ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាជ្ញាធរ​នឹង​រឹត​បន្តឹង​សន្តិសុខ ខណៈ​លោក​ កឹម សុខា សម្រេច​បង្ហាញ​ខ្លួន​នៅ​សវនាការ​ជំនុំជម្រះ


រូបឯកសារ៖ លោក កឹម សុខា ប្រធាន​គណបក្ស​សង្គ្រោះ​ជាតិ ដែល​ត្រូវបាន​តុលាការរំលាយ​ចោល នៅ​គេហដ្ឋាន​របស់​លោក​កាលពី​ព្រឹក​ថ្ងៃទី​១៣ ខែវិច្ឆិកា ឆ្នាំ២០១៩។ (ទុំ ម្លិះ/VOA)

មន្ត្រី​ជាន់​ខ្ពស់​នៃក្រសួងមហាផ្ទៃ​នៅ​ថ្ងៃ​ពុធ​នេះ​ បាន​ឲ្យ​ដឹង​ថា ក្រសួងនឹង ត្រៀម​កម្លាំង ​ដើម្បី​រក្សា​សន្តិសុខ​ និង​សណ្ដាប់​ធ្នាប់ ​ក្នុង​អំឡុងពេល​សវនាការ​ជំនុំជម្រះ​លើមេដឹកនាំ​បក្ស​ប្រឆាំង ​លោក កឹម សុខា ដែល​នឹង​ធ្វើ​ឡើង​នៅ​ថ្ងៃ​១៥ ខែ​មករា ខាង​មុខ​នេះ។

លោក​ ខៀវ សុភ័គ អ្នកនាំពាក្យ​ក្រសួង​មហា​ផ្ទៃ ​បាន​ប្រាប់​VOAនៅ​ថ្ងៃ​ពុធ​នេះ​ថា ក្រសួង​មហា​ផ្ទៃ​បាន​រៀបចំ​ផែនការ​រួចរាល់ ​ដើម្បី​រក្សា​សន្តិសុខ និង​សណ្ដាប់ធ្នាប់ ​ក្នុងអំឡុងពេល​សវនាការ​របស់​លោក ​កឹម សុខា។

«ចង់​ជម្រាប​ជូន​ថា ខាង​អគ្គស្នងការ​គាត់​មាន​ផែន​ការ​ការពារ​ច្បាស់​លាស់​ហើយ។ យើង​បាន​រៀបចំ​ទាំង​ការងារ​ផែនការ​ការពារ​សុវត្ថិភាព ទាំង​សម្រាប់​លោក​ កឹម សុខា​ផង​ និង​ទាំង​សម្រាប់​ប្រជាពលរដ្ឋ​ទាំងមូល​ផង»។

នៅ​ពេល​សួរ​ថា​តើក្រសួង​មហាផ្ទៃ​មាន​ចំណាត់​ការ​យ៉ាង​ដូចម្ដេច​ក្នុង​ករណី​មាន​ភាព​មិន​ប្រក្រតី​ និង​ភាព​ចលាចល​ណា​មួយក្នុងអំឡុងពេល​សវនាការ លោក​ ខៀវ សុភ័គ​ ​បាន​ឆ្លើយ​ថា៖

«យើង​មាន​ច្បាប់​របស់​យើង ​ដើម្បី​អនុវត្ត​ហើយ​ជា​គោល ការពារ​សន្តិភាព ការពារ​សុវត្ថិភាព គឺ​ជាសមត្ថកិច្ច​របស់​រាជ​រដ្ឋាភិបាល​ស្រប​តាម​រដ្ឋធម្មនុញ្ញ​នៃ​កម្ពុជា»។

លោក កឹម​ សុខា បាន​សម្រេច​នឹង​បង្ហាញ​ខ្លួន​នៅ​សវនាការ​ជំនុំជម្រះ​នេះ។ ​បើ​តាម ​លោក មុត ចន្ថា ជំនួយ​ការ​របស់​លោក កឹម សុខា ដែល​បាន​ប្រាប់​VOAកាល​ពី​ថ្ងៃ​អង្គារ។

លោក ផែង ហេង មេធាវី​របស់​ កឹម សុខា​ សុំ​មិន​អធិប្បាយ​ពាក់ព័ន្ធ​នឹង​កូន​ក្តី​របស់​លោក ​ដោយ​លោក​សុំ​រង់ចាំ​រហូត​ដល់​ថ្ងៃ​សវនាការ។ លោក​មិន​ទាន់​អាច​បញ្ជាក់​ថា​នឹង​មាន​អ្នក​គាំទ្រ​លោក​ កឹម សុខា​ មក​ចូលរួម​ប៉ុន្មាន​នាក់​នោះ​ទេ​នា​ថ្ងៃ​សវនាការ។​

លោក ​កឹម សុខា​ ប្រធាន​គណបក្ស​សង្គ្រោះ​ជាតិ ​ដែល​ត្រូវ​តុលាការ​រំលាយ​មុន​ការ​បោះឆ្នោត​ឆ្នាំ​២០១៨ ត្រូវ​បាន​ចោទ​ប្រកាន់​ពី​បទ​រួម​គំនិត​ជាមួយ​បរទេស​ ក្នុង​គម្រោង​មួយ​ដែល​រដ្ឋាភិបាល​របស់​លោក ហ៊ុន សែន ហៅ​ថា​«ការ​ប៉ុនប៉ង​ផ្ដួល​រំលំ​រដ្ឋាភិបាល» ដោយ​មាន​សហរដ្ឋអាមេរិក​នៅ​ពីក្រោយ។ ទាំង​លោក កឹម សុខា និង​សហរដ្ឋអាមេរិក បាន​បដិសេធ​ការ​ចោទ​ប្រកាន់​នេះ។

តុលាការ​បាន​សម្រេច​បន្ធូរបន្ថយ​លក្ខខណ្ឌ​នៃ​ការ​ឃុំខ្លួន​លោក​ កឹម សុខា​ ​កាល​ពី​ខែ​វិច្ឆិកា​ ឆ្នាំ​២០១៩ ក្រោយ​លោក​បាន​ជាប់​ឃុំ​នៅ​ក្នុង​ពន្ធនាគារ និង​នៅ​ផ្ទះ​មួយ​រយៈ។ ​ ​លោក​ កឹម សុខា មិន​ត្រូវ​បាន​អនុញ្ញាត​ឲ្យធ្វើ​នយោបាយ ​និង​ធ្វើ​ដំណើរ​ទៅក្រៅ​ប្រទេស​នោះ​ទេ​ ដោយលោកមាន​សិទ្ធិ​ត្រឹម​ដើរ​ហើរ​ក្នុង​ប្រទេស ​និង​ជួប​ជាមួយ​អ្នក​ការទូត ​កន្លង​មក​តែ​ប៉ុណ្ណោះ។

អ្នកនាង​ Emily Zeeburg អ្នកនាំពាក្យ​ស្ថានទូត​អាមេរិក​ប្រចាំ​កម្ពុជា​ បាន​ប្រាប់VOAតាម​សារ​ជា​អ៊ីមែល​នៅ​ថ្ងៃ​ពុធ​នេះ​ថា ស្ថានទូត​អាមេរិក​ប្រចាំ​កម្ពុជា​នឹង​ «តាមដាន​សវនាការ​របស់​លោក​ កឹម សុខា​ យ៉ាង​ជិតដិត»។

សហរដ្ឋអាមេរិក ​ក៏​ធ្លាប់​បាន​អំពាវនាវ​ឲ្យ​ទម្លាក់​ចោល​ការ​ចោទប្រកាន់​លើ​លោក កឹម សុខា ផង​ដែរ៕

តួលេខនៃករណីឆ្លងជំងឺកូវីដ១៩

XS
SM
MD
LG