារព័ត៌មាន AP និង Reuters។
