ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កងកម្លាំង​បដិបក្ខ​ស៊ូដង់​ប្រកាស​បទឈប់​បាញ់​ថ្មី​មួយ​រយៈពេល​២៤ម៉ោង​ក្រោយ​ការប៉ុនប៉ង​មិន​បាន​ជោគជ័យ​កាលពី​ថ្ងៃអង្គារ


រថយន្ត​ក្រុង​ដែល​ត្រូវបាន​បំផ្លាញ​នៅ​ភាគ​ខាងត្បូង​រដ្ឋធានី​ខាទុំ នៅ​ថ្ងៃទី១៩ ខែមេសា ឆ្នាំ២០២៣ ក្នុង​ពេល​មាន​ការប្រយុទ្ធគ្នា​រវាង​កងយោធពល​ស៊ូដង់​និង​កង​កម្លាំង​គាំទ្រ​រហ័ស។
រថយន្ត​ក្រុង​ដែល​ត្រូវបាន​បំផ្លាញ​នៅ​ភាគ​ខាងត្បូង​រដ្ឋធានី​ខាទុំ នៅ​ថ្ងៃទី១៩ ខែមេសា ឆ្នាំ២០២៣ ក្នុង​ពេល​មាន​ការប្រយុទ្ធគ្នា​រវាង​កងយោធពល​ស៊ូដង់​និង​កង​កម្លាំង​គាំទ្រ​រហ័ស។

កងកម្លាំងជា​គូបដិបក្ខ​ដែល​ប្រយុទ្ធគ្នា​តាមផ្លូវ​ថ្នល់ក្នុង​រដ្ឋធានីនៃ​ប្រទេស​ស៊ូដង់បាន​ប្រកាស​ការឈប់បាញ់គ្នា​ថ្មី​មួយ​មាន​រយៈពេល​២៤​ម៉ោងកាលពី​ថ្ងៃពុធ ​មួយ​ថ្ងៃ​ក្រោយ​ការ​ប៉ុនប៉ងធ្វើ​ដូច្នេះ​មិន​បានជោគជ័យ​កាលពី​ថ្ងៃអង្គារ។

កងយោធពល​ស៊ូដង់និងកង​កម្លាំង​គាំទ្រ​រហ័សហៅ​ RSF​ បានប្រកាសដាច់ពី​គ្នា​ថា​ពួក​គេ​នឹងឈប់​ប្រយុទ្ធ​គ្នាជា​បណ្តោះអាសន្នដោយ​ចាប់ផ្តើម​ពីម៉ោង៦​ល្ងាច​តាមម៉ោង​មូលដ្ឋាន។​

មានរបាយការណ៍​ថា ​មានការប្រយុទ្ធ​គ្នា​យូរៗ​ម្តងនៅ​ក្រោយ​បទឈប់បាញ់គ្នា​ចូល​ជា​ធរមាន។

នៅ​រដ្ឋធានីវ៉ាស៊ីនតោន អ្នកនាំពាក្យ​សេតវិមាន​លោកស្រី Karine Jean-Pierre បាន
អំពាវនាវដល់ភាគី​ទាំងពីរឱ្យ​គោរព​តាម​ការឈប់បាញ់គ្នា​នេះ ​ដោយ«បញ្ឈប់អំពើ​ហិង្សានិង​វិល​ត្រឡប់ទៅ​កាន់​ការ​ចរចា​គ្នា​វិញ‍»។ លោក​ស្រី​បាន​និយាយថា​ ​នាយ​ឧត្តមសេនីយ៍ជាន់ខ្ពស់​ពីរ​នាក់​ដែល​កងកម្លាំង​ពួក​គេបានធ្វើ​រដ្ឋធានី​ឱ្យ​ក្លាយ​ទៅ​ជាតំបន់​សង្គ្រាម​កាលពី​ប្រាំថ្ងៃ​កន្លង​ទៅ​នេះ «ជាអ្នកទទួលខុស​ត្រូវក្នុង​ការការពារ​ក្រុម​ជនស៊ីវិល និង​ពួក​ជនមិន​មែន​ជា​អ្នក​ប្រយុទ្ធ‍»។

គេ​រាយការណ៍​ថា ​មានការប្រយុទ្ធគ្នា​ខ្លាំង​កាល​ពី​ព្រឹក​ថ្ងៃ​ពុធនៅ​ជុំវិញ​ទីបញ្ជាការ​ធំនៃ​កង​យោធាក្នុង​ក្រុង​ Khartoum ដោយ​មានកងយន្តហោះ​ប្រតិកម្ម​យោធា​វាយប្រហារតាម​អាកាសលើ​កងកម្លាំង RSF ​ដែលប៉ុនប៉ងត្រួតត្រាបញ្ជាការដ្ឋាន​នោះ។

ផ្លូវ​ថ្នល់​ក្នុង​រដ្ឋធានីមានតែពួកអ្នកប្រយុទ្ធនិង​មនុស្សដែល​ប៉ុនប៉ងរត់គេច​ចេញ​ពី​ទីក្រុង​នេះ ​ខ្លះដោយថ្មើរជើង​ និង​ខ្លះជិះ​យានយន្ត។ អ្នក​ក្រុង​ភាគ​ច្រើន​ឋិត​ក្នុងផ្ទះ​ដើម្បី​ចៀសវាង​ពី​ការប្រយុទ្ធគ្នា ​ដោយ​ទ្រាំទ្រ​នឹង​ការ​ដាច់ភ្លើង និងការខ្វះ​ស្បៀងអាហារ។​

ទីភ្នាក់ងារសុខភាព​អ.ស.ប.បាន​និយាយថា ​ការប្រយុទ្ធ​គ្នា​បាន​បណ្តាល​ឱ្យ​មនុស្ស​ជិត​៣០០​នាក់​ស្លាប់​ក្នុងពេល​ប្រាំ​ថ្ងៃ​មុន​នេះ តែចំនួន​មនុស្ស​ស្លាប់​ទំនង​ជា​ច្រើន​ជាង​នេះ​ ពីព្រោះ​សាកសព​មនុស្ស​ច្រើន​នាក់​បានបន្សល់ទុក​តាម​ផ្លូវ​ថ្នល់ ​ពីព្រោះមិនអាច​យក​ចេញ​បានដោយសារ​មានការប្រយុទ្ធ​គ្នា៕

ព័ត៌មាន​ខ្លះ​នៅ​ក្នុង​សេចក្ដី​រាយការណ៍​នេះ​ត្រូវ​បាន​ដកស្រង់​មកពី​ទីភ្នាក់ងារ​សារព័ត៌មាន AP, AFP និង ​Reuters។

XS
SM
MD
LG