រដ្ឋាភិបាលអភិរក្សនិយមដែលកាន់អំណាចក្នុងប្រទេសអូស្ត្រាលីកំពុងតែខិតចូលទៅកាន់តែជិតក្នុងការរក្សាអំណាចដ៏មុតស្រួចរបស់ខ្លួន បន្ទាប់ពីការបោះឆ្នោតសភាជាមួយនឹងលទ្ធផលដ៏ប្រកៀកប្រកិតគួរឲ្យភ្ញាក់ផ្អើលនោះ។
ការវិភាគរបស់ប្រព័ន្ធផ្សព្វផ្សាយអូស្រ្តាលីបានឲ្យដឹងថា គណបក្សចម្រុះសេរីឬជាតិរបស់លោកនាយករដ្ឋមន្ត្រី Malcolm Turnbull កំពុងតែឈានទៅដល់ការឈ្នះដោយទទួលបានអាសនៈចំនួន៧៣ នៅក្នុងរដ្ឋសភា ដែលនៅខ្វះតែអាសនៈ៣ទៀតប៉ុណ្ណោះដែលត្រូវការដើម្បីបង្កើតជារដ្ឋាភិបាលភាគច្រើន។
លោក Turnbull បានទទួលការគាំទ្របន្ថែមនៅថ្ងៃព្រហស្បតិ៍នេះ បន្ទាប់ពីធ្វើដំណើរទៅកាន់ទីក្រុង Brisbane និងទទួលបានការសន្យាពីតំណាងរាស្រ្តឯករាជ្យ លោក Bob Katter ក្នុងការគាំទ្រគណបក្សចម្រុះនេះ។ លោក Katter បានថ្លែងប្រាប់អ្នកកាសែតបន្ទាប់ពីជំនួបនោះថា លោកបានធ្វើសេចក្តីសម្រេចចិត្តដោយមិនមានការរំភើបខ្លាំងក្លានោះទេ ដោយលោកសម្រេចចិត្តដូច្នេះ គឺដើម្បីតែកុំឲ្យប្រជាពលរដ្ឋអូស្ត្រាលីត្រូវបោះឆ្នោតម្តងទៀតតែប៉ុណ្ណោះ។ លោកបាននិយាយយ៉ាងដូច្នេះថា «ខ្ញុំរក្សាសិទ្ធិរបស់ខ្ញុំក្នុងការបោះជំហានទៅមុខក្នុងពេលណាមួយ ក្នុងទិសដៅណាមួយទៀត»។
ទូរទស្សន៍ ABC ផ្សាយថា គណបក្សពលកម្ម ដែលជាគណបក្សប្រឆាំងឈ្នះបានអាសនៈចំនួន៦៦ ខណៈដែលបេក្ខជនឯករាជ្យ៤នាក់ និងបេក្ខជនក្រុមភាគតិចម្នាក់របស់គណបក្សត្រូវបានគេបោះឆ្នោតឲ្យ។ នៅខ្វះតែ៦អាសនៈទៀតប៉ុណ្ណោះ នោះគណបក្សទាំងអស់នឹងទទួលបានចំនួនអាសនៈស្មើគ្នា។
លោក Bill Shorten មេដឹកនាំគណបក្សពលកម្ម បានទទួលស្គាល់ថា លោកនាយករដ្ឋមន្ត្រី Turnbull នឹងត្រឡប់ទៅកាន់តំណែងម្តងទៀត ប៉ុន្តែលោកនឹងកាន់តំណែងម្តងទៀតជាមួយនឹងអំណាចខ្សោយជាងមុន និងគណបក្សនយោបាយមួយដែលមានការបែកខ្នែកគ្នាខ្លាំង។
ភាពជាប់គាំងដែលកើតឡើងដោយសារការបោះឆ្នោតកាលពីថ្ងៃសៅរ៍សប្តាហ៍មុនបានធ្វើឲ្យទីភ្នាក់ងារដាក់ចំណាត់ថ្នាក់ Standard and Poor's ទម្លាក់ពិន្ទុ AAA របស់អូស្ត្រាលីពីឋិតឋេរមកជាអវិជ្ជមានវិញ៕
