ប្រធានាធិបតីសហរដ្ឋអាមេរិកកាលពីថ្ងៃព្រហស្បតិ៍ម្សិលមិញ បានអបអរកិច្ចព្រមព្រៀងសេដ្ឋកិច្ចថ្មីមួយ ក្នុងចំណោមប្រទេសចំនួន១៤ក្នុងតំបន់ប៉ាស៊ីហ្វិក ដើម្បីទប់ទល់ជាមួយនឹងការគ្រប់គ្រងសេដ្ឋកិច្ចរបស់ប្រទេសចិនក្នុងតំបន់នេះ ដោយលើកឡើងថា កិច្ចព្រមព្រៀងដែលមេដឹកនាំបានចុះហត្ថលេខាក្នុងកិច្ចប្រជុំកំពូលសេដ្ឋកិច្ចនេះនឹងដោះស្រាយបញ្ហាសំខាន់ៗ ដូចជាកង្វះខាតបន្ទះឈីប ក្នុងពេលអនាគត ដោយធ្វើឱ្យប្រសើរឡើងនូវភាពធន់មាំនៃសង្វាក់ផ្គត់ផ្គង់របស់វាផងដែរ។ ប៉ុន្តែកិច្ចព្រមព្រៀងនេះមិនមែនជាកិច្ចព្រមព្រៀងពាណិជ្ជកម្មផ្លូវការនោះឡើយ។
មេដឹកនាំទាំង១៤ប្រទេសនេះបាននិយាយក្នុងសេចក្តីថ្លែងការណ៍រួមមួយថា៖ «គោលបំណងនៃកិច្ចព្រមព្រៀងនេះ គឺដើម្បីលើកកម្ពស់សិទ្ធិកម្មករ បង្កើនសមត្ថភាពរបស់យើងដើម្បីទប់ទល់ និងការឆ្លើយតបទៅនឹងការរាំងស្ទះសង្វាក់ផ្គត់ផ្គង់ ពង្រឹងកិច្ចសហប្រតិបត្តិការលើអន្តរកាលឆ្ពោះទៅសេដ្ឋកិច្ចបរិសុទ្ធ និងការប្រយុទ្ធប្រឆាំងអំពើពុករលួយ និងធ្វើឱ្យប្រសើរឡើងនូវការគ្រប់គ្រងពន្ធដារឱ្យមានប្រសិទ្ធភាពផងដែរ»។
ប្រធានាធិបតីសហរដ្ឋអាមេរិកលោក Joe Biden កាលពីថ្ងៃព្រហស្បតិ៍ក៏បានថ្លែងប្រាប់មេដឹកនាំក្នុងស្រុកនិងប្រធានក្រុមហ៊ុននានា ដែលបានចូលរួមក្នុងកិច្ចប្រជុំកំពូលអាស៊ីប៉ាស៊ីហ្វិកថា សហរដ្ឋអាមេរិក មានការតាំងចិត្តទៅលើពាណិជ្ជកម្មនិងភាពជាដៃគូដែលមានបទដ្ឋានខ្ពស់ ដែលនឹងផ្តល់ផលប្រយោជន៍សេដ្ឋកិច្ចនៅទូទាំងតំបន់ប៉ាស៊ីហ្វិកទាំងមូល។ លោកបានប្រកាសថា៖ «យើងមិនទៅទីណាផ្សេងទេ»។
ដោយលើកបញ្ជាក់ពីកិច្ចប្រជុំដែលទើបបញ្ចប់ជាមួយប្រធានាធិបតីចិន លោក Xi Jinping លោក Biden បានប្រាប់មេដឹកនាំធុរកិច្ចទាំងនោះថា សហរដ្ឋអាមេរិកកំពុងលុបបំបាត់ហានិភ័យ បង្កើតភាពចម្រុះ និងមិនងាកចេញពីប្រទេសចិននោះឡើយ។ ប៉ុន្តែលោកក៏មិនភ្លេចប្រើពាក្យដែលមានន័យថា សហរដ្ឋអាមេរិក និងមិត្តភក្តិក្នុងតំបន់ប៉ាស៊ីហ្វិក អាចផ្តល់ជម្រើសធ្វើជំនួញដែលប្រសើរជាងប្រទេសចិនផងដែរ។ លោកក៏បានកត់សម្គាល់ផងដែរថា សហរដ្ឋអាមេរិក បានដាក់ទុនវិនិយោគប្រមាណ៥០ពាន់លានដុល្លារ ក្នុងកិច្ចសហប្រតិបត្តិការសេដ្ឋកិច្ចតំបន់អាស៊ីប៉ាស៊ីហ្វិកដែលជាមិត្ត ក្នុងឆ្នាំ២០២៣នេះ ដែលក្នុងនោះមានវិស័យថាមពលស្អាត បច្ចេកវិជ្ជា អាកាសចរណ៍ និងសន្តិសុខ។
លោក Biden និយាយថា៖ «វាមិនមែនជារឿងវែងឆ្ងាយអ្វីឡើយ តែជាការនិយាយដោយត្រង់។ យើងពិតជាមានការខ្វែងគំនិតគ្នាខ្លាំងជាមួយរដ្ឋាភិបាលក្រុងប៉េកាំង ជុំវិញការរក្សាភាពត្រឹមត្រូវនិងកម្រិតស្មើគ្នាខាងសេដ្ឋកិច្ច ក៏ដូចជាការការពារកម្មសិទ្ធបញ្ញាផងដែរ»។
លោកBiden ក៏បានផ្ញើសារយ៉ាងច្បាស់មួយផងដែរអំពីថ្នាក់ដឹកនាំអាមេរិក ខណៈមេដឹកនាំធុរកិច្ចនានា កំពុងប្រឈមនឹងហានិភ័យក្នុងការធ្វើជំនួញ ក្នុងពេលដែលកំពុងមានសង្គ្រាមក្នុងតំបន់មជ្ឈិមបូព៌ានិងអឺរ៉ុប ក៏ដូចជាស្ថានភាពសេដ្ឋកិច្ចដែលមិនទាន់នឹងនរនៅឡើយ ក្រោយជំងឺរាតត្បាតកូវីដ១៩នោះ។
លោកប្រធានាធិបតីអាមេរិកក៏បានជួបប្រជុំរួមគ្នាផងដែរកាលពីថ្ងៃព្រហស្បតិ៍ ជាមួយនាយករដ្ឋមន្ត្រីជប៉ុន លោក Fumio Kishida និងប្រធានាធិបតីកូរ៉េខាងត្បូងលោកYoon Suk Yeol នៅក្រៅជំនួបកិច្ចប្រជុំកំពូលនោះ៕
