ប្រធានាធិបតីសហរដ្ឋអាមេរិកលោក Joe Biden បានទៅដល់ប្រទេសអ៊ីស្រាអែល ហើយនៅថ្ងៃពុធនេះ ស្របពេលដែលជម្លោះកំពុងមានភាពតានតឹងខ្លាំងក្រោយពីមានការផ្ទុះដ៏ធំមួយនៅក្នុងមន្ទីរពេទ្យមួយកន្លែងក្នុងតំបន់ហ្កាហ្សា ដែលបណ្តាលឱ្យមានការចោទប្រកាន់និងការស្តីបន្ទោសគ្នា និងការប្រឆាំងតវ៉ានៅទូទាំងតំបន់។
លោក Biden ជួបជាមួយមេដឹកនាំអ៊ីស្រាអែល ដើម្បីសម្តែងការគាំទ្ររបស់អាមេរិកចំពោះប្រទេសសម្ព័ន្ធមិត្តដ៏យូរអង្វែងមួយនេះ ក៏ប៉ុន្តែកិច្ចប្រជុំសំខាន់មួយនៅក្នុងប្រទេសហ្ស៊កដានីជាមួយមេដឹកនាំអារ៉ាប់នានា ត្រូវបានលុបចោលវិញក្រោយមានការផ្ទុះនៅក្នុងមន្ទីពេទ្យនោះ។
ក្រុមសកម្មប្រយុទ្ធហាម៉ាស់បានស្តីបន្ទោសអ៊ីស្រាអែលចំពោះការផ្ទុះក្នុងមន្ទីរពេទ្យ Ahli Arab ក្នុងទីក្រុងហ្កាហ្សា ដោយហៅថា ជាឧក្រិដ្ឋកម្មប្រល័យពូជសាសន៍មួយ ដែលជាថ្មីម្តងទៀតបង្ហាញពីមុខមាត់ដ៏អាក្រក់នៃសត្រូវឧក្រិដ្ឋកម្ម ក៏ដូចជារដ្ឋាភិបាលភេរវកម្មនិងហ្វស៊ីសរបស់គេផងដែរ»។
ក្រុមនេះបាននិយាយនៅក្នុងសេចក្តីថ្លែងការណ៍មួយថា មានអ្នករងរបួសនិងស្លាប់រាប់រយនាក់ ដែលភាគច្រើនជាក្រុមគ្រួសារដែលគ្មានទីជម្រក អ្នកជំងឺ កុមារនិងស្ត្រី។ អាជ្ញាធរប៉ាឡេស្ទីននិយាយថា មនុស្សប្រមាណ ៥០០នាក់ត្រូវបានសម្លាប់នៅក្នុងការផ្ទុះនោះ។
កងកម្លាំងការពារអ៊ីស្រាអែលបានបដិសេធថាមិនមែនជាទង្វើរបស់ខ្លួនឡើយ ដោយនិយាយថាគ្រាប់រ៉ុក្កែតបាញ់ខុសគោលដៅមួយរបស់ពួកទាហានប៉ារ៉ានៃក្រុមជីហាតអ៊ីស្លាមប៉ាឡេស្ទីន បានធ្លាក់ចំទីតាំងមន្ទីពេទ្យនោះ។ ក្រុមសកម្មប្រយុទ្ធអ៊ីស្លាមជីហាត បានបដិសេធការទទួលខុសត្រូវលើរឿងនេះ។
អ្នកនាំពាក្យកងទ័ពអ៊ីស្រាអែល ឧត្តមនាវីឯក Daniel Hagari បានប្រាប់ក្រុមអ្នកសារព័ត៌មាននៅថ្ងៃពុធនេះថា ពុំមានការខូចខាតនៃសំណង់អគារនោះ ឬក៏មានស្នាមរណ្តៅធំ ដែលដូចការវាយប្រហារតាមអាកាសរបស់អ៊ីស្រាអែលនោះទេ។
លោក Biden បានប្រាប់នាយករដ្ឋមន្ត្រីអ៊ីសា្រអែលលោក Benjamin Netanyahu ថា លោកមានការតក់ស្លុត និងខឹងយ៉ាងខ្លាំងចំពោះការផ្ទុះនៅក្នុងមន្ទីពេទ្យនោះ ហើយថា បើផ្អែកលើអ្វីដែលលោកបានឃើញនោះ គឺថា នេះជាទង្វើរបស់ក្រុមម្ខាងទៀត មិនមែនរបស់អ៊ីស្រាអែលទេ។
លោកប្រធានាធិបតីសហរដ្ឋអាមេរិក បានប្តេជ្ញាថានឹងធានាថា ប្រទេសអ៊ីស្រាអែលនឹងទទួលបាននូវអ្វីដែលខ្លួន ត្រូវការចាំបាច់ដើម្បីការពារខ្លួន៕
អ្នកស្រី Margaret Besheer អ្នកឆ្លើយឆ្លងព័ត៌មានវីអូអេ នៅទីស្នាក់ការអង្គការសហប្រជាជាតិ រួមចំណែកក្នុងការនិពន្ធអត្ថបទនេះ។ ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFP និង Reuters
