ភ្ជាប់​ទៅ​គេហទំព័រ​ទាក់ទង

ចៅក្រម​សួរ​នាំ​អតីត​មន្ត្រី​បក្ស​ជំទាស់​រឿង​ប៉ុនប៉ង«ចាប់ខ្លួន»នាយក​រដ្ឋមន្ត្រី


រូបឯកសារ៖ រថយន្តដឹកអ្នកទោសជាច្រើននាក់រួមមានសមាជិកគណបក្សសង្គ្រោះជាតិដែលត្រូវបានតុលាការកំពូលរំលាយ និងលោក រ៉ុង ឈុន មេដឹកនាំសហជីព បានមកដល់តុលាការរាជធានីភ្នំពេញ កាលពីថ្ងៃទី១៥ ខែមករា ឆ្នាំ២០២១។

ក្រុម​ចៅក្រម​នៅ​តុលាការរាជធានី​ភ្នំពេញ​បាន​ភ្ជាប់​ការ​ប្រើប្រាស់​បណ្តាញ​សង្គម​ហ្វេសប៊ុក​របស់​អតីត​មន្ត្រី​និង​សកម្មជន​បក្ស​សង្គ្រោះជាតិ​ចំនួន​ពីរ​រូប​ ទៅ​នឹង​ការ «បំផុសបំផុល» ​ពល​រដ្ឋ​និង​កង​កម្លាំង​ប្រដាប់អាវុធ​ ឱ្យ «ចាប់ខ្លួន» លោក​នាយក​រដ្ឋមន្ត្រី​ ហ៊ុន សែន​ និង​បះបោរ​រំលំ​រដ្ឋាភិបាល​ក្រុង​ភ្នំពេញ​ទៅតាម​ការ​ឃោសនារបស់​អតីត​មេ​បក្ស​ប្រឆាំង​លោក​ សម រង្ស៊ី។

នេះ​ជា​សវនាការ​វគ្គ​ទី​បី​ហើយ​លើ​សំណុំ​រឿង​ ៦០០៥ ទាក់ទិន​ដំណើរ​រឿង «រួម​គំនិត​ក្បត់» «ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជា​អាទិ៍» និង«ញុះញង់​កុំ​ឱ្យ​យោធិន​ស្ដាប់​បង្គាប់» មាន​ជន​ជាប់​ចោទ​សរុប​ ៦០ ​នាក់​ តែ​ភាគច្រើន​អវត្តមាន​ដោយ​កំពុង​ស្ថិត​នៅ​ក្រៅ​ប្រទេស។

ក្នុង​អង្គ​សវនាការ​កាល​ពី​ព្រឹក​ថ្ងៃ​ព្រហស្បតិ៍ ក្រុមប្រឹក្សា​ជំនុំ​ជម្រះ​បាន​ជម្នះ​ចោទ​សួរ​ជន​ជាប់​ចោទ​ពីរ​នាក់​ ជា​អតីត​សមាជិក​និង​សកម្មជន​បក្ស​សង្គ្រោះ​ជាតិ ​ក្នុង​ចំណោម​ជន​ជាប់​ចោទ​តែ​ ៤ ​នាក់​ប៉ុណ្ណោះ ដែល​បាន​បង្ហាញ​ខ្លួន។

សំណួរ​ទាំង​នោះ​រួម​មាន​អ្វី​ទៅ​ជា​ការ «រំដោះ»​ ចេញ​ពី​របប​ «ផ្តាច់ការ» និង​អំពី​ថា​ តើ​ពួកគេ​មាន​ទំនាក់​ទំនង​និងទទួល​បញ្ជាអ្វី​ខ្លះ​ពី​ថ្នាក់​ដឹកនាំ​បក្ស​សង្គ្រោះ​ជាតិ ​ដែល​ត្រូវ​រំលាយក្នុង​ការ​អនុវត្ត​ផែនការ​មាតុភូមិ​និវត្តន៍​របស់​លោក សម រង្ស៊ី​ ដែល​មិន​បាន​សម្រេច​កាល​ពី​ថ្ងៃទី​ ៩​ ខែ​វិច្ឆិកា ​ឆ្នាំ​ ២០១៩។

ពាក្យ​ពេចន៍​មួយ​ចំនួន​ដូច​ជា​ការ​ «តស៊ូ» «លះបង់» ​និង «លទ្ធិ​ប្រជាធិបតេយ្យ» ក៏​ស្ថិត​នៅ​ក្នុង​ចង្កោមនៃ​សំណួរ​ប្រទាក់​ក្រឡា​របស់​ក្រុមប្រឹក្សា​ជំនុំជម្រះ​និង​អយ្យការ​ ដែល​យូរៗ​ម្តង​ខិត​ខំ​ពន្យល់​កង្វះ​នៃ​ភស្តុតាង​រឹងមាំ ឬ​ការ​មិន​ចូលរួម​នីតិ​វិធី​តុលាការ​ ស្វែង​រក​ការណ៍​ពិត​និង​យុត្តិធម៌​ ប្រសិន​បើ​ចុង​ចម្លើយ​ឬ​ជន​ជាប់​ចោទ​ បដិសេធ​មិន​ផ្តល់​ចម្លើយ។

លោក​ ហេង​ ចាន់សុធី​ ជា​អតីត​សមាជិក​ក្រុមប្រឹក្សា​ខណ្ឌពោធិ៍​សែនជ័យ ព្យាយាម​ពន្យល់​តុលាការ​ជាច្រើនដងថា ​អ្វី​ដែល​លោក​បាន​លើក​ឡើង​ក្នុង​គណនី​ហ្វេសប៊ុក​របស់​លោក​ ទាក់ទិន​ការ​អធិប្បាយ​របស់​លោក ពាក់​ព័ន្ធ​នឹងការ​ក្រោក​ចេញ​របប​ផ្តាច់ការ​នោះ​ គ្រាន់តែ​ជា​ការ​បញ្ចេញ​មតិ។

ក៏​ប៉ុន្តែ​ ប្រធាន​ក្រុមប្រឹក្សា​ជំនុំ​ជម្រះ​លោក រស់ ពិសិដ្ឋ​ និង​លោក សេង ហៀង ជា​តំណាង​អយ្យការ​បាន​តាំង​សំណួរ​សួរ​លោក​ឱ្យ​ផ្ដល់​និយមន័យ​ទៅ​លើ​ពាក្យ​ថា «របប​ផ្ដាច់ការ» និង «ការ​រំដោះ​ប្រទេស​ពី​របប​ផ្ដាច់ការ» ថា​ជា​ការ «បញ្ចេញ​មតិ» ឬ« អំពាវ​នាវ»។

លោក​ សុធី ​ឆ្លើយ​ភ្លាម​ថា «បញ្ចេញ​មតិ»។​

លោក​ សេង ហៀង​ ព្យាយាម​ពន្យល់​លោក ហេង ចាន់សុធី​ ថា​បើ​ប្រើ​ពាក្យ «រំដោះ» នេះមាន​ន័យ​ស្មើ​នឹង​ការ​ធ្វើ​ «រដ្ឋប្រហារ» មិន​មែន​សំដៅ​លើ​ការ​បោះឆ្នោត​ទេ។

លោក​ សុធី​ ក៏​បញ្ជាក់​ទៅ​វិញ​ថា៖ «ដូច​ខ្ញុំ​និយាយ​ទៅ​តាម​ឆន្ទៈ​រាស្ត្រ»។

យ៉ាង​ណា​ក៏​ដោយ​ មុន​ពេល​ក្រុមប្រឹក្សា​ជំនុំជម្រះ​អនុញ្ញាត​ឲ្យ​លោក ហេង ចាន់​សុធី បាន​សម្រាក​នោះ​លោក​ចៅក្រម ​អ៊ឹម វណ្ណៈ​បាន​តាំង​សំណួរ​បន្ត​ទៅ​លោក​សុធី​ថា៖ «ការ​ផ្តួល​រំលំ​ខុស​ពី​ការ​បោះឆ្នោត​ជា​រដ្ឋ​ប្រហារ។ បង​ថា​ មិនមែន​រដ្ឋប្រហារ​តែ​ជា​ការ​បោះឆ្នោត។ តើ​ផ្តួល​រំលំ​ដោយ​របៀប​ណា?»។

លោក ហេង ចាន់សុធី ថា៖ «អត់​យល់»។

តមក​លោក ​អ៊ឹម វណ្ណៈ​ ចោទ​សួរ​ថា៖​ «សម រង្ស៊ី​ ថា​ មក​ចាប់​ខ្លួន​ហ៊ុន​ សែន»។

លោក​ ហេង ចាន់សុធី​ បាន​ត្រឹម​បក​ស្រាយ​ថា​លោក​បាន​ឮ​ដំណឹង​នេះ​តាម​ការ​ផ្សាយ​របស់​វិទ្យុ​អាស៊ីសេរី​តែ​ប៉ុណ្ណោះ។​

អតីត​មន្ត្រី​ថ្នាក់​មូលដ្ឋាន​រូប​នេះ ក៏​ប្រាប់​តុលា​ការ​ថា ការ​រស់​នៅ​ក្នុង​ពន្ធនាគារ​ធ្វើ​ឲ្យ​ប៉ះពាល់​ដល់​ការចងចាំ​របស់លោក។

លោក ជា យ៉ាម៉ន អតីតចៅសង្កាត់បឹងទំពន់ទី២ និយាយជាមួយក្រុមអ្នកកាសែត នៅមុខតុលាការរាជធានីភ្នំពេញ ថ្ងៃទី២៨ ខែមករា ឆ្នាំ២០២១។ (ហ៊ុល រស្មី/វីអូអេ)
លោក ជា យ៉ាម៉ន អតីតចៅសង្កាត់បឹងទំពន់ទី២ និយាយជាមួយក្រុមអ្នកកាសែត នៅមុខតុលាការរាជធានីភ្នំពេញ ថ្ងៃទី២៨ ខែមករា ឆ្នាំ២០២១។ (ហ៊ុល រស្មី/វីអូអេ)

ក្រោយ​បិទ​ការ​សួរដេញ​ដោល​លោក ​ហេង​ ចន្ទសុធី​ លោក​ចៅក្រម អ៊ឹម វណ្ណៈ​ មិន​រំលង​រឿង «ចាប់ខ្លួន» លោក​នាយករដ្ឋ​មន្ត្រី ហ៊ុន សែន​ នៅ​ពេល​ជន​ជាប់​ម្នាក់​ទៀត​ចូល​ខ្លួន​មក​បំភ្លឺ​ នៅ​មុខ​ក្រុមប្រឹក្សា​ជំនុំ​ជម្រះ​គឺ​លោក ព្រំ រ័ត្ន អតីត​អនុប្រធាន​ចលនា​យុវជន​សង្គ្រោះ​ជាតិ នៅ​ប្រទេស​កូរ៉េ​ខាងត្បូង។

លោក​ អ៊ឹម វណ្ណៈ​ តាំង​ជា​សំណួរ​ថា៖ «ពេល​ដែល​គាត់​ដាក់​ផែនការ​គាត់​បញ្ចុះបញ្ចូលឲ្យ​ពលរដ្ឋ​និង​កង​កម្លាំង​ប្រដាប់​អាវុធ​ កុំ​ស្តាប់​រដ្ឋាភិបាល​បះបោរ​ឲ្យ​មក​ទទួល​គាត់​ផ្តួល​រំលំ​រដ្ឋាភិបាល ​និង​មក​ចាប់​ខ្លួន​នាយករដ្ឋ​មន្ត្រី​ហ៊ុន​ សែន។ មាន​បាន​ដឹង​ទេ?»។

លោក​ ព្រំ រ័ត្ន ​លើកឡើង​ថា៖ «បាន​ដឹង​តែ​មិន​បាន​ប្រព្រឹត្ត​ទេ។ ខ្ញុំ​មិន​បាន​ធ្វើ​សកម្មភាព​ទេ។ ខ្ញុំ​នៅ​ស្ងប់​ស្ងាត់​ធម្មតា»។

លោក​ ព្រំ រ័ត្ន​ ក៏​បាន​រង​សំណួរ​ជា​បន្តបន្ទាប់​អំពី​ទំនាក់​ទំនង​លោក​ជាមួយ​ថ្នាក់​ដឹកនាំ​គណបក្ស​សង្គ្រោះ​ជាតិ​ ការងារ​របស់​លោក​ក្នុង​នាម​ជា​អនុប្រធាន​ចលនា​យុវជន​ នៅ​ប្រទេស​កូរ៉​ និង​ការ​ចាក​ចេញ​របស់​លោក​ពី​ប្រទេស​កូរ៉េ​មក​ប្រទេស​កម្ពុជា​ កាល​ពី​ខែ​សីហា​ ឆ្នាំ​ ២០១៩។

លោក ​អ៊ឹម វណ្ណៈ​ ប្រឹង​យក​ចម្លើយ​ពី​លោក​ ព្រំ រ័ត្ន ​ការ​សរសេរ​របស់​លោក​លើ​ហ្វេសប៊ុក ​ពាក់​ព័ន្ធ​នឹង​ការ​ទៅ​ចូលរួម​ដំណើរ​និវត្តន៍​របស់​លោក​ សម រង្ស៊ី​ និង​ការណ៍​ដែល​លោក​ស្នើ​ឲ្យ​សមាជិក​គណបក្ស​កាន់​អំណាច​ចូលរួម​ជាមួយ​គណបក្ស​សង្គ្រោះ​ជាតិ​ ដើម្បី​ «កម្ចាត់»​ លោក​ ហ៊ុន សែន និង​ពាក្យ​ថា​ «ការតស៊ូ»​ និង «ការលះបង់» ដែល​លោក ព្រំ រ័ត្ន បាន​ប្រើ​អំឡុង​ពេល​ឆ្នាំ​ ២០១៩។​

លោក ព្រំ រ័ត្ន ​បាន​បដិសេធ​ជាច្រើន​មិន​ផ្តល់​ចម្លើយហើយ​ថា លោក​គ្មាន​ចេតនា​បះបោរ និង​ប្រើប្រាស់​ហិង្សា​ ដើម្បី​សម្រេច​គោលដៅ​នយោបាយ​របស់​លោក​ទេ។​

ក្រោយ​ការ​សួ​រដេញដោល​ជាង​ពីរ​ម៉ោង​ តុលាការ​សម្រេច​លើក​សវនាការ​ទៅ​ថ្ងៃ​ទី​ ១៨ ​ខែ​កុម្ភៈ​ ឆ្នាំ​ ២០២១។

សវនា​ការ​ដែល​ប្រើ​ពេល​ខ្លី​នៅ​ថ្ងៃ​ព្រហស្បតិ៍​នេះ​ គឺ​ដោយសារ​ជនជាប់ចោទ​មួយ​រូប​ក្នុង​ចំណោម​ជនជាប់ចោទ​បួន​រូប​ ដែល​មាន​វត្តមាន​ក្នុង​សាល​សវនាការ​ បដិសេធ​មិន​ឆ្លើយ​រាល់​សំណួ​របស់​ចៅក្រម​។

លោក​ ជា យ៉ាម៉ន​ អតីត​ចៅ​សង្កាត់​បឹង​ទំពន់​ទី​២​ ប្រាប់​តុលាការ​ថា​ លោក​មាន​មេធាវីជា​តំណាង​សិទ្ធិការ​ពារ​ខ្លួន​លោក​ ដូច្នេះ​លោក​សុំ​មិន​ឆ្លើយរាល់​សំណួរ​ទាំង​អស់។​

នៅ​ក្រៅ​តុលាការ​រាជធានី​ភ្នំពេញ​លោក​ ជា យ៉ាម៉ន​ បាន​ប្រាប់​ក្រុម​អ្នកកាសែត​ថា​ លោក​មិន​បាន​រួមគំនិត​ប្រព្រឹត្ត​អំពើ​ក្បត់​ជាតិ​ដូចការ​ចោទ​ប្រកាន់​ទេ។

នៅ​ក្រៅ​តុលាការ​រាជធានី​ភ្នំពេញ​លោក ​ជា យ៉ាម៉ន ​បាន​ប្រាប់​ក្រុម​អ្នកកាសែត​ថា​ លោក​មិន​ព្រម​ឆ្លើយ​សំណួរ​របស់​តុលាការ គឺ​ដោយ​ហេតុ​ថា​ការ​ចោទប្រកាន់​ពី​បទឧក្រិដ្ឋ​ថា លោក​ប្រព្រឹត្តអំពើ​ក្បត់​ជាតិ​នោះ​ គឺ​ជា​រឿង​នយោបាយ។

«ហើយ​មែន​ទែន​ទៅ​ឯកសារ​ដែល​ចោទ​ខ្ញុំ​ គឺ​ខ្ញុំ​អត់​មាន​ឯកសារ​នៅ​ក្នុង​ដៃ​ ដូច្នេះ​ហើយ​ ខ្ញុំ​អត់​មាន​អី​ជា​ឯកសារ​ ដើម្បី​ខ្ញុំ​ឆ្លើយ​ទៅ​សំណួរ​នោះ​ទេ។ ទី​ពីរ ​ខ្ញុំ​អត់​មាន​ជំនឿ​ថា​ រាល់​ការ​ឆ្លើយ​របស់​ខ្ញុំ​នឹង​ទទួល​បាន​លទ្ធផល​ល្អ​សម្រាប់​ខ្ញុំ​ ទទួល​បាន​យុត្តិធម៌​នៅ​ក្នុង​ពេល​បច្ចុប្បន្ន​នេះ​ទេ​ ដោយសារ​ការប្តឹង​ចោទ​ប្រកាន់​ខ្ញុំ​ពី​ទោស​ក្បត់​ជាតិ​នេះ ​គឺ​ជា​រឿង​នយោបាយ​សុទ្ធសាធ»។​

លោកស្រីចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា និយាយជាមួយក្រុមអ្នកកាសែតនៅមុខតុលាការរាជធានីភ្នំពេញ ថ្ងៃទី២៨ ខែមករា ឆ្នាំ២០២១។ (ហ៊ុល រស្មី/វីអូអេ)
លោកស្រីចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា និយាយជាមួយក្រុមអ្នកកាសែតនៅមុខតុលាការរាជធានីភ្នំពេញ ថ្ងៃទី២៨ ខែមករា ឆ្នាំ២០២១។ (ហ៊ុល រស្មី/វីអូអេ)

សម្រាប់​លោក​ស្រី​ ចក់​ សុភាព​ នាយិកា​មជ្ឈមណ្ឌល​សិទ្ធិមនុស្ស​កម្ពុជា​ ប្រាប់​ក្រុម​អ្នកកាសែត​ថា​ ការ​យក​សកម្ម​ភាព​បញ្ចេញមតិ​របស់​ពលរដ្ឋ មក​ធ្វើ​ជា​ដើម​ចម​ចាប់​ចង​ ចោទ​ប្រកាន់​ថា បាន​ប្រព្រឹត្ត ទង្វើ​ «ក្បត់​ជាតិ» នោះ​មិន​អាច​បញ្ចប់​ការ​ធ្វើ​ទុក្ខបុកម្នេញ​លើ​ពលរដ្ឋ ឬ​សកម្ម​ជន​ដែល​មាន​និន្នា​ការ​នយោបាយ​ផ្ទុយ​ពី​រដ្ឋាភិបាល​នោះ​ទេ។​

«តើ​ក្បត់​ហ្នឹង​ក្បត់​យ៉ាង​ម៉េច?​ ព្រោះ​ខ្ញុំ​តែង​តែ​យល់​ថា​ ពេល​ដែល​យើង​និយាយ​ដល់​ពាក្យ​ក្បត់​ជាតិ​នេះ​គឺ​នៅ​ពេល​ណា​ ដែល​ពលរដ្ឋ​គាត់​បង្ក​នូវ​បញ្ហា​ណា​មួយ​ដែល​ធ្វើ​ឲ្យ​បាត់​បង់​ផល​ប្រយោជន៍​ជាតិ​... ឧទាហរណ៍​ថា​ យើង​ទម្លាយ​ព័ត៌មាន​ទៅ​ឲ្យ​បរទេស​ឲ្យ​គេ​មក​ធ្វើ​សង្គ្រាម​ជាមួយ​ប្រទេស​យើង​ឬ​ក៏​បាត់​បង់​នូវ​បូរណភាព​ទឹក​ដី​អី​ជាដើម»។

ដោយឡែក​លោក​ ស៊ឹង សែនករុណា ​អ្នក​នាំ​ពាក្យ​សមាគម​ការពារ​សិទ្ធិមនុស្ស​អាដហុក​ យល់​ថា​ សំណុំ​រឿង​ដែល​មាន​ជាប់​ហេតុផ​ល​នឹង​រឿង​នយោបាយ ​នឹង​មិន​អាច​បញ្ចប់​បាន​ឆាប់ៗ​នោះ​ទេ ​ប្រសិន​បើ​គ្មាន​ដំណោះស្រាយ​ខាង​នយោបាយ​នោះ។

តែ លោក ជិន ម៉ាលីន អ្នកនាំពាក្យ​ក្រសួង​យុត្តិធម៌ នៅ​ថ្ងៃ​ព្រហស្បតិ៍​នេះ បាន​ការពារ​ចំណាត់ការ​នីតិវិធី​ដែល​ដំណើរការ​ដោយ​អង្គ​ចៅក្រម​នៅ​សាលា​ដំបូង ទៅ​លើ​ក្រុម​អតីត​មន្ត្រី​និង​សកម្មជន​បក្ស​ជំទាស់ ហើយ​ថា​ចេតនា​នៃ​ការប៉ុនប៉ង​វិល​ត្រឡប់​របស់ លោក សម រង្ស៊ី គឺ​មាន​គោលដៅ​ «ចាប់ខ្លួន​នាយករដ្ឋ​មន្រ្តី​ក្នុង​មុខ​តំណែង» ​និង​ «ផ្តួល​រំលំ​រាជ​រដ្ឋាភិបាលកម្ពុជា»៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG