លោក Hubert Minnis នាយករដ្ឋមន្រ្តីបាហាម៉ាបានជំរុញយ៉ាងខ្លាំងដល់ពលរដ្ឋកុំឱ្យធ្វើដំណើរមិនចាំបាច់ទៅកាន់ប្រទេសនានាដែលជំងឺកូវីដ១៩ កំពុងឡើងឆ្លងខ្លាំងរួមទាំងសហរដ្ឋអាមេរិកដែលជាទីផ្សារទេសចរណ៍ដ៏សំខាន់របស់ប្រទេសបាហាម៉ា។
ក្នុងអំឡុងនៃការថ្លែងសុន្ទរកថាទៅកាន់ប្រទេសជាតិកាលពីថ្ងៃចន្ទលោកនាយករដ្ឋមន្រ្តី Minnis បានប្រាប់ប្រជាពលរដ្ឋបាហាម៉ាថា «ខ្ញុំអង្វរអស់លោកអ្នក។ ខ្ញុំអង្វរសុំឱ្យអស់លោកអ្នកស្ថិតនៅផ្ទះ។ ប្រសិនបើអស់លោកអ្នកត្រូវធ្វើដំណើរសូមមេត្តាមកលេងក្រុមគ្រួសារនៅលើកោះរបស់យើងទៅ»។
សាររបស់លោកនាយករដ្ឋមន្រ្តីកើតមាននៅពេលដែលប្រទេសបាហាម៉ាបានបើកព្រំដែនរបស់ខ្លួនឡើងវិញនៅថ្ងៃពុធនេះ ចាប់តាំងពីការបិទកាលពីខែមីនាមក ពីព្រោះតែការផ្ទុះឡើងនូវជំងឺកូវីដ១៩។
លោកនាយករដ្ឋមន្ត្រីបាននិយាយទៀតថា អ្នកធ្វើដំណើរទៅកាន់ប្រទេសបាហាម៉ាត្រូវតែបង្ហាញថា ពួកគេបានធ្វើតេស្តមេរោគកូរ៉ូណាអវិជ្ជមានក្នុងរយៈពេល៧ថ្ងៃចាប់ផ្តើមពីថ្ងៃទី៧ ខែកក្កដាទៅ។
លោកបាននិយាយទៀតថា ពលរដ្ឋដែលត្រូវចាប់បានអត់ពាក់ម៉ាសនឹងប្រឈមការផាកពិន័យជាប្រាក់២រយដុល្លារ ឬត្រូវជាប់គុករយៈពេលមួយខែ។
ប្រទេសបាហាម៉ាបានបញ្ជាក់ថា មានការឆ្លងមេរោគកូរ៉ូណាជាង១រយករណី និងមនុស្សស្លាប់១១នាក់៕
