អ្នកកាសែតម្នាក់ដែលឈ្នះពានរង្វាន់ និងជាស្ថាបនិករបស់គេហទំព័រសារព័ត៌មានតាមអ៊ិនធឺណិតមួយដែលធ្លាប់បានប៉ះទង្គិចជាច្រើនដងជាមួយនឹងប្រធានាធិបតីហ្វីលីពីន លោក Rodrigo Duterte ត្រូវបានទីភ្នាក់ងាររដ្ឋាភិបាលចាប់ខ្លួនកាលពីថ្ងៃពុធ ក្រោមបទចោទថាធ្វើការបះបោរ។
អ្នកស្រី Maria Ressa និពន្ធនាយកគេហទំព័រសារព័ត៌មាន Rappler, Inc. ត្រូវបានចាប់ខ្លួន បន្ទាប់ពីមានពាក្យបណ្តឹងពីអ្នកជំនួញម្នាក់ដែលជាប់ពាក់ព័ន្ធនឹងឃាតកម្ម ការជួញដូរមនុស្ស និងថ្នាំញៀន។ ក្រសួងយុត្តិធម៌ហ្វីលីពីនដែលបានដាក់ពាក្យបណ្តឹងជំនួសឲ្យអ្នកជំនួញរូបនោះបានច្រានចោលរាល់ការចោទប្រកាន់លើអ្នកជំនួញនោះ។ រដ្ឋាភិបាលរបស់លោក Duterte នៅតែរក្សាការចាប់ខ្លួននេះថាជាចំណាត់ការធម្មតាចំពោះបណ្តឹងនេះ។ ការចាប់ខ្លួនអ្នកស្រី Ressaផ្តើម ចេញពីរបាយការណ៍មួយដែលបានផ្សព្វផ្សាយកាលពីឆ្នាំ២០១២អំពីការចោទប្រកាន់អ្នកជំនួញរូបនោះមានជាប់ពាក់ព័ន្ធទៅនឹងចៅក្រមម្នាក់របស់តុលាការកំពូលជាតិ។
អ្នកស្រី Ressa បានថ្លែងតាមរយៈសេចក្តីថ្លែងការណ៍មួយបន្ទាប់ពីអ្នកស្រីត្រូវបានចាប់ខ្លួនថា « យើងមិនភ័យខ្លាចទេ។ ទង្វើខុសច្បាប់ ការឃោសនាខុសច្បាប់ និងការភូតកុហកមិនអាចបំបិទសំឡេងអ្នកកាសែតហ្វីលីពីនដែលកំពុងបន្តរាយការណ៍បានទេ»។ អ្នកស្រីបានថ្លែងបន្ថែមទៀតថា «ឈុតឆាកទាំងនេះបង្ហាញពីការព្យាយាមរបស់រដ្ឋាភិបាលក្នុងការបំបាត់សំឡេងអ្នកសារព័ត៌មាន រួមទាំងការបង្ខំឲ្យខ្ញុំត្រូវដេកនៅក្នុងពន្ធនាគារនេះផងដែរ»។
សហជីពអ្នកសារព័ត៌មានជាតិរបស់ហ្វីលីពីនបានថ្កោលទោសការចាប់ខ្លួនអ្នកស្រី ថាជា ទង្វើគួរឲ្យខ្មាស់អៀនរបស់រដ្ឋាភិបាល»។ គណៈកម្មាធិការការពារអ្នកសារព័ត៌មានThe Committee to Protect Journalists នៅក្នុងទីក្រុងបាងកកបានអំពាវនាវដល់អាជ្ញាធរឲ្យទម្លាក់រាល់បទចោទទាំងអស់លើអ្នកស្រី Ressa និងឲ្យដោះលែងអ្នកស្រីជាបន្ទាន់។ លោក Shawn Crispinតំណាងគណកម្មាធិការប្រចាំតំបន់អាស៊ីអាគ្នេយ៍បានថ្លែងថា «ការធ្វើទុក្ខបុកម្មេញទៅលើគេហទំព័រព័ត៌មាន Rappler និងលើអ្នកស្រី Ressaដោយរដ្ឋាភិបាលហ្វីលីពីន ឥឡូវនេះបានឈានដល់កម្រិតធ្ងន់ធ្ងរនិងត្រូវប្រកាសអាសន្នហើយ»៕
