អាជ្ញាធរសុខាភិបាលក្នុងតំបន់ដែលគ្រប់គ្រងដោយក្រុមហាម៉ាស់និយាយថា ការវាយប្រហារតាមអាកាសរបស់អ៊ីស្រាអែលមួយ បានសម្លាប់មនុស្សរាប់រយនាក់នៅឯមន្ទីរពេទ្យមួយក្នុងតំបន់ហ្គាហ្សា កាលពីថ្ងៃអង្គារ ទី១៧ ខែតុលា។ ហើយអង្គការសហប្រជាជាតិបាននិយាយថា ការវាយប្រហាររបស់អ៊ីស្រាអែលមួយទៀត ក៏បានប៉ះចំសាលារៀនមួយដែលត្រូវបានប្រើប្រាស់ជាជម្រកសុវត្ថិភាពផងដែរ។
ប្រធានការពារជនស៊ីវិលនៅតំបន់ហ្គាហ្សាបាននិយាយតាមទូរទស្សន៍ Al-Jazeera ថា មនុស្សជាង ៣០០ នាក់ ត្រូវបានសម្លាប់នៅមន្ទីរពេទ្យ Al-Ahli al-Arabi ។
មន្ត្រីក្រសួងសុខាភិបាលហ្គាហ្សាម្នាក់បាននិយាយថា មនុស្សយ៉ាងហោចណាស់ ៥០០ នាក់ត្រូវបានសម្លាប់ និងរបួស។
នាយកដ្ឋានទាំងពីរស្ថិតនៅក្រោមរដ្ឋាភិបាលដែលគ្រប់គ្រងដោយក្រុមហាម៉ាស់។
យោធាអ៊ីស្រាអែលបាននិយាយថា ខ្លួនមិនមានព័ត៌មានលម្អិតណាមួយអំពីការទម្លាក់គ្រាប់បែកដែលបានរាយការណ៍នេះនោះទេ។
