វេជ្ជបណ្ឌិតមួយក្រុមនៅក្នុងប្រទេសស៊ូដង់បានរាយការណ៍នៅព្រឹកថ្ងៃចន្ទនេះថា ចំនួនជនស៊ីវិលដែលបានស្លាប់នៅក្នុងការប្រយុទ្ធគ្នារវាងយោធាស៊ូដង់និងកងកម្លាំងទាហានប៉ារ៉ាបានកើនឡើងរហូតដល់យ៉ាងតិច ៩៧ នាក់ ហើយជនស៊ីវិលដែលរងរបួសមានចំនួន ៣៦៥ នាក់។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។ ចំណែកឯសេចក្ដីរាយការណ៍ផ្សេងទៀតបានបញ្ជាក់ថា មនុស្សរហូតដល់ ៦០០ នាក់បានរងរបួស។
ការប្រយុទ្ធគ្នាបានផ្ទុះឡើងកាលពីថ្ងៃសៅរ៍រវាងកងយោធាដែលស្មោះស្ម័គ្រជាមួយនឹងលោកនាយឧត្តមសេនីយ៍ Abdel Fattah al-Burhan ដែលជាប្រធានក្រុមប្រឹក្សាអធិបតេយ្យអន្តរកាលរបស់ប្រទេសស៊ូដង់ និងកងកម្លាំងជំនួយរហ័ស (RSF) ទាហានប៉ារ៉ា ដែលដឹកនាំដោយលោកនាយឧត្តមសេនីយ៍ Mohamed Hamdan Dagalo ដែលជាអនុប្រធាននៃក្រុមប្រឹក្សានេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters។
អង្គការសហប្រជាជាតិបានប្រកាសបទឈប់បាញ់គ្នារយៈពេល ៣ ម៉ោងកាលពីល្ងាចថ្ងៃអាទិត្យរវាងក្រុមទាំងពីរ ប៉ុន្តែអ្នកស្រុកបានប្រាប់ប្រព័ន្ធផ្សព្វផ្សាយថា គេអាចឮការផ្ទុះខ្លាំងក្លានិងស្នូរកាំភ្លើងជាបន្ត ក៏ដូចជាការវាយប្រហារតាមអាកាសលើទីតាំងក្រុមកងកម្លាំង RSF កាលពីយប់ថ្ងៃអាទិត្យ។
កាលពីព្រឹកថ្ងៃអាទិត្យ គេអាចឮស្នូរកាំភ្លើងខ្លាំងក្លានៅក្នុងតំបន់កណ្ដាលក្រុងនៃរដ្ឋធានី Khartoum នៅម្ដុំទីស្នាក់ការកណ្ដាលរបស់យោធាស៊ូដង់និងវិមានប្រធានាធិបតី។
ទាំងយោធាស៊ូដង់និងក្រុមកងកម្លាំង RSF សុទ្ធតែអះអាងថាជាអ្នកត្រួតត្រាទីតាំងយុទ្ធសាស្ត្រទាំងនេះ។
រដ្ឋមន្ត្រីការបរទេសសហរដ្ឋអាមេរិកលោក Antony Blinken និងរដ្ឋមន្ត្រីការបរទេសចក្រភពអង់គ្លេសលោក James Cleverly បានអំពាវនាវឱ្យមាន «ការបញ្ឈប់ជាបន្ទាន់នូវអំពើហិង្សា» នៅក្នុងប្រទេសស៊ូដង់ និងបានជំរុញភាគីទាំងសងខាងឱ្យត្រឡប់មកចរចាគ្នា។ លោក Blinken និងលោក Cleverly បានលើកឡើងដូច្នេះនៅក្រៅកិច្ចប្រជុំរបស់ក្រុមប្រទេស G-7។
អគ្គលេខាធិការអង្គការសហប្រជាជាតិលោក Antonio Guterres បានថ្កោលទោសការប្រយុទ្ធគ្នារវាងយោធាស៊ូដង់និងកងកម្លាំងទាហានប៉ារ៉ានេះថាបានសម្លាប់បុគ្គលិក ៣ នាក់នៃកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ៕
(ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, Reuters និង AFP)
