ប្រធានាធិបតីសហរដ្ឋអាមេរិកលោក Joe Biden កាលពីថ្ងៃអង្គារ បានប្រៀបប្រដូចប្រធានាធិបតីចិនលោក Xi Jinping ថាជាមេដឹកនាំផ្តាច់ការម្នាក់ក្នុងចំណោមក្រុមមេដឹកនាំផ្តាច់ការ ខណៈលោកថ្លែងនៅក្នុងពិធីទទួលអ្នកផ្តល់ប្រាក់ឧបត្ថម្ភដល់យុទ្ធនាការរកសំឡេងឆ្នោត ដែលមានវត្តមានរបស់អ្នកកាសែត។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
ថ្លែងនៅក្នុងពិធីរៃអង្គាសប្រាក់មួយនៅភាគខាងជើងនៃរដ្ឋ California លោក Biden បានថ្លែងថាលោក Xi បានខឹងដោយសារឧបទ្ទវហេតុមួយកាលពីខែកុម្ភៈ នៅពេលដែលបាឡុងចិនមួយ ដែលរដ្ឋាភិបាលក្រុងវ៉ាស៊ីនតោន និយាយថាត្រូវបានប្រើប្រាស់ដើម្បីលួចយកការណ៍សម្ងាត់នោះ បានហោះកាត់សហរដ្ឋអាមេរិក មុននឹងត្រូវបានយន្តហោះយោធាអាមេរិកបាញ់ទម្លាក់។
លោកBiden បានថ្លែងថា៖ «មូលហេតុដែលលោក Xi Jinping ខឹងសម្បាយ៉ាងខ្លាំង នៅពេលដែលខ្ញុំបានបាញ់ទម្លាក់បាឡុងដែលមានផ្ទុកប្រអប់២ ពោរពេញទៅដោយឧបករណ៍លួចយកការណ៍សម្ងាត់នោះ គឺលោកមិនបាន ដឹងថាវានៅទីនោះ»។
លោកបានបន្ថែមថា៖ «ខ្ញុំនិយាយមែន។ រឿងនោះជារឿងអាម៉ាស់យ៉ាងធំមួយសម្រាប់ពួកមេដឹកនាំផ្តាច់ការ នៅពេលដែលពួកគេមិនបានដឹងថាមានរឿងអ្វីកើតឡើង»។
ការកត់សម្គាល់របស់លោក Biden បានកើតឡើងប៉ុន្មានថ្ងៃក្រោយពីលោករដ្ឋមន្ត្រីការបរទេស Antony Blinken បានបញ្ចប់ទស្សនកិច្ចទៅកាន់ទីក្រុងប៉េកាំង ក្នុងគោលបំណងបង្កើតវិធីទាក់ទងគ្នាឡើងវិញ ដើម្បីបញ្ចៀសជម្លោះរវាងមហាអំណាចពិភពលោកទាំងពីរ។
ការប្រកួតប្រជែងដែលមានច្រើនវិស័យរវាងចិននិងសហរដ្ឋអាមេរិក បានក្លាយទៅជាវិបត្តិការទូតពេញទំហឹងមួយ តាំងពីមានឧបទ្ទវហេតុបាឡុងកាលពីខែកុម្ភៈមក។
ជាការឆ្លើយតបចំពោះអត្ថាធិប្បាយរបស់លោក Biden នៅថ្ងៃពុធនេះរដ្ឋាភិបាលក្រុងប៉េកាំងបានរិះគន់ថាអត្ថាធិប្បាយនោះ ជាការបង្កហេតុនយោបាយដោយបើកចំហមួយ»។
អ្នកនាំពាក្យក្រសួងការបរទេសចិន អ្នកស្រី Mao Ning បានថ្លែងក្នុងសន្និសីទកាសែតមួយថា«ការកត់សម្គាល់យ៉ាងសំខាន់របស់ភាគីអាមេរិក ជាការគួរឱ្យអស់សំណើចនិងការគ្មានការទទួលខុសត្រូវយ៉ាងខ្លាំងជាទីបំផុត ដែលបំពានលើការពិតទូទៅ ពិធីការការទូត និងកិត្តិយសនយោបាយរបស់ប្រទេសចិន»។
អ្នកស្រីបន្ថែមថា៖ «ប្រទេសចិនមិនពេញចិត្តយ៉ាងខ្លាំង ហើយប្រឆាំងជំទាស់យ៉ាងខ្លាំងក្លាចំពោះរឿងនេះ»៕
ក្រុង San Francisco សហរដ្ឋអាមេរិក —
