បាតុកម្មមួយថ្ងៃទៀតនៅទីក្រុង បាល់ទីមរ ក្នុងរដ្ឋ Maryland អំពីមរណភាពរបស់យុវជនស្បែកខ្មៅឈ្មោះ Freddie Gray នៅក្នុងការឃុំឃាំងរបស់ប៉ូលិសបានចប់ដោយសន្តិភាព កាលពីយប់ថ្ងៃពុធ នៅពេលដែលអ្នកស្រុកបានគោរពបំរាមគោចរពេលយប់ ក្រោយពីកូដកម្មបានផ្ទុះឡើងនៅដើមសប្តាហ៍នេះ។
មេដឹកនាំសហគមន៍ រួមមានសមាជិករដ្ឋសភាសរអា លោក Elijah Cummings ដែលមណ្ឌលបោះឆ្នោតរបស់លោកមានរួមទីក្រុង បាល់ទីមរ នេះដែរ បានចេញទៅលើកទឹកចិត្តឲ្យក្រុមបាតុករត្រឡប់ទៅផ្ទុះវិញ មុនបំរាមគោចរចាប់ចូលជាធរមាននៅម៉ោង ១០ យប់។
នៅប៉ុន្មានម៉ោងមុននេះ បាតុករជាង ១ ពាន់នាក់ បានដើរកាត់ទីក្រុង បាល់ទីមរ ពីស្ថានីយរទេះភ្លើងធំរបស់ទីក្រុងនេះទៅសាលាក្រុង រួចត្រឡប់ទៅស្ថានីយវិញ។ ស្នងការប៉ូលិស ក្រុង បាល់ទីមរ បានរៀបរាប់ថា បាតុកម្មថ្ងៃនេះមាន«សភាពស្ងប់ស្មៀមជាទីបំផុត»។
ជីវភាពរស់នៅកំពុងវិលត្រឡប់ទៅរកភាពប្រក្រតីឡើងវិញបន្តិចម្តងៗនៅក្រុង បាល់ទីមរ ដែលត្រូវដាក់ឲ្យស្ថិតនៅក្រោមភាពមានអាសន្នតាំងពីថ្ងៃចន្ទមក នៅពេលដែលពួកបាតុករបានដុតហាងលក់អីវ៉ាន់និងរថយន្តច្រើនគ្រឿង និងលួចអីវ៉ាន់ពីហាងជាច្រើននៅក្នុងទីផ្សារមួយ នៅក្រោយបុណ្យសពរបស់យុវជន Freddie Gray ដែលមានវ័យ ២១ ឆ្នាំ៕
