ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Biden ថ្កោលទោស​«ការបោះឆ្នោត​ឆ្ពិនភ្នែក»​នៅ​នីការ៉ាហ្គា


ប្រធានាធិបតី​សហរដ្ឋ​អាមេរិក​លោក Joe Biden និយាយ​ជាមួយ​អ្នកសារព័ត៌មាន​នៅ​វាលស្មៅ​ខាងត្បូង​នៃ​សេតវិមាន​ក្នុង​រដ្ឋធានី​វ៉ាស៊ីនតោន កាលពី​ថ្ងៃទី៨ ខែវិច្ឆិកា ឆ្នាំ២០២១។
ប្រធានាធិបតី​សហរដ្ឋ​អាមេរិក​លោក Joe Biden និយាយ​ជាមួយ​អ្នកសារព័ត៌មាន​នៅ​វាលស្មៅ​ខាងត្បូង​នៃ​សេតវិមាន​ក្នុង​រដ្ឋធានី​វ៉ាស៊ីនតោន កាលពី​ថ្ងៃទី៨ ខែវិច្ឆិកា ឆ្នាំ២០២១។

លោក​ប្រធានាធិបតី ​Joe Biden​ មិន​សំចៃ​ពាក្យ​ថ្កោលទោស​ការ​បោះឆ្នោត​កាលពី​ថ្ងៃ​អាទិត្យ​ក្នុង​ប្រទេសនីការ៉ាហ្គា ​ដោយ​លោក​ហៅ​ថា​ ជា​«ការ​បោកប្រាស់» ​បន្ទាប់ពី​ប្រធានាធិបតី​ដ៏​យូរលង់​របស់​ប្រទេស​នោះ ​បាន​ចាប់​គូប្រជែងដាក់គុក​ និង​បាន​គាប​សង្កត់​យ៉ាង​ឃោរឃៅ​ដើម្បី​កាន់​តំណែង​៤​អាណត្តិ​ជាប់ៗ​គ្នា។​

ប៉ុន្តែ​គិត​ត្រឹម​ថ្ងៃ​ចន្ទ​ លោក ​Biden​ មិនទាន់​បាន​ចុះ​ហត្ថលេខា​លើ​ច្បាប់​ដែល​ចំណាយ​ពេល​ជាច្រើន​ខែ​ក្នុង​សភា​ដើម្បី​ទប់ស្កាត់​បក្ខពួក​របស់​ប្រធានាធិបតី​នីការ៉ាហ្គាទេ។ ​ច្បាប់ ​RENACER ​(Reinforcing Nicaragua's Adherence to Conditions for Electoral Reform Act)​ ដែល​តម្រូវ​ឱ្យ​ប្រទេស​នីការ៉ាហ្គា​គោរព​តាម​លក្ខខណ្ឌ​កំណែ​ទម្រង់​ការ​បោះឆ្នោត ​បាន​អនុម័ត​ដោយ​មាន​ការ​គាំទ្រ​ពី​គណបក្ស​ទាំងពីរ​ ហើយ​បាន​បញ្ជូន​ទៅ​ដល់​តុ​របស់​លោក ​Biden ​កាលពី​សប្តាហ៍​មុន។​

លោក ​Biden ​បាន​និយាយ​នៅ​ក្នុង​សេចក្តី​ថ្លែង​ការណ៍​មួយ​ថា​ «អ្វីដែល​ប្រធានាធិបតី ​នីការ៉ាហ្គា​ លោក ​Daniel Ortega​ និង​ភរិយា​ឈ្មោះ ​Rosario Murillo ​ដែល​ជា​អនុប្រធានាធិបតី ​បាន​រៀបចំ​ គឺ​ជា​ការ​បោះឆ្នោត​បោកប្រាស់​ ដែល​មិន​សេរី ​ឬ​មិន​យុត្តិធម៌​ ហើយ​ប្រាកដណាស់​ថា​ មិន​ប្រជា​ធិបតេយ្យ»។​

លោក​បាន​ប្តេជ្ញា​ថា ​នឹង​«ប្រើប្រាស់​វិធានការ​ការទូត ​និង​សេដ្ឋ​កិច្ច​ដើម្បី​គាំទ្រ​ប្រជាជន​នីការ៉ាហ្គា​ និង​ឱ្យ​រដ្ឋាភិបាល ​Ortega-Murillo ​ទទួលខុសត្រូវ»។​

នៅក្នុង​សុន្ទរកថា​រាយការណ៍​ដោយ​បណ្តាញ​ព័ត៌មាន​ La Voz del Sandinismo ​ដែល​គាំទ្រ​លោក​ Ortega ​ អ្នកស្រី​អនុប្រធានាធិបតី ​Murillo ​ត្រូវ​បាន​ដក​ស្រង់​សម្តី​ថា​ ការ​បោះឆ្នោត​នោះ​ មាន​យុត្តិធម៌។​ អ្នកស្រី​ថា ​«យើង​ទទួល​បាន​សន្លឹក​ឆ្នោត​ទាំងនេះ​ដោយ​ភាព​ថ្លៃថ្នូរ​ និង​ការ​ទទួល​ខុសត្រូវ​ខ្ពស់។ ​មាន​ការងារ​ជាច្រើន​ដែល​យើង​ត្រូវ​ធ្វើ​ ដើម្បី​បំពេញ​តាម​សេចក្តី​ប្រាថ្នា ​និង​ក្តី​សុបិន​របស់​គ្រួសារ​នីការ៉ាហ្គា»។​

អ្នកស្រី​ថា អ្នកស្រី​ និង​ស្វាមី​ បាន​ទទួល​សារ​អបអរសាទរ​ពី​ប្រទេស​រុស្ស៊ី ​គុយបា ​វ៉េណេស៊ុយអេឡា​ និង​បូលីវី។​

អង្គការ​ព័ត៌មាន​អន្តរជាតិ​ជាច្រើន ​មិន​អាច​ចូល​ទៅ​ក្នុង​ប្រទេស​នីការ៉ាហ្គា​ដើម្បី​រាយ​ការណ៍​អំពី​ការ​បោះឆ្នោត​នោះ​ទេ៕

XS
SM
MD
LG