ក្រុមអាជ្ញាធរអូស្រ្តាលីនិយាយថា ពួកគេបានតាមដានឃើញមានការកើនឡើងនូវការសន្ទនាតាមប្រព័ន្ធអ៊ិនធឺណិតរបស់ភេវរករក្នុងរយៈពេលប៉ុន្មានថ្ងៃនេះ បន្ទាប់ពីមានការឡោមព័ទ្ធដ៏ប្រល័យកាលពីសប្តាហ៍មុននៅហាងកាហ្វេក្នុងទីក្រុងស៊ីដនី។
លោកនាយករដ្ឋមន្រ្តី តូនី អាបុត (Tony Abbott) បានព្រមាននៅថ្ងៃអង្គារនេះថា ការគំរាមភេរវកម្មនៅមានកម្រិតខ្ពស់ បើទោះបីជាលោកព្រមានថា ក្រុមអាជ្ញាធរមិនបានដឹងនៅពេលណា ឬការវាយប្រហារនោះអាចកើតឡើងដោយរបៀបណា។
«ការរាយការណ៍ត្រួសៗពីទីភ្នាក់ងារសន្តិសុខនៅថ្ងៃនេះប្រាប់ឲ្យដឹងថា មានការសន្ទនាតាមប្រព័ន្ធអ៊ិនធឺណិតកើនឡើងយ៉ាងខ្លាំងបំផុត បន្ទាប់ពីការឡោមព័ទ្ធនៅ Martin Place។ ដោយហេតុដូច្នះវាជាការសំខាន់ដែលប្រជាពលរដ្ឋត្រូវស្ថិតនៅក្នុងការប្រុងប្រយ័ត្ននិងមានការយល់ដឹង ក៏ដូចជាការធានាអះអាងដោយទីភ្នាក់ងារប៉ូលីសនិងសន្តិសុខរបស់យើងថាកំពុងធ្វើអ្វីៗដែលពួកគេអាចធ្វើទៅបានដើម្បីរក្សាសុវត្ថិភាពសម្រាប់យើង»។
លោកនាយករដ្ឋមន្រ្តី អាបុត មិនបាននិយាយលម្អិតពីអ្វីដែលលោកហៅថាការសន្ទនាតាមប្រព័ន្ធអ៊ិនធឺណិតរបស់ភេវរករនោះទេ។
មនុស្ស២នាក់បានស្លាប់កាលពីសប្តាហ៍មុន នៅពេលដែលបុរសជនជាតិអ៊ីរ៉ង់ម្នាក់បានចាប់មនុស្សធ្វើជាចំណាប់ខ្មាំងដោយកាំភ្លើង នៅឯហាងកាហ្វេ Lindt Chocolate ក្នុងសង្កាត់ពាណិជ្ជកម្មក្នុងទីក្រុងស៊ីដនី។
នៅថ្ងៃអង្គារនេះ ពិធីបុណ្យសពបានត្រូវធ្វើឡើងសម្រាប់ចំណាប់ខ្មាំង២នាក់ដែលបានស្លាប់ ក្នុងនោះមានលោក Tori Johnson អាយុ៣៤ឆ្នាំ ជាអ្នកចាត់ចែងហាងកាហ្វេ និងអ្នកស្រី Katrina Dawson អាយុ៣៨ឆ្នាំ ជាមេធាវី។
ខ្មាន់កាំភ្លើងឈ្មោះ Man Haron Monis មានប្រវត្តិឩក្រិដ្ឋកម្មជាយូរមកហើយ ហើយបានសម្តែងការគាំទ្រចំពោះក្រុមរដ្ឋអ៊ីស្លាម។ លោកត្រូវបានសម្លាប់ក្នុងអំឡុងពេលបាញ់តទល់ជាមួយប៉ូលីស៕
