ក្រុមអ្នកស្រាវជ្រាវរបស់រដ្ឋាភិបាលនៅប្រទេសអូស្ត្រាលី បានចាប់ផ្តើមធ្វើតេស្តទៅលើសត្វនូវអ្វីដែលអាចក្លាយជាវ៉ាក់សាំងការពារជំងឺកូវីដ១៩ពីរប្រភេទ។ ទោះជាយ៉ាងនេះក្តី ក្រុមអ្នកជំនាញបានព្រមានថា បើទោះបីជាវ៉ាក់សាំងសាកល្បងនេះជោគជ័យក៏ដោយ ក៏ការផលិតនឹងមិនទំនងជាបានវ៉ាក់សាំងច្រើនទេ រហូតទាល់តែដល់ឆ្នាំក្រោយ។
វ៉ាក់សាំងការពារជំងឺកូវីដ១៩ទំាងពីរនេះ ត្រូវបានផលិតឡើងដោយសាកលវិទ្យាល័យ Oxford នៅចក្រភពអង់គ្លេស និងនៅសហរដ្ឋអាមេរិកវិញ ដោយក្រុមហ៊ុនផលិតឱសថ Inovio Pharmaceuticals។
អង្គការសុខភាពពិភពលោក WHO បាននិយាយថា វ៉ាក់សាំងទាំងនោះ អាចត្រូវបានធ្វើតេស្តទៅលើសត្វ ដែលនោះជាជំហានចាំបាច់មួយក្នុងការស្វែងរកវិធីផលិតវ៉ាក់សាំងការពារជំងឺកូវីដ១៩។
ទីភ្នាក់ងារវិទ្យាសាស្ត្រជាតិរបស់អូស្រ្តាលី កំពុងវាយតម្លៃថា តើការព្យាបាលមានប្រសិទ្ធភាពដែរឬទេ ហើយថា តើវ៉ាក់សាំងទាំងនោះ នឹងមានសុវត្ថិភាពសម្រាប់មនុស្សដែរឬទេ។
វ៉ាក់សាំងដែលមានសក្តានុពលទាំងពីរប្រភេទនោះ កំពុងត្រូវបានគេធ្វើតេស្តទៅលើសត្វសំពោចស្បូវ ដែលសត្វនេះ ឆ្លងវីរុសកូរ៉ូណា តាមរបៀបដូចមនុស្សឆ្លងវីរុសនេះដែរ។
អ្នកស្រី Jane Halton ដែលជានាយិកានៃសម្ព័ន្ធភាពរបស់ប្រទេសអូស្ត្រាលីសម្រាប់ការច្នៃប្រឌិតការត្រៀមបង្ការការរីករាលដាលនៃជំងឺរាតត្បាត ឬ ហៅកាត់ថា CEPI ថ្លែងថា ការពិសោធន៍ គឺជារបកគំហើញថ្មីដ៏សំខាន់មួយ។ អ្នកស្រីបានថ្លែងក្នុងសម្តីដើមថា៖
«ការពិសោធន៍ទាំងនោះ មានសារៈសំខាន់ណាស់។ ខ្ញុំចង់និយាយថា យើងប្រើ បច្ចេកវិទ្យាឈានមុខគេ ក្នុងការធ្វើតេស្តនេះ ហើយនេះជាលើកទីមួយហើយនៅក្នុងពិភពលោក ដែលយើងបានធ្វើតេស្តគំរូទៅលើសត្វទាំងនេះ ដើម្បីពិនិត្យមើលវ៉ាក់សាំងទាំងពីរប្រភេទនោះ ដែលសម្ព័ន្ធភាព CEPI បានផ្តល់ថវិកាឧបត្ថម្ភ»។
ការសាកល្បងធ្វើតេស្តវ៉ាក់សាំងការពារជំងឺកូវីដ១៩ របស់ប្រទេសអូស្រ្តាលីនេះ គឺជាការធ្វើតេស្តលើកដំបូងទៅលើសត្វ ហើយត្រូវបានគេមើលឃើញថា ជាព្រឹត្តិការណ៍សំខាន់ខ្លាំងណាស់។
មានការជំរុញជាសកលដើម្បីស្វែងរកវិធីព្យាបាលជំងឺកូវីដ១៩ ប្រកបដោយប្រសិទ្ធភាពក្នុងគ្រាដែលជំងឺនេះ បន្តឆក់យកជីវិតមនុស្សនៅក្នុងប្រទេសជាច្រើន។
កិច្ចសហការអន្តរជាតិមានកម្រិតខ្ពស់ ហើយការស្រាវជ្រាវនៅតែបន្តក្នុងល្បឿនយ៉ាងលឿន។ យ៉ាងហោចណាស់ មានវ៉ាក់សាំងចំនួន ២០ ប្រភេទ កំពុងត្រូវបានផលិតឡើងនៅទូទាំងពិភពលោក។
ក្រុមអ្នកស្រាវជ្រាវអូស្ត្រាលីបាននិយាយថា ជាធម្មតាពួកគេ ត្រូវចំណាយពេលដល់ទៅពីរឆ្នាំ ដើម្បីឈានដល់ចំណុចនៃការធ្វើតេស្តទៅលើសត្វ។ លើកនេះ ពួកគេ បានចំណាយពេលតែពីរខែប៉ុណ្ណោះ។
ទោះជាយ៉ាងនេះក្តី ក៏អ្នកជំនាញជឿថា ទោះបីជាមានការជឿនលឿនក៏ដោយ ក៏ទម្រាំតែមានវ៉ាក់សាំងមួយ ប្រហែលជានឹងនៅឆ្នាំ ២០២១ ឯណោះ ដោយសារតែពួកគេត្រូវចំណាយពេលវេលា ដើម្បីឲ្យការព្យាបាលថ្មីនេះ ត្រូវទៅតាមស្តង់ដារអន្តរជាតិ៕
ប្រែសម្រួលដោយអ្នកស្រី លី ម៉ូរីវ៉ាន់
