ប្រធានាធិបតីសហរដ្ឋអាមេរិកលោក Joe Biden កាលពីថ្ងៃសុក្របានសុំអភ័យទោសជាសាធារណៈលើកដំបូងដល់ប្រទេសអ៊ុយក្រែន ស្តីពីជំនួយយោធាអាមេរិកដល់ប្រទេសអ៊ុយក្រែនដែលត្រូវបានជាប់គាំងជាច្រើនខែ នៅសភាអាមេរិក ដែលធ្វើឱ្យរុស្ស៊ីអាចជំរុលទៅមុខ នៅក្នុងសមរភូមិប្រយុទ្ធ ខណៈពេលដែលប្រធានាធិបតីអ៊ុយក្រែន លោក Volodymyr Zelenskyy បានអំពាវនាវឱ្យមានគាំទ្រពីគណបក្សធំៗទាំងពីររបស់អាមេរិក ដូចអ្វីដែលអាមេរិកបានជួយក្នុងសង្គ្រាមលោកលើកទី ២ ដូច្នោះដែរ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
ថ្លែងក្នុងទីក្រុងប៉ារីសប្រទេសបារាំង មួយថ្ងៃក្រោយពីចូលរួមក្នុងពិធីរម្លឹកខួបអនុស្សារីយ៍លើកទី ៨០ ឆ្នាំនៃការប្រហារឡើងគោកក្នុងតំបន់ Normandy ដែលគេហៅថាជាទិវា D-Day នោះ លោក Biden បានសុំអភ័យទោសដល់ប្រជាពលរដ្ឋអ៊ុយក្រែន ដែលមិនបានដឹងអស់រយៈពេលជាច្រើនសប្តាហ៍ថា តើនឹងមានជំនួយបន្ថែមទៀតឬក៏អត់នោះ ខណៈដែលក្រុមសមាជិកសភាអភិរក្សនិយមនៃគណបក្សសាធារណរដ្ឋបានព្យួរកញ្ចប់ទឹកប្រាក់ជំនួយយោធាចំនួន ៦១ ពាន់លានដុល្លារអាមេរិក សម្រាប់ប្រទេសអ៊ុយក្រែនអស់រយៈពេលប្រមាណ ៦ ខែ។
បើទោះបីជាយ៉ាងនេះក្តី ក៏ប្រធានាធិបតីមកគណបក្សប្រជាធិបតេយ្យរូបនេះ នៅតែថ្លែងទទូចថា ពលរដ្ឋអាមេរិកាំងនៅតែឈរជាមួយប្រទេសអ៊ុយក្រែនក្នុងអំឡុងពេលនោះ។ លោកនិយាយថា៖ «យើងស្ថិតនៅជាមួយអ៊ុយក្រែនទាំងស្រុងនិងដោយម៉ឺងម៉ាត់»។
ការសុំអភ័យទោសរបស់លោក Biden និងការសុំអង្វករឱ្យមានការគាំទ្រដ៏រឹងមាំរបស់លោក Zelenskyy ដល់ក្រុមចម្រុះសម្ព័ន្ធមិត្តក្នុងសង្គ្រាមលោកលើកទី ២ ជាការរម្លឹកដាស់តឿនមួយថា ការលើកឡើងរបស់លោក Biden ក្នុងការតាំងចិត្តដែលមានការយឺតយ៉ាវ ភាពរឹងរូសក្នុងចំណោមសមាជិកសភាអាមេរិកនៃគណបក្សសាធារណរដ្ឋ និងការចង់ទុកឱ្យឯកោក្នុងនយោ បាយអាមេរិក បាននាំទៅដល់ការរុលទៅមុខកាន់តែខ្លាំងនៃកងកម្លាំងរុស្ស៊ីក្នុងសមរភូមិប្រយុទ្ធ។
លោក Zelenskyy បានស្នើសុំដោយទទូចឱ្យមានការគាំទ្រពីអាមេរិក លើប្រព័ន្ធការពារដែនអាកាសរបស់ខ្លួន ប្រឆាំងនឹងការឈ្លានពានរបស់រុស្ស៊ី និងបានអរគុណដល់សមាជិកសភាអាមេរិក ដែលបានមូលមតិគ្នាអនុម័តយល់ព្រមផ្តល់ជំនួយជាអាវុធ ដែលអាចធ្វើឱ្យអ៊ុយក្រែន អាចទប់ស្កាត់បានពីការរុលទៅមុខរបស់កងយោធារុស្ស៊ីនៅក្នុងសមរភូមិក្នុងរយៈពេលប៉ុន្មានសប្តាហ៍ថ្មីៗនេះ៕
វេទិកាបញ្ចេញមតិ