ប្រធានាធិបតីសហរដ្ឋអាមេរិកលោក Joe Biden នឹងធ្វើដំណើរនៅថ្ងៃព្រហស្បតិ៍នេះ ទៅចូលរួមកិច្ចប្រជុំកំពូល G20 ក្នុងប្រទេសឥណ្ឌាដែលប្រព្រឹត្តឡើងនៅចុងសប្តាហ៍ ដោយមានគោលដៅធំនិងក្តីសង្ឃឹមខ្ពស់ថា ក្រុមប្រទេសមានសេដ្ឋកិច្ចជឿនលឿន និងកំពុងអភិវឌ្ឍបំផុតទាំង២០ ឬ G20 អាចធ្វើការរួមគ្នាលើបញ្ហាសាកលធំៗបាន។ នេះបើយោងតាមសេតវិមាន ដែលបានប្រកាសឱ្យដឹងកាលពីថ្ងៃអង្គារ ក្នុងពេលមានមន្ទិលអំពីសុខភាពរបស់លោកប្រធានាធិបតី ក្រោយពីភរិយារបស់លោក គឺលោកស្រី Jill Biden បានធ្វើតេស្តឃើញវិជ្ជមានកូវីដ១៩ មួយថ្ងៃមុន។
អ្នកនាំពាក្យសេតវិមានលោកស្រី Karine Jean-Pierre និយាយថា៖ «លោក Biden គ្មានចេញរោគសញ្ញាអ្វីទេ»។ អ្នកស្រីបន្ថែមថា លោក Biden បានធ្វើតេស្តឃើញអវិជ្ជមានកាលពីព្រឹកថ្ងៃអង្គារហើយនឹងធ្វើតេស្តតាមកាលកំណត់ដោយវេជ្ជបណ្ឌិតរបស់លោក។ ពេលត្រូវចោទសួរ អ្នកនាំពាក្យរូបនេះ មិនបាននិយាយអំពីផែនការបន្ទាប់ បើលោក Biden ធ្វើតេស្តឃើញវិជ្ជមានកូវីដ១៩ មុនថ្ងៃចេញដំណើររបស់លោកនៅថ្ងៃព្រហស្បតិ៍នេះឆ្ពោះទៅទីក្រុងញូវដែលី (New Delhi) នោះទេ។
ទីប្រឹក្សាសន្តិសុខជាតិលោក Jake Sullivan បាននិយាយថា រដ្ឋបាលលោក Biden នឹងផ្តោតលើបញ្ហាមួយចំនួនដូចជាការប្រែប្រួលអាកាសធាតុ ការរៀបចំបំណុលឡើងវិញ និងបញ្ហាសង្គ្រាមនៅអ៊ុយក្រែនជាដើម។ កិច្ចប្រជុំ G20 នឹងចាប់ផ្តើមនៅថ្ងៃសៅរ៍ក្នុងរដ្ឋធានីរបស់ឥណ្ឌា។
លោក Sullivan និយាយថា៖ «យើងសង្ឃឹមថា កិច្ចប្រជុំកំពូល G20នេះនឹងបង្ហាញថា ប្រទេសមានសេដ្ឋកិច្ចធំៗលើពិភពលោកអាចធ្វើការជាមួយគ្នាសូម្បីតែក្នុងគ្រាមានបញ្ហាប្រឈម»។
លោកបន្តថា «ដូច្នេះ ពេលយើងធ្វើដំណើរទៅក្រុងញូវដែលី (New Delhi) យើងនឹងផ្តោតទៅលើការផ្តល់ជូនប្រទេសកំពុងអភិវឌ្ឍ បន្តវឌ្ឍនភាពលើវិស័យអាទិភាពសំខាន់ៗសម្រាប់ពលរដ្ឋអាមេរិកាំង រាប់ចាប់ពីបញ្ហាអាកាសធាតុដល់បច្ចេកវិទ្យា និងបង្ហាញការប្តេជ្ញាចិត្តរបស់យើងចំពោះកិច្ចប្រជុំ G20ក្នុងនាមជាវេទិកាមួយដែលផ្តល់លទ្ធផល...»។
ក្រុមអ្នកវិភាគនិយាយថា អវត្តមានមេដឹកនាំសំខាន់ពីររូបគឺប្រធានាធិបតីរុស្ស៊ីលោក Vladimir Putin និងប្រធានាធិបតីចិន លោក Xi Jinping នឹងប៉ះពាល់ដល់នីតិវិធីនានា ជាពិសេសជុំវិញបញ្ហាធំបំផុតដែលប្រឈមដោយម្ចាស់ផ្ទះ គឺនាយករដ្ឋមន្ត្រីឥណ្ឌា លោក Narendra Modi។
លោក Biden បាននិយាយពេលថ្មីៗនេះថា លោក«ខកចិត្ត»ដែលមេដឹកនាំចិនដ៏មានអំណាចគ្មានគម្រោងចូលរួមកិច្ចប្រជុំកំពូលនេះ៕
