ការធ្វើពាណិជ្ជកម្មគឺជាសរសៃឈាមនៃសេដ្ឋកិច្ចរបស់អូស្ត្រាលី។ វារួមចំណែករហូតដល់ទៅជាង ៤០ ភាគរយនៃប្រាក់ចំណូល ឬ GDP សរុបរបស់ប្រទេសនេះ។
ទីផ្សារនាំចេញទាំង ១២ ក្នុងចំណោមទីផ្សារធំៗទាំង ១៥ របស់អូស្ត្រាលី គឺស្ថិតនៅក្នុងតំបន់អាស៊ី។ ទោះជាយ៉ាងណាក៏ដោយ ក៏ប្រទេសចិនមានចំណែកធំជាងគេបំផុត ដែលទទួលទំនិញនាំចេញនិងសេវាកម្មរបស់អូស្ត្រាលីរហូតដល់ទៅ ១ភាគ៣។
សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ក៏ជាប្លុកពាណិជ្ជកម្មដ៏សំខាន់មួយផងដែរ ដោយមានចំណែកទីផ្សារនាំចេញសរុបរបស់អូស្ត្រាលីក្នុងទំហំ ១២ ភាគរយ។
កាលពីឆ្នាំ ២០២១ ពាណិជ្ជកម្មរបស់អូស្ត្រាលីជាមួយបណ្ដាប្រទេសនៅតំបន់អាស៊ាន មានទំហំទឹកប្រាក់ចំនួន ៨០,៨ ពាន់លានដុល្លារអាមេរិក ដែលជាទំហំមួយធំជាងការធ្វើពាណិជ្ជកម្មសរុបជាមួយប្រទេសជប៉ុន និងសហរដ្ឋអាមេរិក។ នេះបើយោងតាមទិន្នន័យផ្លូវការរបស់រដ្ឋាភិបាលអូស្ត្រាលី។
ធ្យូងថ្ម និងឧស្ម័នធម្មជាតិ គឺជាផលិតផលនាំចេញចម្បងរបស់អូស្ត្រាលី ទៅកាន់បណ្ដាប្រទេសនៅក្នុងតំបន់អាស៊ាន បន្ថែមលើផលិតផលកសិកម្ម និងសេវាកម្មផ្នែកអប់រំផ្សេងៗ។
ចំណែកប្រទសសមាជិកអាស៊ានវិញ លក់ផលិតផលប្រេងកាត រថយន្ត និងសេវាកម្មដឹកជញ្ជូនទៅកាន់ប្រទេសអូស្ត្រាលី។
តំបន់អាស៊ាន រួមមានប្រទេសមួយចំនួន ដែលមានសេដ្ឋកិច្ចកំពុងរីកលូតលាស់លឿនជាងគេនៅលើពិភពលោក ដោយសារតែមានកំណើនផ្នែកនគរូបនីយកម្ម ការលូតលាស់ផ្នែកឌីជីថល និងពលរដ្ឋដែលមានការអប់រំខ្ពស់។ ប៉ុន្តែរបាយការណ៍មួយដែលរៀបចំដោយរដ្ឋាភិបាលក្រុងកង់បេរ៉ា បានបង្ហាញឲ្យដឹងថា ចំណងពាណិជ្ជកម្មជាមួយប្រទេសសមាជិកអាស៊ានបាននៅនឹង ហើយត្រូវការការជំរុញបន្ថែមទៀត តាមរយៈការពង្រីកចំនួនជើងហោះហើរទៅកាន់តំបន់នេះ ក៏ដូចជាត្រូវកាត់បន្ថយរនាំងឧបសគ្គសម្រាប់ការវិនិយោគពីបរទេសផងដែរ។
ទំនាក់ទនងពាណិជ្ជកម្មប្រចាំឆ្នាំរបស់អូស្ត្រាលីជាមួយប្រទេសឥណ្ឌូណេស៊ី មានទំហំទឹកប្រាក់សរុប ៤,៦៤ ពាន់លានដុល្លារអាមេរិក ឬតិចជាង ២ភាគរយនៃទំហំពាណិជ្ជកម្មសាកលរបស់អូស្ត្រាលី។
លោក Anthony Albanese នាយករដ្ឋមន្ត្រីអូស្ត្រាលី បានថ្លែងទៅកាន់រដ្ឋសភាអូស្ត្រាលីក្នុងរដ្ឋធានីកង់បេរ៉ា កាលពីថ្ងៃទី ៥ ខែកញ្ញាថា អាស៊ានគឺជាតំបន់មួយដែលលោកសង្ឃឹមថា នឹងជំរុញចំណងទាក់ទងផ្នែកពាណិជ្ជកម្មឲ្យកាន់តែខ្លាំងជាងមុនថែមទៀត។
លោកបានថ្លែងដូច្នេះថា៖ «យើងមានឥណ្ឌូណេស៊ី ដែលជាប្រទេសមួយក្នុងចំណោមប្រទេសមួយចំនួន ដែលមានសេដ្ឋកិច្ចនិងប្រជាធិបតេយ្យធំជាងបំផុតនៅលើពិភពលោក ហើយដែលស្ថិតនៅក្បែរខាងយើង។ ប៉ុន្តែការពិត គឺថា ប្រទេសនេះមិនបានក្លាយសូម្បីតែជាដៃគូពាណិជ្ជកម្មធំរបស់យើងនោះទេ»។
ពាណិជ្ជកម្មរបស់អូស្ត្រាលីជាមួយចិន ត្រូវបានរំខានកាលពីប៉ុន្មានឆ្នាំកន្លងទៅ ដោយសារតែជម្លោះភូមិសាស្ត្រនយោបាយមួយចំនួន បូករួមជាមួយនឹងបញ្ហាលទ្ធិប្រជាធិបតេយ្យនៅទីក្រុងហុងកុង សេរីភាពធ្វើនាវាចរណ៍នៅសមុទ្រចិនខាងត្បូង និងបញ្ហាជំងឺកូវីដ១៩ ក៏ដូចបញ្ហាសិទ្ធិមនុស្ស ដែលជំរុញឲ្យប្រទេសអូស្ត្រាលីស្វែងរកទីផ្សារថ្មីៗ ដើម្បីធ្វើឱ្យមានភាពចម្រុះសម្រាប់ពាណិជ្ជកម្មរបស់ខ្លួន។
លោក Leigh Howard ដែលជាប្រធាន Asialink Business នៃសាកលវិទ្យាល័យទីក្រុងMelbourne ប្រទេសអូស្ត្រាលី បានថ្លែងប្រាប់វីអូអេថា សមាជិកអាស៊ានបង្ហាញឱកាសដ៏ល្អសម្រាប់ប្រទេសអូស្ត្រាលី។
លោកថ្លែងដូច្នេះថា៖ «ការធ្វើឱ្យមានលក្ខណៈចម្រុះនៅតែជាប្រធានបទដែលត្រូវធ្វើបន្ត ដោយសារតែការធ្វើជំនួញត្រូវស្វែងរកទីផ្សារថ្មីៗ មិនថាដើម្បីបំពេញទៅលើទីផ្សារចិន ឬដើម្បីជំនួសទីផ្សារចិននោះទេ។ ជាថ្មីម្ដងទៀត ដោយសារតែអូស្ត្រាលីនៅជិតតំបន់អាស៊ីអាគ្នេយ៍ ហើយតំបន់នេះមានការកើនឡើងនៃក្រុមមនុស្សដែលសម្បូរទ្រព្យធន និងជាតំបន់ដែលមានប្រជាជនច្រើនទៀតនោះ ទាំងអស់នេះ ធ្វើឲ្យអាស៊ានបង្កើតឱកាសដ៏គួរឲ្យទាក់ទាញមួយសម្រាប់ពាណិជ្ជកម្មរបស់អូស្ត្រាលី»។
សមាគមអាស៊ានដែលមានសមាជិក ១០ប្រទេស ត្រូវបានបង្កើតឡើងកាលពីឆ្នាំ ១៩៦៧។ សមាជិកនៃសមាគមនេះរួមមាន ប្រទេសឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី ថៃ ព្រុយណេ វៀតណាម ឡាវ មីយ៉ាន់ម៉ា និងប្រទេសកម្ពុជា។
គួកត់សម្គាល់ដែរថា កិច្ចប្រជុំកំពូលអាស៊ានឆ្នាំនេះក្នុងរដ្ឋធានីហ្សាការតា ប្រទេសឥណ្ឌូណេស៊ី មិនមានវត្តមានប្រធានាធិបតីចិនលោក Xi Jinping និងប្រធានាធិបតីសហរដ្ឋអាមេរិកលោក Joe Biden នោះទេ៕
