មន្រ្តីនៃក្រសួងរៀបចំដែនដី នគរូបនីយកម្ម និងសំណង់ នឹងចុះធ្វើអធិការកិច្ច ទៅលើបណ្តឹងដែលស្នើសុំផ្លាស់ប្តូរប្រធានមន្ទីររៀបចំដែនដីប្រចាំខេត្តបន្ទាយមានជ័យ គឺលោក អាង ណារិទ្ធ។ នេះបើតាមមន្រ្តីជាន់ខ្ពស់នៃក្រសួងរៀបចំដែនដី។
កាលពីពេលថ្មីៗនេះ មន្រ្តីនៃមន្ទីររៀបចំដែនដីជាង៣០នាក់ ដោយរួមមានអនុប្រធានមន្ទីរ អនុប្រធានការិយាល័យ និងមន្រ្តីផ្សេងទៀត បានដាក់លិខិតមួយទៅរដ្ឋមន្រ្តីក្រសួងរៀបចំដែនដី លោក សាយ សំអាល់ ដោយស្នើសុំផ្លាស់ប្តូរលោក អាង ណារិទ្ធ ក្រោមហេតុផលថាមន្រ្តីដែលស្ថិតក្រោមឱវាទបានជួបការលំបាកក្នុងអនុវត្តការងារជាខ្លាំង ហើយថែមទាំងមានការប្រព្រឹត្តអំពើពុករលួយថែមទៀតផង។
លិខិតដែលមានស្នាមមេដៃនិងឈ្មោះរបស់មន្រ្តីមានអត្ថន័យដើមថា៖ «ចាប់តាំងពីថ្ងៃប្រកាសចូលកាន់តំណែង (ថ្ងៃទី១៧ ខែកញ្ញា ឆ្នាំ២០១៩) របស់លោក អាង ណារិទ្ធ ជាប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តបន្ទាយមានជ័យ រហូតមកដល់បច្ចុប្បន្ន ក្រោមការដឹកនាំរបស់លោកប្រធានមន្ទីររូបនេះធ្វើឱ្យមន្ត្រីក្រោមឱវាទទាំងអស់ជួបការលំបាកជាខ្លាំងក្នុងការអនុវត្តការងារដូចជា គ្មានភាពជាអ្នកដឹកនាំ គ្មានសាមគ្គីផ្ទៃក្នុង គ្មានសីលធម៌ គ្មានគុណធម៌ មានចរិតឆេវឆាវ ច្រឡោងខាម មានតែការគំរាមកំហែង សម្តីអសុរោះ ប្រមាថមាក់ងាយអ្នកក្រោមឱវាទទាំងអស់ និងអែបអបសម្តែងជាមួយអ្នកធំ។ ពុំមានទំនួលខុសត្រូវលើកិច្ចការងារដែលខ្លួនបញ្ជាឱ្យកូនចៅធ្វើ នៅពេលមានកំហុសបែរជាមិនទទួលខុស ហើយអត្តនោម័តិតែម្នាក់ឯង»។
លិខិតដដែលបន្ថែមថា៖ «[ប្រធានមន្ទីរ]តម្រូវឱ្យប្រជាពលរដ្ឋបង់លុយចំនួន៥០ដុល្លារ លើការចុះហត្ថលេខាបញ្ជាក់ថតចម្លងត្រឹមត្រូវលើទម្រង់បែបបទប្រមូលទិន្នន័យក្បាលដីក្នុង១ក្បាលដី ដែលត្រូវយកទៅបង់ពន្ធប្រថាប់ត្រា នៅសាខាពន្ធដារខេត្ត តម្រូវឱ្យប្រជាពលរដ្ឋបង់លុយចំនួន ១០០ដុល្លារលើការចុះហត្ថលេខា ចេញដីកាអមលើកទី២ ជំនួសដីកាអមលើកទី១ដែលអស់សុពលភាព»។
អ្នកនាំពាក្យក្រសួងដែនដី នគរូបនីយកម្ម និងសំណង់ លោក សេង ឡូត ប្រាប់វីអូអេតាមប្រព័ន្ធទំនាក់ទំនងតេឡេក្រាមនៅថ្ងៃចន្ទថាក្រុមការងារក្រសួងដែនដីនឹងចុះត្រួតពិនិត្យលើករណីនេះនៅថ្ងៃទី៦ ខែធ្នូនេះ។
បើតាមលិខិតដែលចុះនៅថ្ងៃទី៤ ខែតុលា ឆ្នាំ២០២៣ លោក អាង ណារិទ្ធ ប្រធានមន្ទីររៀបចំដែនដីបានកាត់ប្រាក់រង្វាន់មន្ត្រីក្របខណ្ឌនៃមន្ទីរដែលបម្រើការងារចុះបញ្ជីដីធ្លីមានលក្ខណៈជាប្រព័ន្ធ ដោយនិយាយថាពួកគេចុះវាស់មុខជាបានទទួលផលប្រយោជន៍ពីប្រជាពលរដ្ឋ ធ្វើឱ្យប៉ះពាល់ដល់អារម្មណ៍មន្ត្រីក្នុងការផ្តល់សេវាសាធារណៈជូនប្រជាពលរដ្ឋលើការងារចុះបញ្ជីដីធ្លីនាំឱ្យមានដំណើរការយឺតយ៉ាវ។ បើតាមលិខិតនោះ នៅពេលមានកំហឹង ប្រធានមន្ទីររៀបចំដែនដីរូបនោះក៏បានបោះសំណុំឯកសារចោលនៅចំពោះមុខមន្ត្រី។
ក្រុមមន្រ្តីបញ្ជាក់ក្នុងលិខិតថា៖ «អស់រយៈពេល៤ឆ្នាំកន្លងមក ទោះជាមន្រ្តីគ្រប់រូបខិតខំបំពេញការងារអស់ពីសមត្ថភាពរៀងៗខ្លួនហើយ ក៏នៅតែខុសនិងស្តីបន្ទោសរហូត ដែលបណ្តាលឱ្យមន្រ្តីសព្វថ្ងៃបាក់ទឹកចិត្តក្នុងការបំពេញការងារ និងពុំអាចស៊ូទ្រាំចំពោះទង្វើទាំងអស់របស់បុគ្គលរូបនេះបានតទៅទៀត»។
អ្នកស្រី ធូ វឌ្ឍនា អនុប្រធានមន្ទីររៀបចំដែនដីខេត្តបន្ទាយមានជ័យ ប្រាប់វីអូអេថាអ្នកស្រីសុំមិនអត្ថាធិប្បាយបន្ថែមក្រៅពីអ្វីដែលបានសរសេរនៅក្នុងលិខិត ដោយអ្នកស្រីរង់ចាំចំណាត់ការពីក្រសួង។
លោក អាង ណារិទ្ធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ ប្រាប់វីអូអេថាលោកក៏រង់ចាំការចុះអធិការកិច្ចរបស់ក្រសួងដែនដីចំពោះករណីមួយនេះ ហើយលើកឡើងថាលោកមិនបានប្រព្រឹត្តកំហុសអ្វីមួយឡើយ។
លោកថ្លែងថា៖ «ហើយទុកឱ្យខាងក្រសួងរៀបចំដែនដីគេនឹងចុះទៅនៅថ្ងៃទី៦នេះ អ៊ីចឹងទុកឱ្យខាងក្រសួងគេមានការចុះអធិការកិច្ច គេចុះអធិការកិច្ចទៅ ហើយខ្ញុំមិនឆ្លើយតបអីទេ។ ហើយចំពោះអារម្មណ៍ខ្ញុំក៏ធម្មតា ខ្ញុំគិតថាខ្ញុំអត់មានខុសអីផង ខ្ញុំធម្មតាបាទ»។
លោក អាង ណារិទ្ធ បានឡើងកាន់តំណែងជាប្រធានមន្ទីររៀបចំដែនដីខេត្តបន្ទាយមានជ័យ ចាប់តាំងពីឆ្នាំ២០១៩ ក្រោយដកតំណែងលោក ប្រាក់ ប៉ូលី អតីតប្រធានមន្ទីរដែលពាក់ព័ន្ធនឹងរឿងអាស្រូវពុករលួយ និងបក្ខពួកនិយម។
លោក លី សុវណ្ណារិទ្ធ អភិបាលរង និងជាអ្នកនាំពាក្យសាលាខេត្តបន្ទាយមានជ័យ ប្រាប់វីអូអេថាប្រសិនបើអ្វីដែលបានលើកឡើងក្នុងពាក្យបណ្ដឹងនោះជាការពិត ក្រសួងនឹងចាត់វិធានការតាមនីតិវិធី។
លោក លី សុវណ្ណរិទ្ធ ថ្លែងថា៖ «ខាងក្រសួងគេចុះមកធ្វើសិក្ខាកិច្ច ដើម្បីពិនិត្យមើលបណ្ដឹងហ្នឹង តើវាពិត ឬមិនពិត»។
លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា ប្រាប់វីអូអេថាការដាក់លិខិតរបស់មន្រ្តីបែបនេះ គឺជាសំឡេងមួយ ដើម្បីទាមទារឱ្យមានដំណោះស្រាយទៅលើការអនុវត្តតួនាទីរបស់មន្រ្ដី។
លោកថ្លែងថា៖ «ការដាក់ញត្តិទាមទារបែបនេះ ខ្ញុំគិតថាវាគឺជាចំណុចមួយដែលជាសំឡេងមួយដែលសហគមន៍អាចលើកឡើងបាន ហើយយើងចង់ឃើញមានការដោះស្រាយដែលព្រោះអីយើងមើលទៅថាអភិក្រមនៅក្នុងការអនុវត្តតួនាទីរបស់មន្រ្ដីដែលមានការសម្រេចចិត្តធំបែបនេះ គួរតែត្រូវបានយកចិត្តទុកដាក់»។
លោក សន ជ័យ ជំរុញឱ្យមន្រ្ដីដែលបម្រើពលរដ្ឋគួរតែអនុវត្តទៅតាមគោលការណ៍ដែលមាន ជាពិសេសមធ្យោបាយល្អៗក្នុងការប្រាស្រ័យទាក់ទងជាមួយពលរដ្ឋ និងអ្នកពាក់ព័ន្ធ ស្របតាមសីលធម៌ និងគោលការណ៍ ដើម្បីធានាបានសុខដុមរមនានៅក្នុងសង្គម៕
មន្រ្តីនឹងចុះអធិការកិច្ចលើបណ្តឹងស្នើសុំផ្លាស់ប្តូរប្រធានមន្ទីររៀបចំដែនដីខេត្តបន្ទាយមានជ័យ
ភ្នំពេញ —
