អតីតនាយករដ្ឋមន្ត្រីអូស្ត្រាលីលោក Paul Keating និយាយថាកិច្ចព្រមព្រៀងរបស់ប្រទេសដើម្បីទិញនិងអភិវឌ្ឍន៍កងនាវាមុជទឹកនុយក្លេអ៊ែរដោយធ្វើកិច្ចសហប្រតិបត្តិការជាមួយចក្រភពអង់គ្លេសនិងស.រ.អ.ជា«កិច្ចព្រមព្រៀងអាក្រក់បំផុតក្នុងប្រវត្តិសាស្ត្រ»។
លោក Keating បានវាយប្រហារកិច្ចព្រមព្រៀងរវាងប្រទេសអូស្ត្រាលី ចក្រភពអង់គ្លេសនិងស.រ.អ.នៅថ្ងៃពុធនេះនៅក្នុងសុន្ទរកថាមួយដែលលោកបានថ្លែងនៅក្នុងក្លិបអ្នកកាសែតជាតិក្នុងក្រុង Sydney។
កិច្ចព្រមព្រៀងច្រើនទសវត្សរ៍នេះ ដែលអាចឱ្យអូស្ត្រាលីបង់សោហ៊ុយ២៤៥ពាន់លានដុល្លារ ត្រូវបានប្រកាសកាលពីថ្ងៃចន្ទដោយលោកនាយករដ្ឋមន្ត្រី Anthony Albanese សមភាគីអង់គ្លេស លោក Rishi Sunak និងប្រធានាធិបតីស.រ.អ.លោក Joe Biden នៅក្រុង San Diego តាមរយៈភាពដៃគូការពារត្រីភាគីដែលគេស្គាល់តាមអក្សរកាត់ថា AUKUS ដែលមានប្រទេសបីចូលរួមគឺអូស្ត្រាលី ចក្រភពអង់គ្លេសនិងស.រ.អ.។
តាមរយៈកិច្ចព្រមព្រៀងនេះ គេនឹងឃើញកងនាវាមុជទឹកនុយក្លេអ៊ែរអាមេរិកាំងនិងអង់គ្លេសធ្វើបេសកកម្មដាក់វេនក្នុងដែនសមុទ្រអូស្ត្រាលីចាប់ផ្តើមពីឆ្នាំ២០២៧។ នៅដើមទសវត្សរ៍ឆ្នាំ២០៣០ អូស្ត្រាលីនឹងទិញនាវាមុជទឹកយ៉ាងតិចណាស់បីគ្រឿងឬរហូតដល់ប្រាំគ្រឿងពីស.រ.អ.។ នាវាមុជទឹកទាំងនេះដែលស្ថាបនាដោយស.រ.អ.ដើរដោយកម្លាំងនុយក្លេអ៊ែរនិងមានផ្ទុកអាវុធធម្មតាត្រូវបានរចនាឡើងដើម្បីតាមប្រមាញ់និងវាយប្រហារនាវាមុជទឹកឯទៀតៗ។ ហើយប្រទេសទាំងបីនេះនឹងធ្វើការជាមួយគ្នាដើម្បីអភិវឌ្ឍនាវាមុជទឹកនុយក្លេអ៊ែរសម្រាប់វាយប្រហារថ្មីមួយដែលជាគម្រោងការមួយអាចចំណាយពេលពីរទសវត្សរ៍។
លោក Keating បានបដិសេធគំនិតដែលថាប្រទេសចិនជាការគំរាមកំហែងដល់ប្រទេសអូស្ត្រាលី ហើយលោកបាននិយាយថាជា«ការនិយាយឥតបានការ»ដែលថាកងនាវាមុជទឹកនុយក្លេអ៊ែរមួយកងតូចមួយអាចការពារប្រទេសបានពីកងនាវាចម្បាំងចិន។ លោកបានថ្លែងថាអូស្ត្រាលីអាចបាញ់ពន្លិចកងនាវាចម្បាំងចិន«ដោយប្រើកងយន្តហោះចម្បាំងនិងមីស៊ីល»។
អតីតនាយករដ្ឋមន្ត្រីអូស្ត្រាលីរូបនេះ ដែលបានកាន់តំណែងពីឆ្នាំ១៩៩១ដល់ឆ្នាំ១៩៩៦ បាននិយាយថាកិច្ចព្រមព្រៀងអំពីនាវាមុជទឹកនុយក្លេអ៊ែរជាសេចក្តីសម្រេចចិត្តអន្តរជាតិអាក្រក់បំផុតដោយរដ្ឋាភិបាលខាងគណបក្សពលករតាំងពីសង្គ្រាមលោកលើកទីមួយមក ដែលនៅពេលនោះរដ្ឋាភិបាលរបស់គណបក្សនេះគ្មានជោគជ័យក្នុងការដាក់កំហិតស្តីពីការធ្វើទាហានជាចាំបាច់។
បន្ថែមលើកងនាវាមុជទឹកថ្មី ភាពដៃគូ AUKUS នឹងអនុញ្ញាតប្រទេសទាំងបីឱ្យចែកចាយព័ត៌មាននិងភាពជំនាញបានងាយស្រួលជាងមុនក្នុងផ្នែកបច្ចេកវិទ្យាសំខាន់ៗដូចជាបញ្ញានិមិត្ត បច្ចេកវិទ្យា internet បច្ចេកវិទ្យា quantum ប្រព័ន្ធក្រោមទឹកនិងសមត្ថភាពវាយប្រហាររយៈចម្ងាយឆ្ងាយ៕
