កាលពីថ្ងៃពុធ លោកស្រីអភិបាលក្រុងបាល់ទីម័រ បានសុំឲ្យទីភ្នាក់ងារប្រតិបត្តិច្បាប់ជាន់ខ្ពស់សហរដ្ឋអាមេរិកធ្វើការស៊ើបអង្កេតថាតើក្រសួងប៉ូលិសរបស់ទីក្រុងនោះ ប្រើប្រាស់កម្លាំងនិងអំពើហិង្សាខ្លាំងហួសលើសិទ្ធិរបស់ពួកជនសង្ស័យកម្រិតព្រហ្មទណ្ឌមែនឬយ៉ាងណា។
លោកស្រីអភិបាលក្រុង Stephanie Rawlings-Blake បានធ្វើសំណើនេះមិនដល់មួយសប្តាហ៍ផង បន្ទាប់ពីមន្រ្តីប៉ូលិស៦នាក់បានរងការចោទប្រកាន់ពីការរំលោភខាងព្រហ្មទណ្ឌចំពោះតួនាទីរបស់ពួកគេនៅក្នុងការស្លាប់យុវជនអាមេរិកាំងដើមកំណើតអាហ្វ្រិកឈ្មោះ Freddie Grayអាយុ២៥ឆ្នាំដែលបានស្លាប់ដោយសាររបួសឆ្អឹងខ្នងកាលពីខែមុន ខណៈដែលស្ថិតនៅក្នុងការឃុំឃាំងរបស់ប៉ូលិស។ការស្លាប់របស់លោក បានបណ្តាលឲ្យមានកុប្បកម្មនិងការលួចទំនិញក្នុងទីក្រុងផ្នែកខាងកើតសហរដ្ឋអាមេរិក ហើយក្នុងការប្រឆាំងតវ៉ាអស់រយៈពេលប៉ុន្មានថ្ងៃប៉ូលិសបានប្រើប្រាស់យុទ្ធវិធីក្នុងការយាមល្បាតតាមផ្លូវនានាក្នុងទីក្រុងបាល់ទីម័រ។
ក្រសួងយុត្តិធម៌ បានប្រាប់ឲ្យដឹងថា លោកស្រី Loretta Lynch រដ្ឋមន្រ្តីក្រសួងយុត្តិធម៌ថ្មីកំពុងពិចារណាសំណើរបស់លោកស្រីអភិបាលក្រុង។ ទីភ្នាក់ងារនោះ បានធ្វើការស៊ើបអង្កេតពីសកម្មភាពរបស់ប៉ូលិសនៅក្នុងទីក្រុងផ្សេងៗទៀតហើយជារឿយៗ បានសន្និដ្ឋានថា ប៉ូលិសស្បែកសភាគច្រើនបានចាត់វិធានការដៃក្តៅនិងខុសច្បាប់ជាមួយមនុស្សនៅក្នុងសហគមន៍ជនជាតិភាគតិច ដែលបាននាំឲ្យមានការប្រឈមមុខដាក់គ្នាដ៏ប្រល័យនៅតាមផ្លូវ។
លោកស្រីអភិបាលក្រុងបានមានប្រសាសន៍ថា លោកស្រីចង់ឲ្យពួកអ្នកស៊ើបអង្កេតរបស់ក្រសួងយុត្តិធម៌ធ្វើការកំណត់ថាតើក្រសួងប៉ូលិសរបស់យើង បានទាក់ទិននៅក្នុងការអនុវត្តិការបញ្ឈប់ការឆែកឆេរឬការចាប់ខ្លួនដែលរំលោភសិទ្ធិស្របច្បាប់របស់ពលរដ្ឋ៕
