ក្រុមអាជ្ញាធរខណ្ឌទួលគោកនៅព្រឹកថ្ងៃច័ន្ទនេះ បានឃាត់ខ្លួនក្រុមអ្នកធ្វើយុទ្ធនាការ«ថ្ងៃច័ន្ទពណ៌ខ្មៅ»ចំនួន៥នាក់ បន្ទាប់ពីពួកគេបានប្រមូលផ្ដុំគ្នាដោយសន្តិវិធីក្នុងឈុតពណ៌ខ្មៅនៅពីមុខសាលមហោស្រពចេនឡា ក្បែរផ្សារដើមគ រាជធានីភ្នំពេញ ដើម្បីទាមទារឲ្យមានការដោះលែងមន្ត្រីសិទ្ធិមនុស្សនៃសមាគមអាដហុកចំនួន៤នាក់ និងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ម្នាក់។
ក្រុមអ្នកតវ៉ាដែលរងការឃាត់ខ្លួន ត្រូវបានក្រុមអ្នកឃ្លាំមើលយុទ្ធនាការនេះឲ្យដឹងថា ជាសកម្មជនដីធ្លីមកពីសហគមន៍បុរីកីឡា និងសហគមន៍ SOSនៅពោធិ៍ចិនតុង រាជធានីភ្នំពេញ។
អ្នកដែលត្រូវចាប់ខ្លួននោះ រួមមានអ្នកស្រី ច្រាយ នីម អ្នកស្រី អឹម ស្រីទូច អ្នកស្រី ងូវ ណារី អ្នកស្រី ភោគ សុភីន និងយាយ ស្រីន។
អ្នកស្រី ងូវ ណារី បានរៀបរាប់ប្រាប់ VOA ពីបន្ទប់សាកសួរនៃអធិការដ្ឋាននគរបាលខណ្ឌទួលគោកថា ក្នុងចំណោមអ្នកដែលត្រូវឃាត់ខ្លួនទាំង៥នាក់នោះ មានតែមនុស្សបីនាក់ប៉ុណ្ណោះ ដែលបានសម្រេចចិត្តផ្ដិតមេដៃពាក់ព័ន្ធនឹងយុទ្ធនាការ«ថ្ងៃច័ន្ទពណ៌ខ្មៅ»។
ប៉ុន្តែ អ្នកស្រីអះអាងថា អ្នកស្រីនឹងនៅតែបន្តតវ៉ា បើទោះជារូបអ្នកស្រីផ្ទាល់យល់ព្រមផ្ដិតមេដៃ យល់ព្រមជាមួយអាជ្ញាធរថា នឹងបញ្ឈប់សកម្មភាពបែបនេះរួចហើយក៏ដោយ។
«អូ! សរសេរកំណត់ហេតុហើយ គ្រាន់តែថា គេទាមទារឲ្យសរសេរកំណត់ហេតុទាមទារឲ្យយើងផ្ដិតឈប់តវ៉ាអីអញ្ចឹងណា។ប៉ុន្តែពួកខ្ញុំផ្ដិតខ្លះនៅខ្លះ ហើយខ្ញុំ ងូវ ណារី ខ្ញុំសរសេរដាក់ថា ខ្ញុំតវ៉ាទៀត។ ខ្ញុំអត់ឈប់ទេ លុះត្រាតែដោះលែងសង្គមស៊ីវិល និងដោះស្រាយផ្ទះសម្បែងពួកខ្ញុំ»។
លោក ជិន ប៊ុនធឿន អ្នកនាំពាក្យសាលារាជធានីភ្នំពេញ បានប្រាប់ VOA ថា ការឃាត់ខ្លួនអ្នកតវ៉ាទាំងនេះ មិនមែនជាការចាប់ឃុំខ្លួនទេ ពោលគឺវាជាការហៅសាកសួរពាក់ព័ន្ធនឹងការជួបជុំដែលលោកបញ្ជាក់ថា គ្មានការដឹងឮពីអាជ្ញាធរ។
«គ្រាន់តែអញ្ជើញគាត់ទៅសាកសួរ ពាក់ព័ន្ធនឹងការជួបជុំគាត់កាលពីព្រឹកមិញ។ ការពិតទៅ ការសម្ដែងមតិរបស់ប្រជាពលរដ្ឋមានពីណាទៅហាម មិនអញ្ចឹង។ យើងមានទីលានប្រជាធិបតេយ្យមួយតើសម្រាប់ពួកគាត់។ ប៉ុន្តែប្រជាពលរដ្ឋទាំងអស់បែរជាអត់បានទៅជួបជុំនៅទីលាន បែរជាទៅជួបជុំនៅទីសាធារណៈទៅវិញ»។
នៅព្រឹកថ្ងៃច័ន្ទដដែលនេះ មានការស្លៀកពាក់ពណ៌ខ្មៅនៅតាមសហគមន៍ដីធ្លីមួយចំនួនទៀតដូចជាសហគមន៍បឹងកក់ជាដើម។
ទោះបីជាមិនមានការដើរតវ៉ានៅទីសាធារណៈណាមួយក៏ដោយ បើតាមអ្នកស្រី ទេព វន្នី អ្នកតំណាងសហគមន៍បឹងកក់ បានឲ្យដឹងថា មានកងកម្លាំងសមត្ថកិច្ចរាប់សិបនាក់ ដើរល្បាតសហគមន៍បឹងកក់ តាំងពីព្រលឹមដោយចាំឃ្លាំមើល មិនឲ្យមានការដើរតវ៉ាទៅក្រៅសហគមន៍។
«ខាងបឹងកក់ អត់មាន ប្រទូសរ៉ាយ ឬក៏ហិង្សាអីទេ ព្រោះថា ពួកយើងធ្វើនៅទីតាំងសហគមន៍ ព្រោះអីយើងដឹងថា បើយើងទៅក៏យើងទៅអត់រួច ដោយសារតែព្រលឹមឡើងមិនទាន់ទេ គឺខាងកម្លាំងសមត្ថកិច្ច ស្នងការក្រុង ប៉ូលិសខណ្ឌដូនពេញ គាត់ដាក់បិទគ្រប់ច្រកល្ហកជុំវិញតំបន់បឹងកក់ហ្នឹងទៀត ហ៊ុមជិត។ ជាពិសេសវិញទៀត យើងឃើញថា មានប៉ូលិសសង្កាត់ប៉ូលិសស្នងការក្រុង ក៏គាត់មកជិះតាមឃ្លាំមើលផ្ទះយើងមួយៗដែរ»។
តែទោះជាយ៉ាងណាក្ដី លោក ជិន ប៊ុនធឿន អ្នកនាំពាក្យសាលាក្រុងបន្ថែមថា ការជួបជុំនេះ មិនបានជម្រាបអាជ្ញាធរឲ្យដឹងអំពីគោលបំណងទុកជាមុនទេ។
«គាត់ជួបជុំគ្នាកាន់បដា ដើម្បីស្នើឲ្យមានការគោរពសិទ្ធិមនុស្សអីៗ ហែហូរ ដូចបានដឹងអញ្ចឹងអីបាទ! មួយវិញទៀត គាត់ជួបជុំគាត់ អត់មានឲ្យអាជ្ញាធរអីដឹងទេ។ គាត់ជួបជុំនេះសុំច្បាប់គេអីបន្តិចទៅ ស្របតាមច្បាប់បាតុកម្មអីអញ្ចឹងទៅ គ្មានអ្នកណាគេទៅ ឃាត់អីគាត់។ ហើយវាអត់សំខាន់អារឿងគាត់ពាក់អាវខ្មៅ មិនអាវខ្មៅទេ។ វាសំខាន់គឺគាត់មានកាន់បដា។ អញ្ចឹងពាក់ព័ន្ធកាន់បដាបួនផ្ទាំងហ្នឹងដែលមានខ្លឹមសារថាគោរពសិទ្ធិមនុស្ស ដោះលែងអ្នកការពារសិទ្ធិនៅកម្ពុជានេះ។ អានេះ វាមានបញ្ហាខ្លះពាក់ព័ន្ធ»។
កាលពីថ្ងៃទី៨ ខែឧសភាកន្លងទៅ ក្រសួងមហាផ្ទៃ បានចេញសេចក្ដីប្រកាសព័ត៌មានមួយដោយចោទអង្គការក្រៅរដ្ឋាភិបាល និងអង្គការសង្គមស៊ីវិលមួយចំនួនថា បានធ្វើការផ្សព្វផ្សាយព័ត៌មានតាមបណ្ដាញផ្សព្វផ្សាយ ដែលមានលក្ខណៈញុះញង់ និងបំផុសឲ្យមានយុទ្ធនាការស្លៀកពាក់ខ្មៅនេះ ដើម្បីទាមទារឲ្យការដោះលែង«ជនល្មើសមួយចំនួន»ដែលត្រូវតុលាការឃុំខ្លួនជាបណ្ដោះអាសន្នកាលពីពេលកន្លងមក។
យុទ្ធនាការស្លៀកពាក់ខោអាវខ្មៅនេះ មានគោលដៅទាមទារឲ្យមានការដោះលែងមន្ត្រីសិទ្ធិមនុស្ស៤នាក់នៃសមាគមអាដហុក និងមន្ត្រីគ.ជ.បម្នាក់ទៀត ដែលកំពុងជាប់ឃុំឃាំង។
មន្ត្រីសិទ្ធិមនុស្សទាំង៤នាក់នេះ រួមមាន លោក នី សុខា ប្រធានផ្នែកស៊ើបអង្កេតនៃសមាគអាដហុក លោក យី សុខសាន និងលោក ណៃ វង់ដា ដែលអ្នកទាំងពីរ ជាអនុប្រធានផ្នែកស៊ើបអង្កេតនៃសមាគមនេះ និងលោកស្រី លឹម មុន្នី មន្ត្រីស៊ើបអង្កេតជាន់ខ្ពស់នៃសមាគមនេះដែរ ហើយនឹងមន្ត្រីគ.ជ.ប គឺលោក នី ចរិយា ដែលជាអគ្គលេខាធិការរងម្នាក់នៃគ.ជ.ប។
កាលពីថ្ងៃច័ន្ទសប្ដាហ៍មុន ក៏មានការចាប់ឃាត់ខ្លួនបណ្ដោះអាសន្នមន្ត្រីសិទ្ធិមនុស្សមកពីសមាគមធាងតោ្នត និងអង្គការលីកាដូ និងតំណាងសហគមន៍បុរីកីឡា និងសហគមន៍បឹងកក់សរុបចំនួន៨នាក់ផងដែរ មុនពេលពួកគេត្រូវបានដោះលែងវិញក្នុងថ្ងៃដដែលនោះ៕
