អ្នកនាំពាក្យអគ្គស្នងការដ្ឋាននគរបាលជាតិអះអាងថា សមត្ថកិច្ចចាប់ខ្លួនមនុស្សយ៉ាងហោច៣១នាក់ ពាក់ព័ន្ធនឹងគម្រោងធ្វើបាតុកម្មស្នើឱ្យរដ្ឋាភិបាលដកខ្លួនចេញពីគម្រោង តំបន់ត្រីកោណអភិវឌ្ឍន៍កម្ពុជា ឡាវ វៀតណាម CLV - DTA កាលពីថ្ងៃអាទិត្យទី១៨ ខែសីហា។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិប្រាប់វីអូអេនៅថ្ងៃទី១៩ ខែសីហានេះថា សមត្ថកិច្ចបានឃាត់ខ្លួនមនុស្សចំនួន៣១នាក់ពាក់ព័ន្ធនឹងគម្រោងនៃធ្វើបាតុកម្មនៅថ្ងៃអាទិត្យ ទី១៨ ខែសីហា។ ប៉ុន្តែលោកសុំមិនឆ្លើយលម្អិត ដោយប្រាប់ឱ្យវីអូអេទៅមើលព័ត៌មានដែលលោកបានប្រាប់ស្ថាប័នក្នុងស្រុក។
ទីភ្នាក់ងារសារព័ត៌មានកម្ពុជា AKP ចេញផ្សាយកាលពីថ្ងៃទី១៨ ខែសីហា បានស្រង់សម្តីរបស់លោក ឆាយ គឹមខឿន ថា សមត្ថកិច្ចឃាត់ខ្លួនមនុស្សចំនួន៣១នាក់ ក្នុងនោះស្រី២នាក់ ដែលបានធ្វើសកម្មភាពប្រមូលកម្លាំងនៅតាមគោលដៅដែលបានកំណត់ ព្រមទាំងដកហូតវត្ថុតាងមួយចំនួនរួមមានដបសាំង កាំបិតស្នៀត ស្នាប់ដៃ ដំបង ជំពាមកៅស៊ូ និងគ្រាប់ដែក។ AKP ស្រង់សម្តីលោក ឆាយ គឹមខឿន បន្តថា ជនសង្ស័យទាំងនោះកំពុងស្ថិតក្នុងការគ្រប់គ្រងរបស់សមត្ថកិច្ច និងកំពុងរៀបចំនីតិវិធីបញ្ជូនទៅតុលាការដើម្បីចាត់វិធានការតាមផ្លូវច្បាប់។
គម្រោងតំបន់ត្រីកោណអភិវឌ្ឍន៍ត្រូវបានបង្កើតឡើងនៅក្នុងឆ្នាំ១៩៩៩ ដោយរដ្ឋាភិបាលប្រទេសចំនួនបីគឺកម្ពុជា ឡាវ និងវៀតណាម បានឯកភាពគ្នាក្នុងការដាក់ខេត្តចំនួន១៣រួមគ្នាដើម្បីអភិវឌ្ឍន៍។ កម្ពុជាមានខេត្តចំនួនបួន គឺរតនគិរី មណ្ឌលគិរី ក្រចេះ និងស្ទឹងត្រែង ដែលត្រូវបានដាក់បញ្ចូលក្នុងតំបន់ត្រីកោណអភិវឌ្ឍន៍នេះ។
កាលពីថ្ងៃទី១១ ខែសីហា ប្រជាពលរដ្ឋខ្មែរដែលរស់នៅក្រៅប្រទេសដូចជាប្រទេសកូរ៉េខាងត្បូង ជប៉ុន និងអូស្ត្រាលី បានប្រមូលផ្តុំគ្នាទាមទារតវ៉ាឱ្យរដ្ឋាភិបាលកម្ពុជាដែលមានលោក ហ៊ុន ម៉ាណែត ជានាយករដ្ឋមន្រ្តី ដកខ្លួនចេញពីគម្រោងអភិវឌ្ឍន៍បីប្រទេស ឬ CLV ដោយបារម្ភពីការបាត់បង់ខេត្តភាគឦសានចំនួនបួនរបស់កម្ពុជា ទៅប្រទេសវៀតណាម។
អ្នកប្រើប្រាស់បណ្តាញសង្គមមួយចំនួនបានបង្ហោះសារអំពីការប្រមូលផ្តុំធ្វើបាតុកម្មប្រឆាំងនឹងគម្រោងអភិវឌ្ឍន៍ CLV នេះ ដោយបានគ្រោងធ្វើនៅថ្ងៃទី១៨ ខែសីហា ឆ្នាំ២០២៤។ ចំណែកក្រុមមួយលើបណ្តាញសង្គមតេឡេក្រាមឈ្មោះថា «រួបរួមដើម្បីជាតិ» ដែលមានគណនីច្រើនពាន់នាក់ មានការជជែកគ្នាអំពីគម្រោងនៃការធ្វើបាតុកម្មនេះ។
បើតាមការផ្សាយលើទំព័រហ្វេសប៊ុករបស់ស្នងការដ្ឋាននគរបាលរាជធានីភ្នំពេញ កាលពីថ្ងៃទី១៦ ខែសីហា កម្លាំងប្រដាប់អាវុធប្រមាណជាង១០០០នាក់ ត្រូវបានដាក់ពង្រាយនៅក្នុងរាជធានីភ្នំពេញដូចជានៅមុខព្រះបរមរាជវាំង និងតាមតំបន់មួយចំនួនក្នុងខេត្តកណ្តាល ដែលជាច្រកចូលរាជធានីភ្នំពេញ ដើម្បីត្រួតពិនិត្យសកម្មភាពមិនប្រក្រតីណាមួយ ក្នុងការឈានទៅរកការធ្វើបាតុកម្ម។
កាលពីថ្ងៃទី១៨ ខែសីហា សមាជិកសមាគមសម្ព័ន្ធនិស្សិតបញ្ញវន្តខ្មែរចំនួន៤នាក់ រួមមានកញ្ញា ខេត ស៊ីណាត កញ្ញា នឿន ស្រីណែត កញ្ញា រាម ស្រីពេជ្ររតនា និងលោក ធី ថន ត្រូវបានអាជ្ញាធរចាប់ខ្លួន ដោយមិនបានបញ្ជាក់ពីមូលហេតុ ហើយការិយាល័យរបស់សមាគមនេះត្រូវបានបិទទា្វរតាមដីការបស់ព្រះរាជអាជ្ញារងអមសាលាដំបូងរាជធានីភ្នំពេញ លោក សេង ហ៊ាង។
សមាជិកគណបក្សឆន្ទៈខ្មែរបីនាក់ និងសមាជិកគណបក្សប្រជាធិបតេយ្យមូលដ្ឋានម្នាក់ ត្រូវបានចាប់ខ្លួនដោយមិនមានបញ្ជាក់ពីមូលហេតុផងដែរ។ គណបក្សទាំង២នេះចាត់ទុកការចាប់សមាជិកបក្សរបស់ខ្លួនថា ជាការរំលោភបំពានសិទ្ធិបុគ្គលយ៉ាងធ្ងន់ធ្ងរ ដែលផ្ទុយពីច្បាប់ និងរដ្ឋធម្មនុញ្ញរបស់កម្ពុជា។
វីអូអេបានព្យាយាមសួរអំពីមូលហេតុនៃការចាប់ខ្លួនសមាជិកសមាគមសម្ព័ន្ធនិស្សិតបញ្ញវន្តខ្មែរ និងសមាជិកគណបក្សនយោបាយទាំងពីរ ប៉ុន្តែលោក ឆាយ គឹមខឿន អ្នកនាំពាក្យអគ្គស្នងការនគរបាលជាតិឆ្លើយថា ពួកគេស្ថិតក្នុងចំណោមមនុស្សទាំង៣១នាក់ដែលត្រូវបានចាប់ខ្លួន។
លោកប្រាប់វីអូអេថា៖ «ក្នុងហ្នឹង៣១ហ្នឹងមានទាំងអស់ហ្នឹងហើយ តែគ្រាន់ថា សមត្ថកិច្ចគេកំពុងធ្វើការ ក្មួយគ្រាន់តែចង់សួរលម្អិតទាល់តែចាំដល់ពេលតុលាការចេញសាលក្រមទៅ»។
លោក យិន ម៉េងលី អនុប្រធានផ្នែកសិទ្ធិមនុស្ស និងដីធ្លី នៃសមាគមការពារសិទ្ធិមនុស្សអាដហុកប្រាប់វីអូអេថា ការចាប់ខ្លួនមនុស្សទាំងកណ្តាលយប់ដោយមិនមានមូលហេតុ និងដីកាកោះគឺជាការរំលោភសិទ្ធិបុគ្គលយ៉ាងធ្ងន់ធ្ងរ។
លោកថ្លែងថា៖ «កាលណានាំខ្លួនមិនបានត្រឹមត្រូវតាមផ្លូវច្បាប់ក៏វាធ្វើឱ្យរំលោភដល់សិទ្ធិបុគ្គល រំលោភទៅលើសិទ្ធិមនុស្ស រំលោភទៅលើសេរីភាពសាធារណៈ។ អ៊ីចឹងទាំងប្រជាពលរដ្ឋ និងសមត្ថកិច្ច ទាំងអស់គ្នាចូលរួមអនុវត្តឱ្យខ្ជាប់ខ្ជួនទៅតាមច្បាប់ដែលមានទៅតាមរដ្ឋធម្មនុញ្ញដែលមានចែង»។
លោក យិន ម៉េងលី បន្ថែមថា បើតាមការអង្កេតរបស់សមាគមអាដហុក មនុស្សលើសពី៣០នាក់ត្រូវបានឃាត់ខ្លួនដោយសារតែពាក់ព័ន្ធនឹងគម្រោងអភិវឌ្ឍន៍ CLV។ លោកថា ការចាប់ខ្លួននេះបានធ្វើឱ្យសេរីភាពនៃការបញ្ចេញមតិ និងការគោរពសិទ្ធិមនុស្សនៅកម្ពុជាកាន់តែធ្លាក់ចុះ។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត លើកឡើងដែរថា សិទ្ធិសេរីភាពពលរដ្ឋត្រូវបានរឹតបនឹ្តង នៅពេលដែលស្ថានភាពនយោបាយស្ថិតក្នុងភាពតានតឹង។ លោកថា អ្នកធ្វើនយោបាយទាំងអស់គួរតែគិតពីឧត្តមប្រយោជន៍ និងប្រជាជនជាធំ ជាជាងបង្កគ្រោះថ្នាក់ដល់ប្រជាជន បន្ទាប់ពីទាញប្រជាជនយកទៅធ្វើជាឧបករណ៍នយោបាយសម្រាប់ខ្លួន។
លោកថ្លែងថា៖ «សិទ្ធិ និងសេរីភាពវាហាក់ដូចជាមានការប្រទាក់គ្នាជាមួយ និងនយោបាយ នៅពេលដែលស្ថានភាពមានភាពតានតឹង អ៊ីចឹងអាសិទ្ធិនិងសេរីភាពរបស់ពលរដ្ឋវាហាក់បីដូចជាត្រូវបានរឹតត្បិតផងដែរ»។
«តំបន់ត្រីកោណអភិវឌ្ឍន៍ CLV» នេះ បានក្លាយជាប្រធានបទដ៏ចម្រូសចម្រាសមួយ ស្របពេលដែលមានការព្រួយបារម្ភពីការបាត់បង់ទឹកដីខេត្តភាគឦសានរបស់កម្ពុជាទៅកាន់វៀតណាម ដូចការបាត់បង់ទឹកដីកម្ពុជាក្រោម។ ប៉ុន្តែរដ្ឋាភិបាលកម្ពុជាបានអះអាងថា គម្រោងនេះជាកិច្ចសហប្រតិបត្តិការពាណិជ្ជកម្ម សេដ្ឋកិច្ច និងទេសចរណ៍ ហើយអធិបតេយ្យភាពរបស់ប្រទេសទាំងបីមិនមានការបាត់បង់ឡើយ៕
វេទិកាបញ្ចេញមតិ