រដ្ឋាភិបាលបង់ក្លាដែសបានប្រកាសពីការដំឡើងប្រាក់ឈ្នួលអប្បបរមាសម្រាប់កម្មកររោងចក្រកាត់ដេរ កាលពីពេលថ្មីៗនេះ ក្នុងកម្រិត ៥៦ ភាគរយ គឺស្មើនឹង ១១៣ ដុល្លារ ក្នុងមួយខែ។
កម្រិតប្រាក់ខែអប្បបរមាថ្មីនេះ ត្រូវបានដំឡើងបន្ទាប់ពីមានបាតុកម្មហិង្សាជាច្រើនត្រូវបានរៀបចំឡើងដោយកម្មករដែលទាមទារប្រាក់ខែខ្ពស់ជាងមុន ដែលបណ្ដាលឲ្យកម្មករពីរនាក់បានស្លាប់ និង ច្រើននាក់ទៀតបានរងរបួស។
ការដំឡើងប្រាក់ខែនេះ ត្រូវបានយល់ព្រមដោយក្រុមម្ចាស់រោងចក្រ ប្រធានសហជីពកម្មករ និង មន្ត្រីរដ្ឋាភិបាល។ ប៉ុន្តែ ទំហំទឹកប្រាក់ដែលត្រូវបានដំឡើងទទួលរងការរិះគន់ថាមានកម្រិតស្ដួចស្ដើងពេក ខណៈពេលដែលអតិផរណានៅបង់ក្លាដែស កំពុងកើនក្នុងកម្រិត ៩.៥ ភាគរយ ដោយសារតែការឡើងថ្លៃទំនិញដែលជាតម្រូវការមូលដ្ឋានរបស់ប្រជាជន។
ក្រុមកម្មករដែលបានធ្វើបាតុកម្ម បានទាមទារប្រាក់ខែ ២០៨ ដុល្លារក្នុងមួយខែ។ ក្រុមបាតុករបានប៉ះទង្គិចជាមួយអាជ្ញាធរ និង បានវាយប្រហារទៅលើរោងចក្រមួយចំនួន។
បាតុកម្មនានាបានផ្ទុះឡើងនៅពេលដែលសមាគមម្ចាស់រោងចក្រកាត់ដេរ និង អ្នកនាំចេញបង់ក្លាដែស ពីដំបូងឡើយបានយល់ព្រមដំឡើងប្រាក់ខែតែ ២៥ ភាគរយ ឬ ស្មើនឹង៩០ ដុល្លារប៉ុណ្ណោះក្នុងមួយខែ។
ប្រាក់ខែទាបក្នុងប្រទេសបង់ក្លាដែស បានជំរុញឲ្យមានកំណើននៅក្នុងឧស្សាកម្មកាត់ដេរនៃប្រទេសនេះ ស្របពេលដែលផលិតកម្ម និង ការនាំចេញផលិតផលកាត់ដេរមានទំហំ ជិត១៦ ភាគរយនៃផលិតផលក្នុងស្រុកសរុបរបស់ប្រទេសនេះ។
បង់ក្លាដែស មានកម្មករចំនួន ៤ លាននាក់ដែលកំពុងបម្រើការនៅតាមរោងចក្រប្រមាណ ៣ ពាន់ ៥រយ នៅទូទាំងប្រទេស ហើយបច្ចុប្បន្ននេះ បង់ក្លាដែសគឺជាប្រទេសធំជាងគេទីពីរបន្ទាប់ពីចិន ផ្នែកផលិតផលកាត់ដេរ។ រោងចក្រកាត់ដេរនៅក្នុងប្រទេសនេះផ្គត់ផ្គង់ផលិតផលសម្លៀកបំពាក់យីហោល្បីៗ ដូចជា H&M និង Gap។
ក្រុមម្ចាស់រោងចក្រ បានវាយបកទៅលើការទាមទាររបស់ក្រុមបាតុករ ដោយនិយាយថា តម្លៃផលិតកម្មមានកម្រិតខ្ពស់ដោយសារតែការចំណាយផ្នែកថាមពល និង ការដឹកជញ្ជូន មានការកើនឡើង ស្របពេលដែលក្រុមហ៊ុនផលិតផលម៉ាកល្បីៗនៅលោកខាងលិចយល់ព្រមចំណាយតិចជាងមុនសម្រាប់ផលិតកម្ម។
ប្រទេសបង់ក្លាដែសនាំចេញផលិតផលរបស់ខ្លួនភាគច្រើនទៅកាន់ទ្វីបអឺរ៉ុប និង សហរដ្ឋអាមេរិក។ បច្ចុប្បន្ននេះ ប្រទេសនេះកំពុងស្វែងរកទីផ្សារបន្ថែមទៀតនៅប្រទេសចិន ឥណ្ឌា និង ជប៉ុន៕
(ព័ត៌មានខ្លះក្នុងសេចក្តីរាយការណ៍នេះ មានប្រភពមកពីទីភ្នាក់ងារសារព័ត៌មាន The Associated Press និងReuters។)
