ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Biden នឹង​ទទួល​យក​ការ​តែងតាំង​ជា​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​តាម​អនឡាញ​ពី​រដ្ឋ Delaware


រូបឯកសារ៖ លោក Joe Biden បេក្ខជនប្រធានាធិបតីខាងគណបក្សប្រជាធិបតេយ្យ ថ្លែងនៅក្នុងយុទ្ធនាការឃោសនាបោះឆ្នោត នៅទីក្រុង Philadelphia រដ្ឋ Pennsylvania កាលពីថ្ងៃទី ១១ ខែមិថុនា ឆ្នាំ២០២០។

អតីត​អនុ​ប្រធានាធិបតី​សហរដ្ឋ​អាមេរិក លោក Joe Biden បាន​សម្រេច​ថា​នឹង​មិន​ធ្វើ​ដំណើរទៅ​កាន់​ទីក្រុង Milwaukee រដ្ឋ Wisconsin ដើម្បី​ទទួល​យក​ការ​តែងតាំង​ផ្លូវការ​ជា​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​នៅ​ឯ​សន្និបាត​ជាតិ​របស់​គណបក្ស​ នៅ​ថ្ងៃ​ទី ២០ ខែ​សីហា​ខាង​មុខ​នេះ​ទេ ដោយសារ​មាន​ការ​ព្រួយ​បារម្ភ​អំពី​ស្ថានភាព «កាន់តែ​អាក្រក់​ជាង​មុន» នៃ​ការ​ឆ្លង​រាលដាល​ជំងឺ​កូវីដ១៩។ នេះ​បើ​តាម​ការ​បញ្ជាក់​របស់​អ្នក​រៀបចំ​សន្និបាត​ជាតិ​គណបក្ស​ប្រជាធិបតេយ្យ​ កាល​ពី​ថ្ងៃ​ពុធ​ម្សិលមិញ។

គណបក្ស​ប្រជាធិបតេយ្យ​បាន​បញ្ជាក់​ថា គ្មាន​អ្នក​ថ្លែង​សុន្ទរកថា​ណា​ម្នាក់​ដែល​គ្រោង​ថ្លែង​នៅ​ឯ​សន្និបាត​នេះ នឹង​ធ្វើ​ដំណើរ​ទៅ​រដ្ឋ Wisconsin នោះ​ឡើយ ដោយ​ហេតុ​ថា​ដើម្បី «ការពារ​កុំ​ឲ្យ​មាន​បញ្ហា​ប្រឈម​ផ្នែក​សុខភាព​ចំពោះ​សហគមន៍​ដែល​រៀបចំ​សន្និបាត​នេះ ក៏​ដូចជា​ក្រុម​ផលិតកម្ម​របស់​សន្និបាត មន្ត្រី​សន្តិសុខ ដៃគូ​សហគមន៍ ប្រព័ន្ធ​ផ្សព្វផ្សាយ និង​អ្នក​ដទៃ​ផ្សេង​ទៀត»។

ជា​ទូទៅ មនុស្ស​ប្រហែល ៥ ម៉ឺន​នាក់ តាំងពី​គណៈប្រតិភូ អ្នក​ធ្វើ​ការ និង​ប្រព័ន្ធ​ផ្សព្វផ្សាយ អាច​នឹង​ចូលរួម​នៅ​ក្នុង​ព្រឹត្តិការណ៍​រយៈពេល ៤ ថ្ងៃ ដែល​នឹង​ចាប់ផ្ដើម​ពី​ថ្ងៃ​ទី ១៧ ខែ​សីហា​ខាង​មុខ​នេះ។

ឥឡូវ​នេះ ភាគ​ច្រើន​នៃ​សន្និបាត​នេះ​នឹង​ធ្វើ​ឡើង​តាម​អនឡាញ ដែល​ទំនងជា​នឹង​ធ្វើ​ឡើង​ពី​ទីក្រុង​មួយ​ចំនួន។

អ្នក​រៀបចំ​សន្និបាត​នេះ​បាន​បញ្ជាក់​ថា លោក Biden នឹង​ថ្លែង​សុន្ទរកថា​ទទួល​យក​ជា​ផ្លូវការ​នូវ​ការ​តែងតាំង​ជា​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​នៅ​ថ្ងៃ​ទី ២០ ខែ​សីហា​ខាង​មុខ​នេះ ចេញ​ពី​រដ្ឋ Dalaware ដែល​ជា​រដ្ឋ​កំណើត​របស់​លោក៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG