ប្រធានាធិបតីសហរដ្ឋអាមេរិកលោក Joe Biden មានគម្រោងទទួលប្រធានាធិបតីហ្វីលីពីនលោកFerdinand Marcos Jr. នៅក្នុងជំនួបនៅថ្ងៃចន្ទនេះនៅសេតវិមាន ក្នុងរដ្ឋធានីវ៉ាស៊ីនតោន ខណៈពេលដែលក្តីបារម្ភនៃការធ្វើទុក្ខបុកម្នេញពីនាវាចិនទៅលើនាវាហ្វីលីពីន កំពុងកើនកាន់តែខ្លាំងឡើងនៅក្នុងតំបន់សមុទ្រចិនខាងត្បូង។ នេះបើតាមលើសេចក្តីរាយការណ៍របស់ទីភ្នាក់ងារសារព័ត៌មាន AP ។
ដំណើរទស្សនកិច្ចរបស់ប្រធានាធិបតីហ្វីលីពីនរូបនេះមកកាន់សហរដ្ឋអាមេរិក កើតមានឡើង បន្ទាប់ពីកងទ័ពអាមេរិកនិងហ្វីលីពីន ទើបតែបិទបញ្ចប់សមយុទ្ធយោធាដ៏ធំបំផុតរបស់ខ្លួនដែលមិនធ្លាប់មានក្នុងពេលកន្លងមកកាលពីសប្តាហ៍មុន ហើយក៏ស្របពេលដែលកងកម្លាំងទ័ពអាកាសនៃប្រទេសទាំងពីរនៅថ្ងៃចន្ទនេះ បានចាប់ផ្តើមការហ្វឹកហ្វឺនយន្តហោះចម្បាំងរួមគ្នាជាលើកដំបូងនៅក្នុងប្រទេសហ្វីលីពីន ចាប់តាំងពីឆ្នាំ១៩៩០មក។ ប្រទេសហ្វីលីពីននៅក្នុងឆ្នាំនេះ ក៏បានយល់ព្រមបើកមូលដ្ឋានយោធា៤បន្ថែមទៀត ដើម្បីឱ្យសហរដ្ឋអាមេរិកប្រើប្រាស់នៅតាមបណ្តាកោះមួយចំនួនរបស់ខ្លួន ខណៈពេលដែលសហរដ្ឋអាមេរិក កំពុងសម្លឹងរកវិធីទប់ទល់នឹងសកម្មភាពគឃ្លើនកាន់តែកើនខ្លាំងឡើងរបស់ចិនសំដៅទៅលើកោះតៃវ៉ាន់ និងនៅក្នុងតំបន់សមុទ្រចិនខាងត្បូងនោះ។
ទន្ទឹមនឹងនេះដែរ ប្រទេសហ្វីលីពីនបានខឹងសម្បាជាខ្លាំងនឹងប្រទេសចិន ដោយសារតែនាវាចិនធ្វើទុក្ខបុកម្នេញទៅលើកងនាវាជើងទឹកនិងឆ្មាំល្បាតរបស់ហ្វីលីពីនមិនចេះចប់មិនចេះហើយ ព្រមទាំងបានបណ្តេញក្រុមអ្នកនេសាទហ្វីលីពីនចេញពីតំបន់ដែនទឹក ដែលស្ថិតនៅជិតសមុទ្រហ្វីលីពីន ដែលចិនបានអះអាងថាជារបស់ខ្លួន។
នៅមុនពេលចាកចេញមកកាន់រដ្ឋធានីវ៉ាស៊ីតោននៅថ្ងៃអាទិត្យម្សិលមិញ ប្រធានាធិបតីហ្វីលីពីនលោក Macros និយាយថា លោក«មានការតាំងចិត្តជាខ្លាំងលើការពង្រឹងទំនាក់ទំនងឱ្យកាន់តែខ្លាំងឡើងថែមទៀតដែលមិនធ្លាប់មានពីមុនជាមួយសហរដ្ឋអាមេរិក នៅលើវិស័យជាច្រើន ដែលមិនគ្រាន់តែមានការបារម្ភនោះឡើយ ប៉ុន្តែក៏ជាវិស័យដែលមានលក្ខណៈសំខាន់ក្នុងការលើកកម្ពស់ផលប្រយោជន៍ស្នូលរបស់យើងផងដែរ»។
ជំនួបនៅសេតវិមាននៅថ្ងៃចន្ទនេះ គឺជាកិច្ចប្រជុំការទូតកម្រិតខ្ពស់ចុងក្រោយមួយជាមួយមេដឹកនាំប្រទេសតំបន់ប៉ាស៊ីហ្វិក របស់ប្រធានាធិបតីសហរដ្ឋអាមេរិកលោកJoe Biden ខណៈដែលរដ្ឋបាលរបស់លោកកំពុងប្រឈមនឹងសកម្មភាពសេដ្ឋកិច្ចនិងយោធាកាន់តែគឃ្លើនខ្លាំងឡើងពីសំណាក់ប្រទេសចិន ក៏ដូចជាក្តីបារម្ភមួយចំនួនទៀតទៅលើកម្មវិធីអាវុធនុយក្លេអ៊ែររបស់ប្រទេសកូរ៉េខាងជើងផងដែរ។ ដំណើរទស្សនកិច្ចផ្លូវការរបស់លោក Marcos មកកាន់រដ្ឋធានីវ៉ាស៊ីនតោននៅពេលនេះ ជាដំណើរទស្សនកិច្ចលើកទី១របស់មេដឹកនាំហ្វីលីពីន ក្នុងរយៈពេលជាង១០ឆ្នាំកន្លងទៅនេះ។
ភាគីទាំងពីរត្រូវគេរំពឹងថានឹងពិភាក្សាគ្នាទៅលើស្ថានភាពសន្តិសុខ និងដាក់ចេញគំនិតផ្តួចផ្តើមថ្មីស្តីពីវិស័យសេដ្ឋកិច្ច អបរំ ការប្រែប្រួលអាកាសធាតុ និងបញ្ហាដទៃផ្សេងៗមួយចំនួនទៀត ដែលជាផ្នែកមួយនៃដំណើរទស្សនកិច្ចរយៈពេល៤ថ្ងៃ របស់មេដឹកនាំហ្វីលីពីនរូបនេះ។ នេះបើយោងទៅលើមន្ត្រីរដ្ឋបាលអាមេរិកជាន់ខ្ពស់មួយរូប ដែលបានថ្លែងប្រាប់ទីភ្នាក់ងារសារព័ត៌មាន AP៕
