ប្រធានាធិបតីសហរដ្ឋអាមេរិកលោក Joe Biden នឹងធ្វើដំណើរទៅកាន់ប្រទេសអ៊ីស្រាអែលនៅថ្ងៃពុធស្អែក ស្របពេលដែលវិបត្តិមនុស្សធម៌កើនឡើងនៅក្នុងតំបន់ Gaza មុនពេលការលុកលុយតាមផ្លូវគោករបស់កងទ័ពអ៊ីស្រាអែលគ្រោងធ្វើឡើង។
អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិកលោក John Kirby បានប្រាប់អ្នកកាសែតថា លោក Biden នឹងធ្វើទស្សនកិច្ចទៅកាន់ទីក្រុង Tel Aviv នៃប្រទេសអ៊ីស្រាអែល មុនពេលធ្វើដំណើរទៅកាន់ប្រទេសហ្ស៊កដានីដែលនៅទីនោះលោកនឹងជួបជាមួយនឹងព្រះមហាក្សត្រ Abullah ប្រធានាធិបតីអេហ្ស៊ីបលោក Abdel Fattah el-Sissi និងប្រធានអាជ្ញាធរប៉ាឡេស្ទីនលោក Mahmoud Abbas។
សេតវិមានបានលើកឡើងថា លោក Biden នឹងបញ្ជាក់ជាថ្មីថាក្រុមសកម្មប្រយុទ្ធហាម៉ាស់ (Hamas) មិនតំណាងឱ្យសិទ្ធិរបស់ប្រជាពលរដ្ឋប៉ាឡេស្ទីនក្នុងការទទួលបានសេចក្ដីថ្លៃថ្នូរនិងភាពស្វ័យសម្រេចនោះទេ ហើយលោកនឹងពិភាក្សាអំពីតម្រូវការមនុស្សធម៌របស់ជនស៊ីវិលនៅក្នុងតំបន់ Gaza។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយបន្ទាប់ពីបានជួបជាមួយនឹងនាយករដ្ឋមន្ត្រីអ៊ីស្រាអែលលោក Benjamin Netanyahu ថា៖ «លោកប្រធានាធិបតី [Biden] នឹងឮពីអ៊ីស្រាអែលអំពីវិធីដែលអ៊ីស្រាអែលនឹងធ្វើប្រតិបត្តិការរបស់ខ្លួនដោយធ្វើយ៉ាងណាកាត់បន្ថយជាអតិបរមានូវការស្លាប់និងរងរបួសរបស់ជនស៊ីវិល និងធ្វើយ៉ាងណាឱ្យជំនួយមនុស្សធម៌បានចូលទៅដល់ដៃរបស់ជនស៊ីវិលនៅក្នុងតំបន់ Gaza ដោយមិនឱ្យក្រុមហាម៉ាស់បានទទួលប្រយោជន៍ពីជំនួយទាំងនេះ»។
លោក Blinken ក៏បានបញ្ជាក់ផងដែរថា ការពិភាក្សារបស់លោកជាមួយនឹងលោក Netanyahu ទទួលបាននូវដំណោះស្រាយដែលអាចទៅរួចមួយនៅក្នុងការធ្វើយ៉ាងណាឱ្យជំនួយមនុស្សធម៌បានទៅដល់ដៃរបស់ប្រជាពលរដ្ឋប៉ាឡេស្ទីនដែលត្រូវគេហ៊ុមព័ទ្ធនៅក្នុងតំបន់ Gaza។
លោក Blinken បានបន្ថែមថា វាជាការសំខាន់ដែលជំនួយអាចចាប់ផ្ដើមហូរចូលទៅក្នុងតំបន់ Gaza ឱ្យបានឆាប់តាមដែលអាចធ្វើបាន ប៉ុន្តែលោកបានបង្ហាញក្ដីបារម្ភថាក្រុមសកម្មប្រយុទ្ធហាម៉ាស់ប្រហែលជាព្យាយាមដណ្ដើមជំនួយទាំងនេះឬក៏បង្អាក់ដល់ការចែកចាយជំនួយទាំងនេះ។
ព្រះមហាក្សត្រ Abdullah បានព្រមាននៅថ្ងៃអង្គារនេះថា ការរុញឱ្យជនភៀសខ្លួនប៉ាឡេស្ទីនចូលទៅក្នុងប្រទេសហ្ស៊កដានីឬក៏អេហ្ស៊ីបមិនមែនជាជម្រើសទេ។ ស្របពេលនោះដែរ ព្រះអង្គបានអំពាវនាវឱ្យធ្វើអ្វីៗទាំងអស់ដែលចាំបាច់ដើម្បីបង្ការកុំឱ្យជម្លោះរវាងអ៊ីស្រាអែលនិងក្រុមហាម៉ាស់នេះរីកសាយភាយបន្ថែមទៀត។
អ្នកស្រី Juliette Touma អ្នកនាំពាក្យទីភ្នាក់ងារជំនួយនិងកិច្ចការអង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់មជ្ឈិមបូព៌ា (UNRWA) បានបញ្ជាក់កាលពីថ្ងៃចន្ទថាមិនមានទឹកសម្រាប់ប្រជាពលរដ្ឋភាគច្រើនបំផុតនៅក្នុងតំបន់ Gaza នោះទេ។
អ្នកស្រី Touma បាននិយាយថា ជនជាតិប៉ាឡេស្ទីនប្រហែលមួយលាននាក់បានរត់ភៀសខ្លួនទៅកាន់ភាគខាងត្បូងនៃតំបន់ Gaza ហើយពួកគេជិត ៤០០.០០០ នាក់កំពុងជ្រកកោនភាគច្រើននៅតាមសាលារៀនរបស់ទីភ្នាក់ងារ UNRWA៕
