ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

អាមេរិក​ដាក់​ទណ្ឌកម្ម​លើ​ហិរញ្ញវត្ថុ​រដ្ឋាភិបាល​បេឡារុស​របស់​លោក ​Lukashenko


ប្រធានាធិបតី​បេឡារុស លោក Alexander Lukashenko ថ្លែង​ទៅ​កាន់​​អ្នកកាសែត​ ក្នុង​សន្និសីទ​កាសែត​មួយ នៅ​រដ្ឋធានី​ Minsk ប្រទេស​បេឡារុស ថ្ងៃទី២០ ខែធ្នូ ឆ្នាំ២០១០។

សហ​រដ្ឋ​អាមេរិក​ ដោយ​សហការ​ជា​មួយ​ចក្រភព​អង់គ្លេស ​និង​ប្រទេស​កាណាដា​ បាន​ដាក់​ចេញ​ផែន​ការ​ទណ្ឌកម្ម​ថ្មី​លើ​ប្រទេស​បេឡារុស​កាល​ពី​ថ្ងៃ​ច័ន្ទ​ នៅ​ខួប​មួយ​ឆ្នាំ​នៃ​ការ​ចាប់​ផ្តើម​ត៉វា​ប្រឆាំង​លទ្ធផល​បោះ​ឆ្នោត​នៅ​ក្នុង​ប្រទេស​នេះ​ ដែល​ត្រូវ​បាន​គេ​មើល​ឃើញ​ជា​ទូទៅ​ថា​ មាន​ការ​លួច​បន្លំ​នោះ។

ចាប់​តាំង​ពី​ពេល​នោះ​មក​ ​ប្រធានាធិបតី​បេឡារុស​លោក​ Alexander Lukashenko​ បាន​ប្រើ​សកម្ម​យ៉ាង​ឃោរឃៅ​លើ​ក្រុម​អ្នក​តវ៉ា​ដោយ​សន្តិវិធី​ និង​ក្រុម​ប្រឆាំង​នយោបាយរបស់​លោក។​

ប្រធានាធិបតី​អាមេរិក​លោក​ Joe Biden ​បាន​លើក​ឡើង​ក្នុង​សេចក្តី​ថ្លែង​ការណ៍​ថា​ «ដោយ​មិន​គោរព​ឆន្ទៈ​ដ៏​ច្បាស់លាស់​របស់​ពលរដ្ឋ​បេឡារុស របប​លោក​ Lukashenko ​បាន​ប្រព្រឹត្ត​ការ​លួច​បន្លំ​សន្លឹក​ឆ្នោត​ និង​បន្ទាប់​មក​ទៀត​ បាន​បើក​យុទ្ធនាការ​យ៉ាង​ឃោរឃៅ​បង្ក្រាប​អ្នក​ប្រឆាំង។​

ដោយ​ចាប់​ឃុំ​ខ្លួន​អ្នក​តវ៉ា​ដោយ​សន្តិវិធី​រាប់​ពាន់​នាក់​ និង​ឃុំឃាំង​សកម្មជន ​សង្គម​ស៊ីវិល​ អ្នក​សារព័ត៌មាន​ និង​ អ្នក​ទោស​នយោបាយ​ជាង​៥០០​នាក់​ ព្រមទាំង​បង្ខំ​ឲ្យ​យន្តហោះ​ដឹក​អ្នក​ដំណើរ​បរទេស​មួយ​គ្រឿង​ចុះ​ចត​ក្នុង​ទឹក​ដី​របស់​ខ្លួន​ផ្ទុយ​ពី​បទដ្ឋាន​ជា​សាកល​នោះ​ សកម្មភាព​របស់​របប​លោក Lukashenko ​គឺ​ជាការ​ប្រឹង​ប្រែង​ខុស​ច្បាប់​ក្នុង​ការ​បន្ត​កាន់​អំណាច​ ទោះ​ខាត​បង់​យ៉ាងណា​ក៏ដោយ»។​

ទណ្ឌ​កម្ម​របស់​រដ្ឋាភិបាល​ក្រុង​វ៉ាស៊ីនតោន​ ​កាណាដា​ និង​ចក្រភព​អង់គ្លេស​នេះ​គឺ​សំដៅ​ទៅ​លើ​ឧស្សាហ​កម្ម​សំណង់​ ថាមពល​ រ៉ែ​ប៉ូតាស្យូម ​និង​ឧស្សាហ​កម្ម​ថ្នាំ​ជក់​របស់​រដ្ឋាភិបាល​លោក​ Lukashenko​ ដែល​ក្រសួង​ហិរញ្ញវត្ថុ​អាមេរិក​ពណ៌នា​ថា ​ជា​«ប្រភព​ចំណូល​ដ៏​សំខាន់»​របស់​រដ្ឋាភិបាល​លោក​ Lukashenka។​ ​

រដ្ឋមន្ត្រី​ក្រសួង​ហិរញ្ញ​វត្ថុ​អាមេរិក​ អ្នក​ស្រី ​Janet Yellen ​បាន​បញ្ជាក់​នៅ​ក្នុង​សេចក្តី​ថ្លែង​ការណ៍​ថា​ «រួម​ជាមួយ​ដៃគូ​គឺ​ប្រទេស​កាណាដា ​និង​ចក្រភព​អង់គ្លេស​ ​នៅ​ថ្ងៃ​នេះ​យើង​កំពុង​បង្ហាញ​ការ​បន្តថ្កោល​ទោស​ជា​អន្តរជាតិ​ប្រឆាំង​សកម្មភាព​របស់​របប​លោក ​Lukashenko​ ដែល​ផ្ទុយ​លទ្ធិ​ប្រជា​ធិបតេយ្យ»៕

XS
SM
MD
LG