ខណៈវិវាទការងារនៅមិនទាន់ត្រូវបានដោះស្រាយនៅក្រុមហ៊ុនណាហ្គាវើលដ៍រដ្ឋាភិបាលប្រកាសមិនអនុញ្ញាតឱ្យកូដករជាកម្មករនិយោជិតឬអតីតបុគ្គលិកក្រុមហ៊ុនដែលធ្វើប្រតិបត្តិការកាស៊ីណូក្នុងទីក្រុងភ្នំពេញធ្វើការតវ៉ាទ្រង់ទ្រាយធំបើទោះបីមានការដោះលែងតំណាងសហជីពយ៉ាងហោចណាស់៨នាក់ឱ្យនៅក្រៅឃុំកាលពីពេលថ្មីៗនេះ។
កាលពីថ្ងៃទីអង្គាររដ្ឋាភិបាលបានចេញសេចក្តីថ្លែងការណ៍មួយបញ្ជាក់ជាថ្មីអំពីកិច្ចប្រឹងប្រែងរបស់ក្រសួងការងារនិងបណ្តុះបណ្តាលវិជ្ជាជីវៈនៅក្នុងការដោះស្រាយវិវាទការងាររវាងក្រុមហ៊ុនណាហ្គាវើលដ៍និងកម្មករនិយោជិតរបស់ក្រុមហ៊ុននេះ ដែលបានអូសបន្លាយពេលជាងមួយឆ្នាំមកនេះហើយ។
ក៏ប៉ុន្តែសេចក្តីថ្លែងការណ៍បានលើកឡើងថា ខណៈក្រសួងការងារគាំទ្រសិទ្ធិស្របច្បាប់ក្នុងការធ្វើកូដកម្ម ក្រសួងនិងអាជ្ញាធរពាក់ព័ន្ធមិនអនុញ្ញាតឱ្យបុគ្គលិកដែលមិនពេញចិត្តធ្វើការប្រមូលផ្តុំទ្រង់ទ្រាយធំក្នុងកាលៈទេសៈនេះឡើយដោយសារភាពចាំបាច់នៃការទប់ស្កាត់ការឆ្លងរាតត្បាតនៃជំងឺកូវីដ៩ និងរក្សាសុវត្ថិភាពដល់ប្រជាពលរដ្ឋទូទៅ។
បើតាមសេចក្តីថ្លែងការណ៍ដដែលអ្នកដែលនៅតែទទួចធ្វើការប្រមូលផ្តុំដើម្បីបង្ហាញពីការទាមទាររបស់ពួកគេចំពោះក្រុមហ៊ុនណាហ្គាវើលដ៍ គឺនឹងត្រូវចាត់ទុកថាបានបំពានគោលនយោបាយតឹងរ៉ឹងរបស់ក្រសួងនិងបទបញ្ញត្តិពាក់ព័ន្ធនឹងជំងឺកូវីដ១៩ ហើយក៏នឹងត្រូវបណ្តេញចេញពីការងារដោយសន្តិវិធី និងគ្មានការទូទាត់ផលប្រយោជន៍ផ្សេងៗនោះឡើយ។
យ៉ាងណាក្តីកូដករនៅក្រុមហ៊ុនណាហ្គាវើលដ៍មួយចំនួនបានបន្តការពារភាពស្របច្បាប់របស់ផងខ្លួនក្នុងការចេញតវ៉ាដោយសន្តិវិធីជាមួយក្រុមហ៊ុនកាលពីកន្លងមកដើម្បីរកច្រកដោះស្រាយវិវាទការងារដែលផ្តើមចេញពីការបណ្តេញបុគ្គលិកចេញពីការងាររាប់រយនាក់ទាំងបង្ខំកាលពីឆ្នាំមុន។
អ្នកស្រីណុប ទិត្យបូរ៉ាវី អាយុ៣៩ឆ្នាំបានប្រាប់វីអូអេនៅថ្ងៃពុធនេះថារាល់មុនពេលចេញធ្វើកូដកម្មគឺ កូដករតែងគោរពតាមគោលការណ៍ណែនាំរបស់ក្រសួងសុខាភិបាលដូចជា ការធ្វើសំណាកនិងការធ្វើចត្តាឡីស័កជាដើម។ ប៉ុន្តែអាជ្ញាធរនៅតែបន្តបង្រ្កាបតាមរយៈការចាប់បញ្ជូនក្រុមកូដករទៅមណ្ឌលចត្តាឡីស័កជាបន្តបន្ទាប់បើទោះបីក្នុងករណីខ្លះកូដករមិនបានប្រមូលផ្តុំគ្នាដើម្បីធ្វើការតវ៉ានោះទេ។
អ្នកស្រីបានបន្តថា ខណៈតុលាការបានដោះលែងតំណាងសហជីពឱ្យនៅក្រៅឃុំការធ្វើកូដកម្មតាមរយៈការប្រមូលផ្តុំគឺនៅមានសារសំខាន់ដើម្បីបង្ហាញស្មារតីរួបរួមគ្នានៅក្នុងការទាមទារស្វែងរកដំណោះស្រាយរបស់ក្រុមកូដករនិងជាការជំរុញឱ្យក្រសួងការងារបង្ហាញឆន្ទៈពិតប្រាកដនៅក្នុងការដោះស្រាយវិវាទដែលបានផ្ទុះឡើងតាំងពីអំឡុងខែមេសាឆ្នាំ២០២១។
អ្នកស្រីប្រាប់វីអូអេថា៖ «ជាក់ស្តែងបើសិនជាដោះលែងខាងតំណាងកូដករអស់ហើយសុំកុំដាក់សម្ពាធនិងដាក់បម្រាមមកដល់ពួកគាត់ព្រោះដោយសារបើសិនជាខាងក្រសួងគាត់មានចេតនាក្នុងការដោះស្រាយវិវាទនេះរឿងវាងាយស្រួលទេ។ មិនមែនដោះលែងតំណាងហើយ ដាក់លក្ខខណ្ឌនិងដាក់សម្ពាធឱ្យអ្នកដែលមានឈ្មោះកាត់ រង់ចាំធ្វើកូដកម្មហើយអ្នកដែលមានឈ្មោះធ្វើការឱ្យត្រឡប់ទៅធ្វើការវិញ។ អ៊ីចឹង វិវាទហ្នឹងមានន័យថាវាមិនទាន់បញ្ចប់នៅឡើយទេ»។
ការដោះលែងថ្នាក់ដឹកនាំនិងសកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ចំនួន៨នាក់ខាងលើកើតមានឡើងទន្ទឹមគ្នានឹងពេលដែលអង្គការសហជីពថ្មីមួយគឺ«សហជីពសិទ្ធិនិងប្រយោជន៍រួមនៃបុគ្គលិកណាហ្គាវើលដ៍»ត្រូវបានបង្កើតឡើងនៅក្រុមហ៊ុននិងត្រូវបានទទួលស្គាល់ជាផ្លូវការដោយក្រសួងការងារផងដែរ។
អ្នកស្រីប៉ូរាវី ក៏បានសង្កត់ធ្ងន់ថាសហជីពថ្មីត្រូវបានបង្កើតឡើងក្នុង«ចេតនារំលោភសិទ្ធិការងារ» កម្មករខណៈវិវាទមិនត្រូវបានដោះស្រាយរូចរាល់និងថាសហជីពថ្មីនោះនឹងត្រូវបានប្រើជាឧបករណ៍ដើម្បីបញ្ចប់កិច្ចសន្យារបស់សហជីពចាស់។
កូដកម្មរបស់កម្មករនិយោជិតឬអតីតបុគ្គលិកនៅក្រុមហ៊ុនណាហ្គាវើលដ៍បានចាប់ផ្តើមកាលពីថ្ងៃទី១៨ខែធ្នូ ឆ្នាំ២០២១ដើម្បីទាមទារឱ្យក្រុមហ៊ុនទទួលដោះស្រាយបញ្ហាមួយចំនួន ដែលពួកគេចាត់ទុកថាជាការរំលោភសិទ្ធិការងារពីសំណាក់ថៅកែក្រុមហ៊ុននិងទាមទារឱ្យក្រុមហ៊ុនទទួលយកកម្មករនិយោជិតចំនួន៣៦៥នាក់ក្នុងចំណោមកម្មករនិយោជិតជាង១៣០០នាក់ដែលត្រូវបានបញ្ឈប់ពីការងាររួមគ្នាដោយបង្ខំតាំងពីខែមេសាឆ្នាំ២០២១។
កម្មករនិយោជិតចំនួន៣៦៥នាក់នោះគឺភាគច្រើនជាថ្នាក់ដឹកនាំសកម្មជននិងសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ដែលជាសហជីពចាស់នៅក្រុមហ៊ុន។
វីអូអេមិនអាចសុំការអធិប្បាយបន្ថែមពីអ្នកនាំពាក្យក្រសួងការងារលោក ហេង សួរ នៅឡើយទេ នៅថ្ងៃពុធនេះ។
ដោយឡែកនៅក្នុងសារបង្ហោះលើទំព័រហ្វេសប៊ុកកាលពីថ្ងៃអង្គារ រដ្ឋមន្រ្តីក្រសួងមហាផ្ទៃលោកស ខេង បានលើកឡើងថា លោកបានពិភាក្សាពីវិវាទការងារនៅក្រុមហ៊ុនណាហ្គាវើលដ៍នៅក្នុងជំនួបមួយតាមប្រព័ន្ធអនឡាញកាលពីពេលថ្មីៗនេះជាមួយលោក Vitit Muntarbhorn អ្នករាយការណ៍ពិសេសទទួលបន្ទុកសិទ្ធិមនុស្សនៅកម្ពុជា។
បើតាមទំព័រហ្វេសប៊ុករបស់លោកសខេង រដ្ឋមន្ត្រីមហាផ្ទៃរូបនេះបន្តជំរុញឱ្យភាគីពាក់ព័ន្ធប្រកាន់យកការចរចាដើម្បីឈានទៅរកដំណោះស្រាយបញ្ចប់ជម្លោះខណៈមានការដោះលែងអ្នកពាក់ព័ន្ធមួយចំនួនឱ្យនៅក្រៅឃុំជាបណ្តោះអាសន្នរួចទៅហើយ។
សាលាដំបូងរាជធានីភ្នំពេញបានដោះលែងថ្នាក់ដឹកនាំសហជីពនិងសកម្មជនសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ចំនួន៨នាក់ឱ្យបាននៅក្រៅឃុំជាបណ្ណោះអាសន្នបន្ទាប់ពីពួកគេជាប់ក្នុងពន្ធនាគារអស់រយៈពេលជាង៣ខែពីបទញុះញង់និងបានធ្វើកិច្ចព្រមព្រៀងជាមួយក្រសួងការងារដោយសន្យាថានឹងមិនមានការប្រមូលផ្តុំធ្វើកូដកម្ម ឬតវ៉ាណាមួយនោះទេ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូលោកអំ សំអាត បានឱ្យដឹងថាបើសិនជាអាជ្ញាធរនិងមន្រ្តីពាក់ព័ន្ធនៅតែមានភាពយឺតយ៉ាវនៅក្នុងការស្វែងរកដំណោះស្រាយជូនក្រុមកូដករជម្លោះការងារនឹងនៅតែបន្តអូសបន្លាយខណៈការប្រមូលផ្តុំតវ៉ានឹងអាចកើតមានឡើងជាថ្មី ក្នុងករណីមានការគោរពវិធានការសុខាភិបាលត្រឹមត្រូវ។
លោកបានថ្លែងថា៖ «តែបើសិនជាយឺតយ៉ាវនិងអូសបន្លាយនៅក្នុងការស្វែងរកដំណោះស្រាយលើវិវាទការងារ អាហ្នឹងខ្ញុំគិតថា ហាមឃាត់មិនមានទេទាក់ទងនឹងបញ្ហាកូដកម្ម ទោះបីជាបរិបទនៃកូវីដ១៩ នេះក៏ដោយ ក៏ច្បាប់មិនមានការហាមឃាត់ដែរព្រោះការធ្វើកូដកម្មដោយស្របច្បាប់ និងរក្សាគម្លាតសង្គមគោរពតាមគោលការណ៍នៃវិធានការសុខាភិបាលអាហ្នឹងគឺ គេអាចធ្វើបានហើយ»។
លោកបានបន្តថា ការចាត់ចំណាត់ការតាមរូបភាពផ្សេងៗមកលើក្រុមកូដករមិនបានផ្តល់ផលប្រយោជន៍នៅក្នុងការដោះស្រាយវិវាទនោះទេ និងថា ដំណោះស្រាយល្អគឺ ការចរចាដោយសន្តិវិធីដើម្បីបញ្ចប់វិវាទការងារនិងការទម្លាក់ចោលបទចោទប្រកាន់មកលើតំណាងសហជីពកម្មករនិយោជិតក្រុមហ៊ុនណាហ្គាវើលដ៍។
ពាក់ព័ន្ធនឹងការបង្កើតសហជីពថ្មីប្រចាំក្រុមហ៊ុនណាហ្គាវើលដ៍មន្រ្តីផ្នែកសិទ្ធិមនុស្សរូបនេះលើកឡើងថា សិទ្ធិក្នុងការបង្កើតសហជីពជាសិទ្ធិស្របច្បាប់។ យ៉ាងណាក្តី លោកថា ការបង្កើតសហជីពថ្មីក្នុងបរិបទខាងលើនេះគឺមិនសាកសមនឹងស្ថានភាពនាពេលបច្ចុប្បន្ននោះទេ ព្រោះនៅក្នុងក្រុមហ៊ុនណាហ្គាវើលដ៍គួរតែមានការទុកឱកាសដោះស្រាយវិវាទការងារដែលកំពុងមានជាមុនសិន មុនពេលបង្កើតសហជីពមួយថ្មីឡើងមកនោះ។
យោងតាមសេចក្តីថ្លែងការណ៍របស់រដ្ឋាភិបាលខាងលើគិតត្រឹមថ្ងៃទី១៥ ខែមីនាឆ្នាំ២០២២ អតីតបុគ្គលិកណាហ្គាវើលដ៍ចំនួន១៥៣នាក់ ក្នុងចំណោម៣៧៣នាក់ ដែលបានធ្វើកូដកម្មតវ៉ាកាលពីពេលកន្លងមក បានយល់ព្រមទទួលយកការទូទាត់ប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន ដែលធ្វើឱ្យអតីតបុគ្គលិកមិនព្រមទទួលសំណងនៅសល់ត្រឹម២២០នាក់៕
