ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ Biden​ ដក​តំណែង​ប្រធាន​ទីភ្នាក់ងារ​សហព័ន្ធ​សម្រាប់​ហិរញ្ញវត្ថុ​​អចលនទ្រព្យ​បន្ទាប់​ពី​ការ​សម្រេច​របស់​តុលាការ​


​​រូប​ឯកសារ៖ លោក ​Mark Calabria ​ប្រធាន​ទីភ្នាក់ងារ​សហព័ន្ធ​សម្រាប់​ហិរញ្ញវត្ថុ​​អចលន​ទ្រព្យ​ (FHFA)​ ថ្លែង​នៅ​ចំពោះ​មុខ​​​គណៈកម្មាធិការ​ព្រឹទ្ធសភា​មួយ កាល​ពី​ថ្ងៃ​ទី​៩ ខែ​មិថុនា ឆ្នាំ​២០២១។
​​រូប​ឯកសារ៖ លោក ​Mark Calabria ​ប្រធាន​ទីភ្នាក់ងារ​សហព័ន្ធ​សម្រាប់​ហិរញ្ញវត្ថុ​​អចលន​ទ្រព្យ​ (FHFA)​ ថ្លែង​នៅ​ចំពោះ​មុខ​​​គណៈកម្មាធិការ​ព្រឹទ្ធសភា​មួយ កាល​ពី​ថ្ងៃ​ទី​៩ ខែ​មិថុនា ឆ្នាំ​២០២១។

លោក​ប្រធានាធិបតី​ Joe Biden ​បាន​បណ្តេញ​ប្រធាន​ទីភ្នាក់ងារ​ដែល​មើល​ការ​ខុសត្រូវ​លើ​ក្រុមហ៊ុន Fannie and Freddie Mac ​ដែល​ផ្តល់​កម្ចី​ហិរញ្ញវត្ថុ​សម្រាប់អចលនទ្រព្យ​បន្ទាប់​ពី​ការ​សម្រេចរបស់​តុលាការ​កំពូល​ដែល​ធ្វើ​ឲ្យ​កាន់តែងាយ​ស្រួល​សម្រាប់​លោក​ប្រធានាធិបតី​សម្រេច​ការ​ដក​តំណែង​នេះ។

នៅ​ក្នុង​ការ​សម្រេច​ដោយ​សំឡេង៧​ទល់​នឹង​២​ តុលាការ​បាន​និយាយ​ថា​ការ​សម្រេច​ដែល​ថា​ប្រធាន​ទីភ្នាក់ងារ​សហព័ន្ធ​សម្រាប់​ហិរញ្ញវត្ថុអចលនទ្រព្យ ​(FHFA) ​អាច​ត្រូវ​បាន​ដក​ចេញ​តែ​ក្នុង​ករណី​ដើម្បី​បុព្វ​ហេតុណាមួយ​នោះ​គឺ​មិន​ស្របរដ្ឋធម្មនុញ្ញ​ទេ។​

លោក​ចៅក្រម​ Samuel Alito ​បាន​សរសេរ​នៅ​ក្នុង​ការ​សម្រេច​ដោយ​មតិ​ភាគ​ច្រើន​ថា «អំណាចដក​តំណែង​នេះជួយ​ឲ្យ​លោក​ប្រធានាធិបតី​មាន​ឥទ្ធិពល​ត្រួតត្រា​លើ​អ្នក​នៅ​ក្រោម​បង្គាប់​ដែល​លោក​ត្រូវការ​ដើម្បី​អនុវត្ត​ភារកិច្ច​របស់​លោក​ក្នុង​ឋានៈ​ជា​ប្រធាន​អង្គ​នីតិ​ប្រតិបត្តិ​ហើយ​នឹង​ធ្វើ​ឲ្យ​ប្រាកដ​ថា​អ្នក​នៅ​ក្រោម​បង្គាប់​ទាំង​នោះ​បម្រើ​ប្រជា​ពលរដ្ឋ​ប្រកប​ដោយ​ប្រសិទ្ធភាព​និង​ស្រប​តាម​គោល​នយោបាយ​ដែល​ប្រជា​ពលរដ្ឋ​បាន​បោះឆ្នោត​ឲ្យ​ប្រធានាធិបតី»។​

ក្រសួង​យុត្តិធម៌​បាន​ធ្វើ​ការ​សម្រេច​ប្រហាក់​ប្រហែល​គ្នា​មួយ​ទាក់ទិន​នឹង​ការិយាល័យ​ការ ការពារ​ហិរញ្ញវត្ថុ​អតិថិជន​កាល​ពី​ឆ្នាំ​ទៅ។​

ភ្លាមៗ​បន្ទាប់​ពី​ការ​សម្រេច​របស់​តុលាការលោក ​Mark Calabria ​ប្រធាន​ទីភ្នាក់ងារ​សហព័ន្ធ​សម្រាប់​ហិរញ្ញវត្ថុអចលន​ទ្រព្យ​ (FHFA)​ បាន​បញ្ជាក់​នៅ​ក្នុង​សេចក្តី​ថ្លែង​ការណ៍​ថា៖ «ខ្ញុំ​គោរព​ការ​សម្រេច​របស់​តុលាការ​កំពូល​និង​អំណាច​របស់​លោក​ប្រធានាធិបតី​ដក​តំណែង​នាយក​ FHFA»។​

លោក ​Calabria ត្រូវ​បាន​លោក​អតីត​ប្រធានាធិបតី​ Donald Trump ​ស្នើ​តែងតាំង​ឲ្យ​ដឹកនាំ​ទីភ្នាក់ងារ​នេះហើយ​ត្រូវ​បាន​អនុម័ត​ឲ្យ​កាន់​តំណែង​នោះ​នៅ​ឆ្នាំ​២០១៩រយៈ​ពេល​៥​ឆ្នាំ។​

ទីភ្នាក់ងារ​នេះ​បាន​ចេញ​សេចក្តី​ថ្លែង​ការណ៍​កាលពី​ថ្ងៃ​ពុធ​ដោយ​បញ្ជាក់​ថា ​លោក Biden បាន​តែងតាំង​អ្នកស្រី​ Sandra Thompson ​ធ្វើ​ជា​ប្រធាន​ស្តីទី​របស់​ទីភ្នាក់ងារ​នេះ។​

អ្នកស្រី​ Thompson​ បាន​បម្រើ​ការងារ​ជា​អនុ​ប្រធាន​ផ្នែក​បេសកកម្ម​ផ្ទះ​សម្បែង​របស់​ទីភ្នាក់ងារ​នេះ​ហើយ​បាន​និយាយ​ថា អ្នកស្រី​មាន​កិត្តិយស​បាន​ទទួល​តំណែង​ជា​នាយក​ស្តីទី​រហូត​ដល់​នាយក​អចិន្ត្រៃយ៍ទទួល​បាន​ការ​តែងតាំង៕

XS
SM
MD
LG