មន្រ្តីក្នុងរដ្ឋ Victoria របស់អូស្រ្តាលីដែលត្រូវបានគេចាត់ទុកថាជាកន្លែង ដែលមានការឆ្លងរាត្បាតខ្លាំងបំផុតនៃជំងឺកូវីដ១៩ នៅប្រទេសនេះនិយាយថា អាជ្ញាធររកឃើញមានអ្នកឆ្លងថ្មីបន្ថែមទៀតចំនួនតែ ៥ ករណីប៉ុណ្ណោះ កាលពីថ្ងៃចន្ទ ដែលជាចំនួនធ្លាក់ចុះខ្លាំងបំផុតមិនធ្លាប់មាន ក្នុងរយៈពេលជាង ៣ ខែកន្លងទៅ។
នៅក្នុងសន្និសីទសារព័ត៌មានមួយ អភិបាលរដ្ឋ Victoria លោក Daniel Andrews បានប្រាប់ក្រុមអ្នកសារព័ត៌មានថា រដ្ឋរបស់លោកនឹងលុបចោលភ្លាមៗវិញនូវបម្រាមគោចរពេលរាត្រី ដែលត្រូវបានដាក់ឲ្យអនុវត្តក្នុងរយៈពេលមួយខែមកហើយ។ លោកនិយាយថា ចាប់ពីដើមខែតុលាតទៅសិស្សានុសិស្សភាគច្រើន នឹងវិលត្រឡប់ទៅសាលារៀនវិញ ហើយមុខជំនួញជាច្រើនកន្លែងដែលក្នុងនោះមានអាជីកម្មជាច្រើន រួមមានវិស័យរោងចក្រផលិតកម្ម សំណង់ និងកន្លែងកែច្នៃម្ហូបអាហារអាចបើកឡើងវិញ។
លោក Andrews ក៏បានកត់សម្គាល់ពីការធ្វើពលិកម្មរបស់ពលរដ្ឋ ដោយបញ្ជាក់ច្បាស់ថា យុទ្ធសាស្ត្ររបស់ពួកគេមានប្រសិទ្ធភាព។ រហូតមកដល់ពេលថ្មីៗនេះ ក្នុងដើមខែសីហា ករណីឆ្លងប្រចាំថ្ងៃក្នុងរដ្ឋ Victoria បានកើនឡើងខ្ពស់រហូតដល់ចំនួន ៧២៥ ករណី ក្នុងមួយថ្ងៃ។ ទោះជាចំនួននេះបានចុះថយខ្លាំងយ៉ាងណាក្តី លោក Andrews ក៏បានជំរុញឲ្យពលរដ្ឋចាំបាច់ត្រូវតែបន្តមានការប្រុងប្រយ័ត្នខ្ពស់។
ទីក្រុង Melbourne ដែលជាធានីនៃរដ្ឋ Victoria និងជាទីក្រុងធំបំផុតទីពីររបស់អូស្ត្រាលី និងតំបន់ជនបទនៃរដ្ឋ Victoria ជុំវិញនោះ ត្រូវបានគេដាក់ក្នុងស្ថានភាពបិទក្រុងដ៏តឹងរ៉ឹង កាលពីថ្ងៃទី២ ខែសីហាកន្លងមក ដោយបានបិទសាលារៀន និងហាងជំនួញផ្សេងៗ ដែលមិនចាំបាច់ការដាក់បម្រាមគោចរពេលរាត្រី និងហាមប្រាមការជួបជុំជាសាធារណៈជាដើម។ ការរឹតបន្តឹងនានាកំពុងស្ថិតនៅក្នុងការអនុវត្តនៅឡើយ រហូតមកដល់ពេលនេះ។
ជារួមអូស្ត្រាលីជាប្រទេសមួយដែលទទួលបានជោគជ័យបំផុតក្នុងការទប់ស្កាត់ការផ្ទុះរាលដាលនៃជំងឺកូវីដ១៩ ដោយប្រទេសអូស្រ្តាលីមានចំនួនអ្នកឆ្លងសរុបប្រមាណ ២៧.០០០ នាក់ប៉ុណ្ណោះ ក្នុងចំនួនពលរដ្ឋសរុបទាំងអស់ ២៥ លាននាក់៕
