ប្រធានាធិបតីសហរដ្ឋអាមេរិកលោក Joe Biden បានធ្វើទស្សនកិច្ចក្នុងរដ្ឋ Michigan កាលពីថ្ងៃព្រហស្បតិ៍ ដើម្បីជួបជាមួយសហជីពកម្មករផលិតរថយន្ត ដែលជាសកម្មភាពដ៏សំខាន់មួយសម្រាប់ជួយលោកក្នុងការជាប់ឆ្នោតជាថ្មីឡើងវិញ នៅក្នុងរដ្ឋដែលមិនទាន់មានការសម្រេចចិត្តថាតើត្រូវបោះឱ្យបេក្ខជនណាមួយនៅឡើយនោះ និងជារដ្ឋដែលមានពលរដ្ឋអាមេរិកាំងដើមកំណើតអារ៉ាប់ច្រើនគេបំផុតក្នុងសហរដ្ឋអាមេរិក។
ក្នុងថ្ងៃដដែលនោះដែរ លោកក៏បានចេញបទបញ្ជានីតិប្រតិបត្តិមួយ ដើម្បីដាក់ទណ្ឌកម្មបុគ្គលតាំងទីលំនៅថ្មីមួយចំនួន ដែលគាំទ្រអំពើហិង្សាប្រឆាំងពលរដ្ឋប៉ាឡេស្ទីនក្នុងតំបន់West Bank ផងដែរ។
រដ្ឋបាលលោក Biden បាននិយាយថា សកម្មភាពនេះឆ្លុះបញ្ចាំងពីយុទ្ធវិធីជាប្រវត្តិសាស្ត្រចំពោះសង្គ្រាមរវាងអ៊ីស្រាអែលនិងក្រុមហាម៉ាស់ក្នុងតំបន់ហ្កាហ្សា ដែលបាននាំឱ្យមានអំពើហិង្សាកើនកាន់តែខ្លាំងឡើងក្នុងតំបន់ West Bank ដែលជាតំបន់ដែលមានពលរដ្ឋប៉ាឡេស្ទីនកំពុងរស់នៅផ្សេងមួយទៀត។
«លោកប្រធានាធិបតី Biden ក៏បាននិយាយផងដែរ ពីការបារម្ភរបស់លោកចំពោះអំពើហិង្សាកើនឡើងក្នុងតំបន់ West Bank ដែលបង្កឡើងដោយបុគ្គលជ្រុលនិយមមួយចំនួន ជាពិសេសការកើនឡើងអំពើហិង្សាដែលបង្កដោយអ្នកតាំងទីលំនៅថ្មីជ្រុលនិយម ដែលកើនឡើងខ្ពស់មិនធ្លាប់មានក្នុងឆ្នាំ២០២៣»។ នេះបើតាមការលើកឡើងរបស់ទីប្រឹក្សាសន្តិសុខជាតិអាមេរិកលោកJake Sullivan នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍។
ក្រុមមន្ត្រីសេតវិមាននិយាយថា បទបញ្ជានីតិប្រតិបត្តិនេះ ត្រូវបានរៀបចំជាយូរមកហើយ និងបានបដិសេធថា វាត្រូវបានដាក់ចេញជួនគ្នានឹងដំណើរទស្សនកិច្ចរបស់លោកBiden ស្របពេលដែលមានការខឹងសម្បារពីពលរដ្ឋអាមេរិកាំងមានដើមកំណើតអារ៉ាប់និងមូស្លីម ក៏ដូចជាអ្នកប្រជាធិបតេយ្យនិយមវ័យក្មេងជាច្រើននាក់ផងដែរ ជុំវិញការគាំទ្រដ៏ខ្លាំងក្លារបស់លោក Biden លើយុទ្ធនាការយោធារបស់អ៊ីស្រាអែលក្នុងតំបន់ហ្កាហ្សា។ លោក Biden បានលើកឡើងជាដំបូងពីការបារម្ភរបស់លោកចំពោះពលរដ្ឋប៉ាឡេស្ទីនក្នុងតំបន់ West Bank ដែលរងការវាយប្រហារពីក្រុមដែលលោកហៅថា ជាក្រុមតាំងទីលំនៅថ្មី«ជ្រុលនិយម»អ៊ីស្រាអែលកាលពីចុងខែតុលាកន្លងទៅ គឺតែពីរបីសប្តាហ៍ប៉ុណ្ណោះ ក្រោយក្រុមហាម៉ាស់វាយប្រហារលើអ៊ីស្រាអែលកាលពីថ្ងៃ៧ ខែតុលា៕
