លោកអគ្គលេខាធិការអង្គការសហប្រជាជាតិ បាន គីមួន (Ban Ki-moon) បានសរសើរការរីកចម្រើនរបស់ពិភពលោកនៅក្នុងការប្រយុទ្ធប្រឆាំងជំងឺអេដស៍ ក៏ប៉ុន្តែបានព្រមានថា ការរីកចម្រើននោះនៅផុយស្រួយនៅឡើយ។
នៅក្នុងសេចក្តីថ្លែងការណ៍នៅក្នុងទិវាប្រឆាំងជំងឺអេដស៍នៅថ្ងៃច័ន្ទនេះ លោកបានសង្កត់ធ្ងន់ពីសារៈសំខាន់នៃការដោះស្រាយគម្លាតនៅក្នុងការព្យាបាលជំងឺនោះ ជាពិសេសសម្រាប់កូនក្មេងនិងស្រ្តីក្មេងៗដែលមិនបានទទួលការថែទាំត្រឹមត្រូវ។
លោកអគ្គលេខាធិការអង្គការសហប្រជាជាតិ បានជំរុញមេដឹកនាំពិភពលោក ធ្វើអ្វីដែលជាការចាំបាច់ដើម្បីឈានទៅដល់គោលដៅលុបបំបាត់ជំងឺអេដស៍ ឱ្យបាននៅឆ្នាំ២០៣០។
នៅទូទាំងពិភពលោក មនុស្ស៣៥លាននាក់កំពុងរស់នៅដោយផ្ទុកមេរោគ HIV ដែលជាវីរុសបណ្តាលឲ្យកើតជំងឺ AIDS ។ អង្គការសហប្រជាជាតិ ប្រាប់ឲ្យដឹងថា មនុស្ស១៩លាននាក់នៃមនុស្សទាំងអស់នោះ មិនបានដឹងថាពួកគេបានឆ្លងមេរោគនោះទេ ហើយគេបានប្រើប្រាស់ទិវាប្រឆាំងជំងឺ AIDSនេះ ដើម្បីអំពាវនាវឱ្យបិទគម្លាតនៅក្នុងការធ្វើតេស្តសាកល្បងនិងលទ្ធភាពនៃការព្យាបាលប្រឆាំងនឹងមេរោគនេះ។
តំបន់វាលខ្សាច់សាហារ៉ាខាងត្បូងនៃទ្វីបអាហ្វ្រិក នៅតែមានចំនួនមនុស្សជាង៧០ភាគរយនៃចំនួនប្រជាជនបានឆ្លងមេរោគHIVទាំងអស់ ក៏ប៉ុន្តែការឆ្លងថ្មីនៃមេរោគនេះបានធ្លាក់ចុះដល់១ភាគ៣ចាប់តាំងពីឆ្នាំ២០០៥មក។
